ޕާކިސްތާނުގެ ޕަންޖާބު ސަރަޙައްދުގައި ޤަވާޢިދާ ޚިލާފަށް ގޭގައި ގެންގުޅުނު ސިންގާއެއް ފިލައިގެން ގޮސް އަންހެނަކަށާއި ދެ ކުޑަކުދިންނަށް ހަމަލާދީފައިވާ މައްސަލައާ ގުޅިގެން، ޤަވާޢިދާ ޚިލާފަށް ގެންގުޅުނު 18 ސިންގާ ދައުލަތަށް ނަގާފައިވާކަމަށް އެ ޤައުމުގެ ކަމާބެހޭ ފަރާތްތަކުން ހޯމަ ދުވަހު ބުނެފިއެވެ.

މި ހަމަލާއަށްފަހު، އެކަމާ ގުޅިގެން ހަރުކަށި ފިޔަވަޅުތައް އަޅަން ފަށާފައިވާކަމަށްވެސް އެ ފަރާތްތަކުން ބުނެއެވެ.

މި ހާދިސާ ހިނގާފައިވަނީ މިދިޔަ ހަފުތާގައެވެ. ޕަންޖާބު ޕްރޮވިންޝަލް ވައިލްޑްލައިފް އޮފިޝަލުން ވިދާޅުވީ، އެ ސިންގާ އަންހެން މީހާގެ ގައިގެ އެކި ތަންތާގައި ވަކި އަޅައި ކުދި އަނިޔާތައް ދީފައިވާ ކަމަށާ، އެ ސިންގާ ހަމަލާދިން ފަސް އަހަރާއި ހަތް އަހަރުގެ ދެ ކުޑަކުދިންނަށް ހޮސްޕިޓަލުގައި ފަރުވާދޭން ޖެހުނު ކަމަށެވެ. ނަމަވެސް، އެކުދިންނަށް ލިބިފައިވާ އަނިޔާ ފުރާނައަށް ނުރައްކާވާ ވަރަށް ބޮޑު ނޫން ކަމަށްވެސް އެ އޮފިޝަލުން ވިދާޅުވިއެވެ.

ޕްރޮވިންޝަލް ވައިލްޑްލައިފް އެންޑް ޕާކްސް ޑިޕާޓްމަންޓްގެ ޑިރެކްޓަރު ޖެނެރަލް، މުބީން އިލާހީ ވިދާޅުވީ، ލާހޯރުގެ ގޭބިސީއެއްގައި ލައިސަންސެއް ނެތި ގެންގުޅުނު އެ ސިންގާ ދައުލަތަށް ނަގާފައިވާ ކަމަށާއި، އެ ސިންގާ ވަނީ ސަފާރީ ޕާކަކަށް ފޮނުވާފައި ކަމަށެވެ. އަދި އެ ސިންގާގެ ވެރިފަރާތް ފަހުން ހައްޔަރުކޮށްފައިވާ ކަމަށް އެގައުމުގެ ފުލުހުން ބުނެއެވެ.

ސިންގާ ފަދަ ޖަނަވާރުން ގޭގައި ގެންގުޅެ، އެކަން މީސްމީޑިއާގައި އާއްމުކޯސް މަޝްހޫރުކަން ހޯދުމަކީ ޕާކިސްތާނުގައި ވަރަށް ބޮޑަށް އާންމުވެފައިވާ ކަމެކެވެ. މިގޮތުން، އެފަދަ ޖަނަވާރުގެ ވެރިފަރާތްތަކުން އާންމުކޮށް މި ޖަނަވާރުތައް އޮންލައިންކޮށް ދައްކާލަނީ މުޖުތަމަޢުގައި އެ މީހުންގެ ދަރަޖަ ރަމްޒުކޮށްދޭ އެއްޗެއްގެ ގޮތުގައެވެ.

"ސިންގާ ގެންގުޅުމާ ބެހޭ އާ ޤަވާޢިދުތަކުގައި ބުނެފައިވާ ގޮތުން، ލައިސަންސެއް ނެތި، ޢަމަލުކުރަންޖެހޭ މިންގަނޑުތަކަށް (އެސް.އޯ.ޕީ) ޢަމަލުނުކޮށް، އެއްވެސް ފަރުދަކަށް ސިންގާއެއް ގެންގުޅުމުގެ ހުއްދަ ނުދެވޭނެ،" މުބީން އިލާހީ ވިދާޅުވިއެވެ.

މިފަދަ ޤަވާޢިދާ ޚިލާފުވާ ފަރާތްތަކަށް ހަތް އަހަރާއި ހަމައަށް ޖަލު ހުކުމެއް އަންނާނެ ކަމަށްވެސް އޭނާ ވިދާޅުވިއެވެ.

ވައިލްޑްލައިފް ޑިޕާޓްމަންޓުން ވަނީ 18 ސިންގާ ދައުލަތަށް ނެގުމުގެ އިތުރުން، ސިންގާ ގެންގުޅޭ 38 ތަނެއް ބަލައިފާސްކޮށް، ޤަވާޢިދުތަކާ ޚިލާފުވި އަށް މީހަކު ހައްޔަރުކޮށްފައެވެ. މި ހަފުތާ ނިމުމުގެ ކުރިން ސިންގާ ގެންގުޅޭ އެފަދަ ހުރިހާ ތަނެއް ބަލައިފާސްކުރާނެ ކަމަށްވެސް އޭނާ އިތުރަށް ވިދާޅުވިއެވެ.

ޕާކިސްތާނުގެ އެންމެ އާބާދީ ބޮޑު ޕްރޮވިންސެއް ކަމަށްވާ ޕަންޖާބުގައި ގޭބިސީތަކާއި، ފާމުތަކުގައި 584 ސިންގާއާއި މިނިކާވަގު ތިބި ކަމަށް އޭނާ ވިދާޅުވިއެވެ.