މޯލްޑިވްސް ކަރެކްޝަނަލް ސާވިސްގެ ބެލުމުގެ ދަށުގައި ތިބޭ ގައިދީންނަށާއި، އޮފިސަރުންނަށް ކޮއްތު ފޯރުޮކޮށްދޭ ފަރާތްތަކަށް 30 މިލިއަނެއްހާ ރުފިޔާ ނުދެވި އެބައޮތްކަމަށް ޕްރިޒަން ކޯޕަރޭޓިވް ސޮސައިޓީން ހާމަކޮށްފިއެވެ.

މާލިއްޔަތު ކޮމިޓީން މިއަދު ވަނީ މޯލްޑިވްސް ކަރެކްޝަނަލް ސާވިސްގެ ޕްރިޒަން ކޯޕަރޭޓިވް ސޮސައިޓީގެ ވެރިންނާ ބައްދަލުކޮށްފައެވެ. މި ބައްދަލުވުމުގައި ވަނީ ދެފަރާތުގެ މެދުގައިވެސް ހުރި ކަންބޮޑުވުންތައް ފާޅުކޮށްފައެވެ. އެގޮތުން މި ބައްދަލުވުމުގައި މާލިއްޔަތު ކޮމިޓީން ވަނީ މޯލްޑިވްސް ކަރެކްޝަނަލް ސާވިސްގެ ޕްރިޒަން ކޯޕަރޭޓިވް ސޮސައިޓީގެ މާލީހިސާބުތައް ދިނުން ލަސްވަމުންދާ މައްސަލާގައި ކަންބޮޑުވުން ފާޅުކޮށްފައެވެ.

މިއަދުގެ ބައްދަލުވުމުގައި ދިއްގަރު ދާއިރާގެ މެމްބަރު އަހުމަދު ނާޒިމް ވިދާޅުވީ ކަރެކްޝަނަލް ސާވިސްއާ މުއާމަލާތްކުރެވޭތާ ދުވަސްތަކެއް ވެގެން ހިނގައްޖެކަމަށާއި، ނަމަވެސް މާލިއްޔަތު ކޮމިޓީން ބޭނުންވާ ސުވާލުތަކަށް ކަރެކްޝަނުން ޖަވާބު ނުދެއްވާކަމަށެވެ. 

ނާޒިމް ވިދާޅުވީ، ޕްރިޒަން ކޯޕަރޭޓިވް ސޮސައިޓީގެ މާލީ ހިސާބުތައް އޮޑިޓްކޮށް ކަމާބެހޭ ފަރާތްތަކާ ހިއްސާކުރާކަމަށް ބުނާއިރު، އެ ހިސާބުތައް މަޖިލީހާ ހިއްސާކޮށްފައިނުވާކަމަށެވެ. ނާޒިމް ވިދާޅުވީ ކޯޕަރޭޓިވް ސޮސައިޓީގެ މާލީކަންކަން ހުރީ ރަނގަޅަށްކަން އެ ކޮމިޓީން ޔަގީންކުރަން ބޭނުންވާަކަމަށެވެ.

ބައްދަލުވުމުގައި ޕްރިޒަން ކޯޕަރޭޓިވް ސޮސައިޓީގެ ބޭފުޅުން ވަނީ ގައިދީންނަށް ކާންދިނުމުގައި ކުރިމަތިވާ ގޮންޖެހުންތައް ފާހަގަކޮށްފައެވެ. މިގޮތުން ޖަލުގެ ގައިދީންނަށް ފަސްއިރު ކާންދިނުމަށް 9 މެނޫއެއް ހިމެނޭއިރު، މިކަމަކީ އޭގެ ޒާތުގައި ވަރަށްބޮޑު ތަކްލީފްތަކެއް އުފުލަންޖެހޭ ކަމެއްގެ ގޮތުގައި ވަނީ ފާހަގަކޮށްފައެވެ. އެގޮތުން މިހާތަނަށް ކުރިމަތިވާ އެންމެބޮޑު އެއް ގޮންޖެހުމަކީ ޖަލުތަކަށް ގަޑިއަށް ކާތަކެތި ގެނައުންކަމަށާއި، ދީފައިވާ މެނޫއާ އެއްގޮތަށް ކާއެއްޗެހި ނުގެންނަ މައްސަލަ ކަމަށެވެ. އެ މައްސަލަ އެގޮތަށް ދިމާވަމުން އަންނަނީ ފިނޭންސުން އެފަރާތްތަކަށް ދޭންޖެހޭ ފައިސާ ނުދޭތީކަން ވަނީ ފާހަގަކޮށްފައެވެ.

މާލިއްޔަތު ކޮމިޓީގެ ބައްދަލުވުމުގައި ޕްރިޒަން ކޯޕަރޭޓިވް ސޮސައިޓީގެ ބޭފުޅުން ދެއްކެވި ވާހަކަތަކުން ދޭހަވިގޮތުގައި ގައިދީންނަށާއި، އޮފިސަރުންނަށް ކޮއްތު ފޯރުޮކޮށްދޭ ފަރާތްތަކަށް ދޭންޖެހޭ ފައިސާގެ އަދަދު 30 މިލިއަން ރުފިޔުާއަށް އަރައެވެ. ގައިދީންގެ ކެއިން ބުއިމުގެ ހަރަދަށް ބަލާއިރު މިހާރު ދުވާލެއްގެ މައްޗަށް ބޮލަކަށް 75 ރުފިޔާ ހޭދަކުރެއެވެ. މިއީ މަހަކަށް ބަލާނަމަ 2250 ރުފިޔާއެވެ. ޖަލު ގައިދީންގެ ތެރެއިން ހަކުރު ބަލީގެ މީހުންނަށް ދެނީ ވަކި ހާއްސަ މެނޫއެކެވެ. މިއަދުގެ ބައްދަލުވުމުގައި ކޯޕަރޭޓިވް ސޮސައިޓީގެ ބޭފުޅުން ވަނީ ޓެންޑަރ އުސޫލުން ކޮއްތު ފޯރުކޮށްދޭ ފަރާތްތައް ހަމަޖެއްސުމުގެ ބަދަލުގައި ކޯޕަރޭޓިވް ސޮސައިޓީން އެ މަސައްކަތްކުރުމުން މިކަމުގައި އުފުލަންޖެހޭ ތަކުލީފްތައް ކުޑަކަން ފާހަގަކޮށްފައެވެ