ޤަބުރުސްތާނު ކޮނެގެން ކަށިތައް ނަގާ އެހެންތަނަކަށް ބަދަލުކުރުމަކީ ވަޅުލެވިފައިވާ މައްޔިތާގެ ހުރުމަތް ކެނޑޭ ކަމެއް ކަމަށް ދިވެހިރާއްޖޭގެ އިސްލާމީ ފަތުވާދޭ އެންމެ މަތީ މަޖިލީހުން ބުނެފިއެވެ.
އިސްލާމްދީނުގައި މުސްލިމުންގެ ޤަބުރުސްތާނުތައް އުވާލުމުގެ ޙުކުމް ހާމަކޮށް ފަތުވާ މަޖިލީހުން މިއަދު އާންމުކުރި ފަތުވާގައި ބުނެފައިވަނީ، މިކަމަކީ އެތަކެއް ވަޢީދުގެ ބަސްފުޅުތައް ވާރިދުވެފައިވާ ކަމެއްކަމަށެވެ.
ފަތުވާ މަޖިލީހުން އާންމުކޮށްފައިވާ ފަތުވާގައި ބުނެފައިވާ ގޮތުގައި، މާތްالله ވަނީ އާދަމްގެފާނުގެ ދަރިފަސްކޮޅު އެކަލާނގެ އުފެއްދެވި ގިނަ މަޚުލޫޤުތަކުންގެ މައްޗަށް މާތްކުރައްވައި މަތިވެރި ކުރައްވާފައިވާ ކަމަށެވެ. އަދި މިމަތިވެރިކަމަކީ އިންސާނާ ދިރިހުރުމާ ގުޅިފައިވާކަމެއް ނޫންކަމަށާ އިންސާނާ މަރުވުމަށްފަހުވެސް މި އިޙުތިރާމު ދެމި އޮންނަ ކަމަށް ފަތުވާ މަޖިލީހުން ވަނީ ބުނެފަ އެވެ.
ދަލީލުތަކާއެކު ފަތުވާ މަޖިލީހުން މިއަދު އާންމު ކުރި ފަތުވާގައި ބުނެފައިވާ ގޮތުގައި، މިކަމަކީ ވަޢީދުގެ ބަސްފުޅުތައް ވާރިދުވެފައިވާ ކަމެއްކަމުން ކުޅިވަރުކުޅޭ ތަންތަނާއި، ހިތްފަސޭހަ މައިޒާންފަދަ ތަންތަން ހެދުމުގެ ބޭނުމުގައި ވަޅުލެވިފައިވާ މައްޔިތާގެ ހުރުމަތް ކެނޑޭ ގޮތަށް މުސްލިމުންގެ ޤަބުރުސްތާނުތައް އުވާލުން ނުވަތަ ނެގުން ހުއްދަނުވާނެ ކަމަށެވެ.
ފަތުވާ މަޖިލީހުން މިކަމާއި ގުޅިގެން ފަތުވާއެއް ނެރެފައިވާއިރު، މާލޭގެ ބައެއް ބޮޑެތި ސަހަރާތަކުގައި ވަޅުލާފައިވާ މީހުންގެ ކަށިތައް ނަގައި, ބިންތައް ސާފުކޮށް, ޕާކާއި ކުޅިވަރުކުޅޭ ތަންތަން ހެދުމުގެ މަސައްކަތް ކުރަމުން އަންނަކަން ފާހަގަކޮށްލަންޖެހޭ އެވެ.
އެގޮތުން މާފަންނު ސަހަރާ ހުސްކުރުމަށް ފަހު އެ ތަނުގައި ޕާކިން ޒޯނަކާއި ބާސްކެޓު ކޯޓް ހެދުމުގެ މަސައްކަތްކުރަމުން އަންނައިރު، ގަލޮޅު ސަހަރާގެ ބައެއް ހުސްކޮށްގެން ވެސް ޕަރކިންގ ޒޯނެއް ހެދުމުގެ ވެސް މަސައްކަތްކުރަމުން އަންނަކަން ފާހަގަކޮށްލަންޖެހެއެވެ.
Advertisement
This content is created and paid for by advertisers and does not involve Voice Journalists
