ރަސްމާދޫގައި މިހާރު ކުރިއަށްދާ "ރ.ވެޓަރަންސް ފުޓްސަލް މުބާރާތް 2025" ގެ ފައިނަލުގައި ހުޅުދުއްފާރާއި ރަސްމާދޫ ވާދަކުރި މެޗު 1-1 ގެ ނަތީޖާއަކުން އެއްވަރުވެ ނަތީޖާ ނެރުމަށްޖެހި ޕެނަލްޓީގައި 5-3 ގެ ނަތީޖާއަކުން މޮޅުވެ، ރަސްމާދޫ އިން މުބާރާތުގެ ޗެންޕިއަންކަން ހޯދައިފިއެވެ.

މުބާރާތުގެ ފައިނަލުން ރަސްމާދޫ ޖާގަހޯދީ ސެމީފައިނަލުގެ ފުރަތަމަ މެޗުގައި 3-0 ގެ ނަތީޖާއަކުން މީދޫ ބަލިކުރުމަށްފަހު އެވެ. އަދި ހުޅުދުއްފާރު ފައިނަލުން ޖާގަހޯދީ ސެމީފައިނަލުގެ ދެވަނަ މެޗުގައި 6-1 ގެ ތަފާތުބޮޑު ނަތީޖާއަކުން އިނގުރައިދޫ ބަލިކުރުމަށްފަހު އެެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގަައި ފުރަތަމަ ލަނޑުޖަހައި ކުރިހޯދީ ހުޅުދުއްފާރުންނެވެ. މިލަނޑު ފުރަތަމަ ހާފުގެ އަށްވަނަ މިނެޓުގައި ކާމިޔާބުކޮށްދިނީ އެޓީމުގެ އަހުމަދު ސުޖާއު އެވެެ.

ރަސްމާދޫ އިން މެޗުގެ ނަތީޖާ އެއްވަރުކުރި ލަނޑު ފަހުހާފު ފެށިގެން ދެވަނަ މިނެޓުގައި ކާމިޔާބުކޮށްދިނީ އެޓީމުގެ އަލީ ވިޝާމް އެވެ. އަދި މީގެ އިތުރުން ވެސް މިމެޗުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ.

ނަމަވެސް މެޗުގެ ފުރިހަމަ ވަގުތުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ. މިއާއެކު މެޗުގެ ނަތީޖާ ނެރުމަށްޖެހި ޕެނަލްޓީގައި ރަސްމާދޫގެ ފަސް ޕެނަލްޓީގެ ތެރެއިން ހަތަރު ޕެނަލްޓީ އެޓީމުން ކާމިޔާބުކުރިއިރު، ހުޅުދުއްފާރުން ޖެހި ހަތަރު ޕެނަލްޓީގެ ތެރެއިން އެޓީމަށް ކާމިޔާބުކުރެވުނީ ދެ ޕެނަލްޓީ އެވެ.

މިމުބާރާތުގެ ފެއާޕްލޭ ކުޅުންތެރިޔަކަށް ހޮވުނީ އަލީ ޝާފިއު (އިނގުރައިދޫ) އެވެ. އަދި ފެއާޕްލޭ ޓީމަކީ މީދޫ އެވެ. އަދި މުބާރާތުގެ އެންމެ މޮޅު ފަސް ކުޅުންތެރިންނަކީ އަބުދުލް މަންނާން އިބްރާހިމް (ހުޅުދުއްފާރު)، މުހައްމަދު ފަޒީމް (ރަސްމާދޫ)، އަހްމަދު ޝުޖާއު (ރަސްމާދޫ)، އަލީ ވިޝާމް (ހުޅުދުއްފާރު) އަދި ހަސަން ރާފިއު (ތަސްމާދޫ) އެވެ.

މީގެ އިތުރުން މުބާރާތުގެ އެންމެ މޮޅު ކޯޗަކަށް ރަސްމާދޫގެ ކޯޗު މުހައްމަދު ޒަމީރު ހޮވުނުއިރު، އެންމެ ގިނަ ލަނޑުޖެހި ކުޅުންތެރިޔަކީ އަބުދުލް މަންނާން އިބްރާހިމް (ހުޅުދުއްފާރު) އެވެ. އަދި މުބާރާތުގައި ކުޅުނު އެންމެ އުމުރުން ދޮށީ ކުޅުންތެރިޔަކަށް ހޮވުނީ އަބްދުލް ލަތީފު (ރަސްގެތީމު) އެވެ. މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ އަބުދުލް މަންނާން އިބްރާހިމް (ހުޅުދުއްފާރު) އެވެ.

1 ޖުލައި 2025 އިން 12 ޖުލައި 2025 ގެ ނިޔަލަށް ކުރިއަށް ގެންދާ މިމުބާރާތުގައި މިއަހަރު ޖުމްލަ ނުވަ ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންގޮސްފައި ވަނީ ބައިވެރިވި ނުވަ ޓީމު ދެގުރޫޕަކަށް ބަހާލައިގެންނެވެ. އަދި ގުރޫޕް ސްޓޭޖުގައި ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމަށް މުބާރާތުގެ ސެމީ ފައިނަލަށް ހޮވޭގޮތަށެވެ. 

މި މުބާރާތުގެ ގޯލްޑް ސްޕޮންސަރ އެެއްގެ ގޮތުގައި އެމްޕީ އިބްރާހިމް ފަލާހް ހިމެނިވަޑައިގަންނަވާއިރު، ބްރައުންޒް ސްޕޮންސަރ އަކަށް މާޅޮސްމަޑުލު އުތުރުބުރީ ކައުންސިލް އިދާރާ ވަނީ ހަމަޖައްސާފައެވެ. 

މީގެ އިތުރުން މުބާރާތުގެ މިނީ ސްޕޮންސަރުންގެ ގޮތުގައި، ފިޝިން ވޮލެޓް ހިމެނޭއިރު، މުބާރާތުގެ ސަޕޯޓް ސްޕޮންސަރުންނަކީ ދަ ބޫޓް ރޫމް، ހިލް މާރޓް ފުލަސް، ޓްރީ ހައުސް، އެލަންޒާ މޯލްޑިވްސް، އަހުރަ ޕްލަސް އަދި ލިންކް ސާރވް އެވެ. 

މުބާރާތުގެ ކިޓް އެންޑް ޕްރިންޓިންގ ޕާޓްނަރަކަށް އިރާ ގާމެންޓްސް ހަމަޖައްސާފައިވާއިރު، ޓްރޮފީ ޕާޓްނަރަކީ ލޭޔާ އެވެ. އަދި ޑިޖިޓަލް ޕާޓްނަރަކަށް ދިރާގު ހަމަޖައްސާފައިވާއިރު، މުބާރާތުގެ އޮފިޝަލް މީޑިޔާ ޕާޓްނަރަކީ ވޮއިސް ސްޕޯޓްސް އެވެ.

ފެއާ ޕްލޭ - ކުޅުންތެރިޔާ އަލީ ޝާފިއު 7 - އިނގުރައިދޫފެއާ ޕްލޭ ޓީމް - މީދޫ އެމްޖޭއެސްބެސްޓް 5އަބުދުލް މަންނާން އިބްރާހިމް 7 - އެޗްއެލްއެފްމުހައްމަދު ފަޒީމް 11 - އާރްއެސްސީ އަހްމަދު ޝުޖާއު 8 - އެޗްއެލްއެފްއަލީ ވިޝާމް 13 - އާރްއެސްސީހުސައިން ރާފިއު 1 - އާރްއެސްސީބީއީއެސްޓީ ކޯޗް:މުހައްމަދު ޒަމީރު އާރްއެސްސީޓޮޕް ސްކޯރާ:އަބްދުލް މަންނާން އިބްރާހިމް 7 - އެޗްއެލްއެފްއާރް. ލެގަސީ އެވޯޑް: އެންމެ ދުވަސްވީ ކުޅުންތެރިޔާ އަބުދުލް ލަތީފް - 3 ރަސްގަތީމުރު. ލެޖެންޑް: އެންމެ މޮޅު ކުޅުންތެރިޔާ އަބުދުލް މަންނާން އިބްރާހިމް 7 - އެޗްއެލްއެފް