ޤައުމީ އެއަރލައިން މޯލްޑިވިއަނުން ޗައިނާގެ ޝެންޖެންއަށް ދަތުރުތައް ފެށުމަށް ތައްޔާރުވެއްޖެއެވެ.
މޯލްޑިވިއަނުން ޝެންޖެންއަށް އުދުހުންތައް ފެށުމަށް ތައްޔާރުވެފައިވާއިރު، ފުރަތަމަ ފްލައިޓް ފުރުމަށް ހަމަޖެހިފައިވަނީ މިރޭ 20:20 ގައެވެ. ޝެންޖެންއަށް ކުރާ ފުރަތަމަ ދަތުރުގައި މޯލްޑިވިއަންގެ Q2 342 ފްލައިޓް އެ ސިޓީއަށްދާނީ ބެންކޮކަށް ޖައްސާފައެވެ. މޯލްޑިވިއަނުން ވަނީ ޝެންޖެންއަށް ހަފްތާއަކު އެއްދަތުރު ބޭއްވުމަށް ނިންމާފައެވެ. މި ދަތުރުތައް އޮގަސްޓްމަހުގެ ނިޔަލަށް ބޭއްވުމަށް ވަނީ ނިންމާފައެވެ.
މޯލްޑިވިއަނުން މިހާރުވެސް އަންނަނީ ޗައިނާގެ ދެ ސިޓީއަކަށް އުދުހުންތައް ބާއްވަމުންނެވެ. އެއީ ބެއިޖިން އަދި ޝަންހާއީއެވެ. އެ ސިޓީތަކަށް ދަތުރުތައް ފަށާފައިވަނީ މިއަހަރުގެ ޖެނުއަރީމަހުގެ ތެރޭގައެވެ.
މޯލްޑިވިއަނުން ޗައިނާގެ އިތުރު ސިޓީއަކަށް މިރޭ ދަތުރުތައް ފަށާއިރު، ޗައިނާއަކީ މިހާރުވެސް ޓޫރިޒަމުގައި ރާއްޖޭގެ އެއްވަނަ މާކެޓެވެ. މިއަހަރުގެ މިހާތަނަށް ޗައިނާއިން ދިވެހިރާއްޖެއަށް 148,951 ފަތުރުވެރިން ވަނީ ޒިޔާރަތްކޮށްފައެވެ.
މޯލްޑިވިއަނުން ދުރު މަންޒިލްތަކަށް ދަތުރުކުރުމަށް ދާދިފަހަކުން ވަނީ އެއާބަސް ވައިޑްބޮޑީ ބޯޓެއް ގެނެސްފައެވެ. މީގެ އިތުރުން މޯލްޑިވިއަނުން މިހާރުވެސް ވަނީ އެއާބަސް އިތުރު ވައިޑްބޮޑީ ބޯޓެއް ހޯދުމަށް އިއުލާނުވެސް ކޮށްފައެވެ.
Advertisement
This content is created and paid for by advertisers and does not involve Voice Journalists
