ފެނަކަ ކޯޕަރޭޝަން ލިމިޑެޓްގެ ޑިރެކްޓަރުންގެ ބޯޑުގެ މެމްބަރުކަމާއި އަދި ޗެއަރޕަރސަންގެ މަޤާމަށް ހުސެއިން ޝާމް އާދަމް އައްޔަނުކުރައްވައިފިއެވެ.
ފެނަކައިގެ ޗެއާމަންކަމުގެ މަގާމަށް ޝާމް އައްޔަނުކުރިކަން ސަރުކާރު ކުންފުނިތަކުގެ ބަލަދުވެރިފަރާތް، ޕީސީބީން އެކްސްގައި ކުރި ޕޯސްޓެއްގައި ބުނެފައިވަނީ، މިއަދުން ފެށިގެން ފެނަކަ ކޯޕަރޭޝަން ލިމިޑެޓްގެ ޑިރެކްޓަރުންގެ ބޯޑުގެ މެމްބަރުކަމާއި އަދި ޗެއަރޕަރސަންގެ މަޤާމަށް ނ.ފޮއްދޫ، ޔާޤޫތުގޭ ހުސެއިން ޝާމް އާދަމް އައްޔަނުކޮށްފައިވާކަމަށެވެ.
.ފެނަކައިގެ ޗެއާމަނެއްގެ ގޮތުގައި މިހާތަނަށް ހުންނެވީ އެސްޓީއޯގެ މެނޭޖިންޑ ޑިރެކްޓަރު ޝިމާދު އަލީއެވެ. ފެނަކައިން މިއަދު އެކްސްގައި ކުރި ޕޯސްޓެއްގައި ބުނީ ޗެއާމަންގެ ހައިސިއްޔަތުން ދައްކައިދިން ލާމަސީލު ނަމޫނާއަށާއި، ތަސައްވުރާއި، ލީޑަރޝިޕަށް ޝުކުރު އަދާކުރާ ކަމަށެވެ. ފެނަކައިގެ ޗެއާމަނަކަށް ޝިމާދު އައްޔަނުކުރީ މިދިޔަ އަހަރުގެ ސެޕްޓެމްބަރުމަހުގެ ތެރޭގައެވެ.
ފެނަކައިގެ ޗެއާމަނަކަށް ޝާމް އައްޔަނުކުރުމާ ގުޅިގެން ފެނަކައިން ވަނީ ހޫނު މަރުހަބާއެއް ކިޔާފައެވެ. ޝާމް މިހާތަނަށް ހުންނެވީ ފިނޭންސް މިނިސްޓްރީގެ ސްޓޭޓް މިނިސްޓަރެއްގެ މަގާމުގައެވެ. ޝާމް ވަނީ މާލީ ވުޒާރާގެ ގިނަ މަގާމްތަކެއް ފުރުއްވާފައެވެ. މީގެ އިތުރުން މޯލްޑިވްސް ސެންޓަރފޯ އިސްލާމިކް ފައިނޭންސް ކޯޕަރޭޝަން ލިމިޓެޑްގެ ޗެއާމަންކަންވެސް އޭނާ ވަނީ އަދާކުރައްވާފައެވެ.
ޝާމް ވަނީ މީގެ ކުރިން 2016 އިން 2018 އަށްވެސް ފެނަކައިގެ ބޯޑު މެމްބަރެއްގެ މަގާމު ފުރުއްވާފައެވެ. އަދި ވަރލްޑް ބޭންކްގެ ފަރާތުންވެސް ރާއްޖޭގެ މާލީ ދައިރާއަށް ގިނަ މަސައްކަތްތަކެއްވެސް ޝާމް ވަނީ ކުރައްވާފައެވެ.
Advertisement
This content is created and paid for by advertisers and does not involve Voice Journalists
