ކަނޑުމަތީގެ އެކި ހާދިސާތަކުގައި މިދިޔަ 4 އަހަރު 112 ޓޫރިސްޓުން މަރުވި ކަމަށް ތަފާސް ހިސާބުތަކުން ދައްކައިފި އެވެ.

އެ ހިސާބުތައް މިއަދު އޮތް ރައްޔިތުންގެ މަޖިލީހުގެ ގަވައިދު ކޮމިޓީގައި ގަލޮޅު އުތުރު ދާއިރާގެ މެމްބަރު މުހައްމަދު އިބްރާހިމް ވަނީ ހިއްސާ ކުރައްވާފަ އެވެ. ޓޫރިސްޓުންގެ ރައްކާތެރިކަމާ ގުޅޭ ގޮތުން ހަދަން ޖެހޭ ގަވައިދުތަކާމެދު މަޝްވަރާ ކުރުމަށް ކަމާގުޅޭ ބޭފުޅުންނާ އެކު އޮތް ކޮމެޓީ ބައްދަލްވުމުގައި މެންބަރު މުހައްމަދު އިބްރާހިމް ވަނީ ފުލުހުންގެ އިދާރާ އިން ހޯދި އެ މައުލޫމާތުތައް ހިއްސާ ކުރައްވާ އެއީ ވަރަށް މަތީ ނަންބަރުތަކެއް ކަން ފާހަގަ ކުރައްވާފަ އެވެ.

އަދި ކަންބޮޑުވުން ފާޅު ކުރެއްވި އެވެ.

މެންބަރު ހިއްސާކުރެއްވި މައުލޫމާތު ގައި ވިދާޅުވީ މިދިޔަ ހަތަރު އަހަރެއްހާ ދުވަހުގެ ތެރޭގައި އެންމެ ގިނަ ޓޫރިސްޓުން މަރުވީ ގެނބިގެންނެވެ. ގެނބިގެން 68 މީހަކު ވަނީ މަރުވެފަ އެވެ. ދެން އެންމެ ގިނައީ ޑައިވިން އާއި ސްނޯކްލިންއަށް ގޮސް އުޅުމުގެ ތެރޭގައި މަރުވި މީހުންނެވެ. މި މުއްދަތުގައި 42 މީހަކު އެފަދަ ހާދިސާތަކުގައި މަރުވެފައިވެ އެވެ.

މީގެ އިތުރުން ޑައިވިން ނުވަތަ ސްނޯކްލިންއަށް ގޮސް އުޅުމުގެ ތެރޭގައި އެކި ހާދިސާތައް ހިނގައިގެން ނުވަ މީހަކު ވަނީ މަރުވެފަ އެވެ. ބައެއް މީހުން މަރުވީ އުޅަނދެއްގައި ޖެހިގެންނެވެ.

މީގެ އިތުރުން މޫދަށް ވެއްޓި ވެސް އެކަކު ވަނީ މަރުވެފަ އެވެ.