ޖަމިއްޔަތުއް ސަލަފުގެ ސްޕޯޓްސް ޑައިރެކްޓަރުގެ މަގާމަށް ގައުމީ ފުޓްބޯޅަ ޓީމުގެ ކުރީގެ ކެޕްޓަން އަކްރަމް އަބްދުލްޣަނީ ހަމަޖައްސައިފި އެވެ.
އެކަން އެ ޖަމިއްޔާ އިން އިއުލާނުކޮށްފައި ވަނީ ނިމިދިޔަ އަލްހާ އީދު ފާހަގަކުރުމުގައި އިސްލާމީ އުސޫލުތަކާއި އެއްގޮތަށް އަމަލުކުރި ޖަމިއްޔާތަކާއި ކައުންސިލްތައް ފާހަގަކޮށް ހިތްވަރު ދިނުމަށް ބޭއްވި ހަފްލާގަ އެވެ. އެ ހަފްލާގައި ވަނީ ޖަމިއްޔަތުއް ސަލަފުން މުޅީން އަލަށް ސްޕޯޓްސް ޑައިރެކްޓަރުގެ މަގާމު އުފައްދާފައިވާކަން އިއުލާނު ކޮށްފަ އެވެ.
އަދި އެ މަގާމަށް އަކްރަމް އައްޔަނުކޮށްފައިވާކަން އިއުލާނުކޮށް އެކަމުގެ ލިޔުން ވަނީ އަކްރަމްއާ ހަވާލުކޮށްފަ އެވެ. ލިޔުން ހަވާލުކޮށް ދެއްވީ ޖަމިއްޔަތުއް ސަލަފުގެ އިލްމުވެރީންގެ މަޖިލީހުގެ ރައީސް އަދި އެ ޖަމިއްޔާގެ ނާއިބު ރައީސް އައްޝައިހް އަހްމަދު ސަމީރު އިބްރާހިމް އެވެ.
އަކްރަމަށް ލިޔުން ހަވާލުކޮށް ދެއްވަނީ
އަކްރަމަކީ ދިވެހި ކުޅުންތެރީންގެ ތެރެއިން އާންމުންގެ މެދުގައި އެންމެ ބޮޑު އިހްތިރާމަކާއި ލޯތްބެއް ހޯދި އެއް ކުޅުންތެރިޔާ އެވެ. އެކަމުގެ ސަބަބަކީ އޭނާގެ ކިބައިގައިވާ ހެޔޮ އަހްލާގާއި ލީޑާޝިޕެވެ.
ދީނީ ކަންކަމަށް ވަރަށް ބޮޑު ފަރުވާތެރި ކަމެއް ބަހައްޓާ އަކްރަމް ވަނީ ކުޅިވަރުގައި ވަރަށް ފަހުރުވެރި ކާމިޔާބީތަކެއް ހާސިލުކޮށްފަ އެވެ.
ޖަމިއްޔަތުއް ސަލަފުން ކުރިއަށް ގެންދާ އެކިއެކި ހަރަކާތްތަކުގައި ވެސް ވަރަށް ގިނައިން އަކްރަމް ބައިވެރިވެ އެވެ.
Advertisement
This content is created and paid for by advertisers and does not involve Voice Journalists
