މިއަހަރުގެ މެއި މަހު ދައުލަތުގެ ބެލުމުގެ ދަށަށް 3 ކުދިން ނެގިފައިވާ ކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ބުނެފިއެވެ. މިއީ 3 އަންހެން ކުދިންނެވެ.

އެ ވުޒާރާގެ ތަފާސް ހިސާބުތަކުން ދައްކާ ގޮތުގައި މިއަހަރުގެ މެއި މަހާ ހަމައަށް ދައުލަތުގެ ބެލުމުގެ ދަށުގައި ޖުމްލަ 148 ކުދިން ތިބިއެވެ. މީގެ ތެރޭގައި ހިމެނެނީ 82 ފިރިހެން ކުދިންނާއި 66 އަންހެން ކުދިންނެވެ.

މެއު މަހު ވުޒާރާއަށް ހުށަހެޅުނު މައްސަލަތަކުގެ ތެރޭގައި ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 97 މައްސަލަ ހިމެނެއެވެ. މީގެ ތެރެއިން އެންމެ ގިނައީ އިހުމާލުވުމުގެ މައްސަލައެވެ. އެފަދަ 23 މައްސަލަ ހުށަހެޅިފައިވެއެވެ. ދެން ގިނައީ ޖިސްމާނީ އަނިޔާގެ މައްސަލައެވެ. އެފަދަ 22 މައްސަލަ ހުށަހެޅިފައުވެއެވެ.

މީގެ އިތުރުން އާއިލީ 38 މައްސަލައާއި، ކުދިންގެ އަޚްލާޤީ 32 މައްސަލަ ވެސް މެއި މަހު ހުށަހެޅިފައިވާ ކަމަށް ތަފާސް ހިސާބުތަކުން އެނގެއެވެ.

އެ ވުޒާރާގެ ހެލްޕްލައިންތަކަށް މެއި މަހު ޖުމްލަ 2،259 ކޯލު ލިބިފައިވާ ކަމަށް ތަފާސް ހިސާބުތަކުން ދައްކައެވެ. 

މީގެ އިތުރުން، ގެވެށި އަނިޔާގެ 33 މައްސަލައެއް ހުށަހެޅިފައިވާއިރު، އޭގެ ތެރޭގައި ޖިސްމާނީ އަނިޔާގެ 17 މައްސަލައާއި، ޖިންސީ އަނިޔާގެ 12 މައްސަލަ އެ ވުޒާރާއަށް ރިޕޯޓުކޮށްފައިވެއެވެ.

ހަމަ އެހެންމެ އަމިއްލަ ނަފްސަށް އަނިޔާ ކުރުމުގެ 27 މައްސަލަ މެއި މަހު ހުށަހެޅުނުއިރު، އޭގެ ތެރެއިން 21 އަކީ އަންހެނުންނެވެ.