އއ. މާޅޮހުގައި، ނިދާފައި އޮތް އުމުރުން ދޮށީ މީހަކު ޒަޚަމްތަކާއެކު މަރުވެފައި އޮއްވާ ފެނުނު މައްސަލައާއި ގުޅިގެން އެރަށަށް އަރާ ފައިބާ މީހުން މޮނީޓާ ކުރަން ފަށައިފިއެވެ.
ފުލުހުން ބުނީ، އއ. މާޅޮހުގެ ގެއެއްގައި ނިދާފައި އޮތް އުމުރުން ދޮށީ މީހަކަށް ބޮޑެތި އަނިޔާތަކެއް ދީ ޒަޚަމްކޮށްލާފައިވާ ކަމަށް ރޭ ދަންވަރު 01:50 ކަންހާއިރު ރިޕޯޓް ކޮށްފައިވާ ކަމަށެވެ.
އަދި އެ މީހާ މާޅޮހު ސިއްހީ މަރުކަޒަށް ގެންގޮސް ފަރުވާ ދެމުންދަނިކޮށް ފަތިހުގެ ވަގުތެއްގައި ނިޔާވެފައިވާ ކަމަށްވެސް ބުންޏެވެ.
މި ހާދިސާގައި މަރުވެފައިވަނީ އއ. މާޅޮސް / އޯކިޑްމާގެ، ޢަބްދުއްރަޙްމާން އާދަމް (65އ) އެވެ.
ފުލުހުން ދާދި ދެންމެ އަކު ބުނީ، މި މައްސަލަ ތަހުގީގު ކުރުމަށްޓަކައި މާލެއިން ތަހުގީގީ ޓީމެއް މިހާރު އެ ރަށުގައި ހަރަކާތްތެރިވަމުންދާ ކަމަށެވެ.
އަދި މައްސަލައާ ގުޅިގެން މާޅޮހަށް އަރާ ފައިބާ މީހުން މޮނީޓާ ކުރަމުންދާ ކަމަށްވެސް ބުންޏެވެ.
މާޅޮހުން ”ވޮއިސް“ އަށް މައުލޫމާތު ދިން މީހަކު ބުނެފައިވާގޮތުން، ޒަޚަމްކޮށްލައިގެން މަރާލި މީހާ ދިރިއުޅުނު ގޭގައި އެމީހާގެ އިތުރުން އޭނާގެ އަނބިމީހާވެސް ދިރިއުޅެއެވެ.
ނަމަވެސް ރޭ އަނބިމީހާ އާއި ދެމީހުން ނިދީ ދެ ކޮޓަރިއެއްގައި ކަމަށް މައުލޫމާތު ލިބެއެވެ. އަދި އަނބި މީހާއަށް ހޭލުވުނީ މީހަކު ދުވެ ފިލާ އަޑަށް ކަމަށާ، އިވިގެން ފިރިމީހާގެ ކޮޓަރި ބެލިއިރު ފިރިމީހާ ޒަޚަމްކޮށްލާފައި އޮތުމުން ފުލުހަށް ރިޕޯޓް ކުރީ އަނބިމީހާ ކަމަށް މައުލޫމާތު ލިބެއެވެ.
Advertisement
This content is created and paid for by advertisers and does not involve Voice Journalists
