އަންހެނެއްގެ ސިފަ ޖެހިގެން މީސްމީޑިއާގައި ފާހިޝް ކަންކަމާއި ހުތުރު ވާހަކަތައް ދައްކަމުން އައި ގ. ކަމަރާގެ މުހައްމަދު ނަބީލް (ޔާޔާ ނަބީލް) ކެނެބިސް ޓްރެފިކް ކުރުމުގެ ކުށުގައި އުމުރު ދުވަހަށް ޖަލަށްލާން ވަނީ ހުކުމްކޮށްފަ އެވެ.

މިއީ ނޮވެންބަރު 29, 2017 ގައި އޭނާގެ މައްޗަށް އުފުލާފައި އޮތް ދައުވާ އެކެވެ. އޭނާގެ އިތުރުން ހދ. ކުޅުދުއްފުށި ބިޗާން, އާދަމް މުހައްމަދުގެ މައްޗަށް ވެސް ވަނީ މި ދައުވާ އުފުލާފަ އެވެ.

ދައުވާގައި ބުނީ އޮކްޓޫބަރު 31, 2017 ގައި މި ދެ މީހުން, މަސްތުވާތަކެތި ގެންގުޅެ އެތަކެތީގެ ވިޔަފާރި ކުރާ ކަމަށް ފުލުހުންނަށް ލިބުނު މައުލޫމާތަކާއި ގުޅިގެން މއ. ބްރައިޓްބްލޫގެއަށް ގޮސް އެ ދެ މީހުން ތިބި ކޮޓަރި ފާސްކުރުމުން 20.7422 ގްރާމް ކެނެބިސް ފެނުނު ކަމަށެވެ. އަދި ކައްޓާއެއް ފެނިފައިވާ ކަމަށެވެ. އެ ކޮޓަރިއަށް ފުލުހުން ވަނީ ދޮރު ނުހުޅުވުމުން ތަޅު ހަލާކުކޮށްލައިގެންނެވެ.

އަދި ނަބީލުގެ ގެ ކަމުގައިވާ ގ. ކަމަރާ ފާސްކުރިއިރު 31.3653 ގްރާމް ޑައިމޯފިން ހުރި ކަމަށާ 231.3015 ގްރާމް ކެނެބިސް ހުރި ފިލްމު ހުސްކުރި އަށް ދަޅު ފެނިފައިވާ ކަމަށެވެ. 

މި ދައުވާއަށް އެ ދެ މީހުން ވެސް ވަނީ އިންކާރު ކޮށްފަ އެވެ. ނަމަވެސް މި މައްސަލަ ބެއްލެވި ފަނޑިޔާރު, މުހައްމަދު މިސްބާހު ވަނީ އެކަށީގެންވާ ޝައްކެއް ނެތް މިންވަރަށް ޝަރީއަތަށް އެކަން ސާބިތުވާ ކަމަށް ކަނޑައަޅާ އެ ދެ މީހުން ކެނެބިސް ޓްރެފިކް ކުރުމުގެ ކުށުން ކުށްވެރިވާ ކަމަށް ކަނޑައަޅާފަ އެވެ.

އަދި އެ ކުށުގެ އަދަބެއްގެ ގޮތުން އުމުރު ދުވަހުގެ ޖަލު ހުކުމެއް ވަނީ އިއްވާފަ އެވެ.

މީގެ އިތުރުން އެ ދެ މީހުން 100,000 ރުފިޔާ އިން ޖޫރިމަނާކޮށް އެ ފައިސާ އެއް އަހަރު ދުވަސްތެރޭ ދެއްކުމަށް ވަނީ އަމުރުކޮށްފަ އެވެ.

މި މައްސަލައާ ގުޅިގެން އެ ދެ މީހުން ވަނީ ދެ އަހަރަށް ވުރެ ދިގު މުއްދަތެއް ޖަލުގައި ހޭދަކޮށްފަ އެވެ. އެހެން ކަމުން އެ މުއްދަތު ކެނޑުމުން ޖަލުގައި ދެން ހޭދަ ކުރަން ޖެހޭނީ 22 އަހަރާއި 9 މަހާއި 8 ދުވަސް ކަމަށް ވަނީ ކަނޑައަޅާފަ އެވެ.

ހުކުމް އިއްވުމުގެ ކުރީން އެ ދެ މީހުން ވެސް ވަނީ ޖަލުގައި ހޭދަކުރި މުއްދަތު އުނިކޮށް ދިނުމަށާއި ޖޫރިމަނާގެ އަދަދު ވީހާވެސް ކުޑަކުރުމަށް އެދިފަ އެވެ.