ކެންދޫ ގޮނޑުދޮށަށް މަރުވެފައިވާ ގިނަ އަދަދެއްގެ މުށިމަސް ލައްގަނީ
ބ. ކެންދޫ ފަޅުގައި އޮތް މުށިމަސް އައިނުން ގިނަ އަދަދެއްގެ މަސްތައް މަރުވެގެން ރަށުގެ ގޮނޑުދޮށަށް ލައްގަން ފަށައިފިއެވެ.
ކެންދޫ ކައުންސިލްގެ މެންބަރު އަހުމަދު އައްޒާމް "ވޮއިސް" އަށް މައުލޫމާތު ދެއްވަމުން ވިދާޅުވީ، ރަށުގެ ވަށައިގެން މުށިމަސް އައިން އޮންނަތާ ގާތްގަނޑަކަށް 4 މަސް ވެދާނެ ކަމަށެވެ.
އަދި މީގެ ކުރިންވެސް ދޭތެރެއިން މަސް މަރުވެފައި ހުންނަކަން ފާހަގަވާ ކަމަށާ، އާދަޔާ ޚިލާފަށް ގިނަ މަސް މަރުވެފައިވާކަން ފާހަގަކުރެވެންފެށީ ފާއިތުވި ތިން ދުވަހު ކަމަށް އޭނާ ވިދާޅުވިއެވެ.
އެގޮތުން މަސްތައް މަރުވެގެން ގޮނޑު ދޮށަށް ލައްގާތީ، ކައުންސިލުން އެ ތަކެތި ނަގައި ސާފު ކޮށްފައިވާ ކަމަށާ، މިއަދު މަރުވެފައިވާ މަސްތަކުގެ އަދަދު މިދިޔަ ތިން ދުވަހާއި ބަލައި މަދު ކަމަށްވެސް އޭނާ ވިދާޅުވިއެވެ.
މެންބަރު އިތުރަށް ވިދާޅުވީ މި މަސްތައް މަރުވާ ސަބަބު އަދި ސާފު ނުވާ ކަމަށާ، އެހެން ނަމަވެސް މި މައްސަލަ އީޕީއޭ އަށާއި އެންވަޔަމަންޓް މިނިސްޓްރީއަށް މިހާރު ރިޕޯޓް ކޮށްފައިވާނެ ކަމަށެވެ.
އަދި ލަފާ ކުރެވެނީ މަސްތައް މަރުވަނީ އޮކްސިޖަން މަދުވެގެން ކަމަށްވެސް އޭނާ ވިދާޅުވިއެވެ.
”ރަށުގެ ވަށައިގެން މަސްތައް އުޅެނީ. މަރުވެގެންވެސް އެކި ސަރަހައްދު ތަކަށް ލައްވެފައި ހުރި. ރަށު ވަށައިގެން ތޮށިޖަހާފައި އޮންނަނީ. އަދި މިދިޔަ ދުވަސް ކޮޅަކީ ވަރަށް ހޫނުވެސް ގަދަ ދުވަސްކޮޅެއް. އެއްފަހަރާ އެހާ ގިނަ މަސް ފަޅުގައި އުޅޭއިރު، އޮކްސިޖަން ލިބުމުގައި ދަތިތައް ކުރިމަތިވެގެން މަރުވަނީ ކަމަށްވެސް ބެލެވޭ“ ކައުންސިލް މެންބަރު ވިދާޅުވިއެވެ.
މީގެ ކުރިންވެސް ކެންދޫ ފަޅުތެރެއަށް ވަންނަ މަސް މަރުވެގެން ގޮޑު ދޮށަށް ލައްގާ މައްސަލަ ދޭތެރެއިން ފެންމަތިވާ ކަމަށް އެ ރަށު މީހުން ބުނެއެވެ.
Advertisement
This content is created and paid for by advertisers and does not involve Voice Journalists
