ހަތަރު ފުރޮޅުލީ އުޅަނދުފަހަރު ރާއްޖެއަށް އެތެރެކުރަން ބޭނުންވާ ފަރާތްތަކުން އެކަމަށް ހާއްސަ ހުއްދައެއް ނެގަންޖެހޭނެކަމަށް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ބުނެފިއެވެ.

އެ ވުޒާރާއިން ނެރުނު ބަޔާނެއްގައި ބުނެފައިވަނީ، ދެފުރޮޅުލީ އެއްގަމު އުޅަނދުފަހަރު ފިޔަވައި އެހެން ހުރިހާ އުޅަނދެއް މި މަހުގެ 13 ވަނަ ދުވަހުން ފެށިގެން ރާއްޖެއަށް އެތެރެކުރެވޭނީ އެއްގަމު އުޅަނދުފަހަރު ރާއްޖެއަށް އެތެރެކުރުމުގެ ހާއްސަ ހުއްދައެއް ނެގުމަށްފަހުގައި ކަމަށެވެ.

ހަތަރު ފުރޮޅުލީ އުޅަނދު ރާއްޖެއަށް އެތެރެކުރަން ބޭނުންވާ ފަރާތްތަކުން މި ހުއްދައަށް އެދި އެ ވުޒާރާގެ ޕޯޓަލް "eportal.mta.gov.mv" މެދުވެރިކޮށް މިހާރު ހުށައެޅޭނެކަމަށް ވަނީ ބުނެފައެވެ.

ހަތަރު ފުރޮޅުލީ އުޅަނދުފަހަރު އެތެރެކުރުމުގެ ހުއްދައަށް އެދޭއިރު، އެތެރެކުރާ އުޅަނދު ގަރާޖުކުރުމަށް ހަމަޖެހިފައިވާ ގަރާޖުގެ ނުވަތަ ޝޯރޫމުގެ ނުވަތަ ގުދަނުގެ ހުއްދައިގެ ކޮޕީއާއި އުޅަނދާ ބެހޭ ލިޔެކިޔުންތައް ހުށައަޅަންޖެހެއެވެ.

ކުރިން އޮންނަގޮތުން ހަތަރު ފުރޮޅުލީ އުޅަނދެއް އެތެރެކުރާއިރު، ގަރާޖު ސިޓީއެއް ހުށަހަޅަން ޖެހެއެވެ. ނަމަވެސް ގަވާއިދަށް ގެނައި ބަދަލާއެކު، 4 ފުރޮޅުލީ އުޅަނދެއް ގެނައުމުގެ ހުއްދައަށް އެދި ހުށަހަޅާއިރު، ގަރާޖެއްގައި އެ އުޅަނދު ބޭއްވުމާމެދު ގަރާޖުގެ ވެރިފަރާތުގެ އިއުތިރާސެއް ނެތްކަމުގެ ލިޔުމާއި، ގަރާޖުގެ ވެރިފަރާތުގެ އައިޑީކާޑުގެ ކޮޕީއަކާއި، އެ އުޅަނދު ބައްވާ ގަރާޖަކީ ރަޖިސްޓްރީކޮށްފައިވާ ގަރާޖެއްކަން އެނގޭނޭ ލިޔުމެއް ހުށަހަޅަންޖެހެއެވެ.

ގަވާއިދަށް ގެނައި ބަދަލާއެކު ދެން އުޅަނދެއް ރަޖިސްޓްރީކޮށްދޭނީ، މިނިސްޓްރީން ރަޖިސްޓަރީ ކުރެވޭނެ ކަމަށް ކަނޑައަޅާފައިވާ އުމުރަށްފެތޭ އުޅަނދެއްކަން އަންގައިދޭ ލިޔެކިޔުންވެސް ހުށަހެޅުމުންނެވެ.