ހިޖާމާ ޖަހައިގެން ބަރުދަން ލުއި ކުރެވޭނެ ކަމަށްބުނެ ބެޓު ކުރުން ވާނީ ޖުވާއަށް ކަމަށާ އެއީ ހުއްދަ ކަމެއް ނޫން ކަމަށް ދީނީ ޢިލްމުވެރިޔާ އައްޝެއިޚް އިސްމާައިލް ރިޔާޟް ވިދާޅުވެއްޖެއެވެ. 

ހިޖާމާ ޖަހައިގެން ބަރުދަނުން އެއް ކިލޯ ލުއި ކޮށްދޭނެ ކަމަށާ، ލުއި ނުވެއްޖެ ނަމަ، ހިޖާމާ ޖެހުމަށް ދައްކާ 500ރުފިޔާގެ އިތުރުން 1000 ރުފިޔާ އަނބުރާ ދޭނެ ކަމަށް ބުނެ، ފަޒީލާ އުސްމާން ވަނީ މީސް މީޑިއާގައި ޕޯސްޓެއް ކޮށްފައެވެ. 

އެކަމާއި ގުޅިގެން، ޑޮކްޓަރުންނާއި ޖިމް އިންސްޓްރަކްޓަރުންވެސް ކަންބޮޑުވުން ފާޅުކޮށްފައިވާއިރު، ހެލްތު މިނިސްޓްރީން ވަނީ އެ މައްސަލަ ބަލަމުންދާ ކަމަށްވެސް ބުނެފައެވެ. 

ފަޒީލާގެ ހުށަހެޅުމަކީ ބެޓަކަށް ވާއިރު، އެއީ ޖުވާ ކަމާމެދު އާއްމުންގެ މެދުގައި ޝައްކުތައް ވަނީ އުފެދިފައެވެ. އެކަމާއި ގުޅިގެން، މިކަމުގެ ޙުކުމް ހާމަކުރައްވައި، ޝެއިޚް ރިޔާޟް ވަނީ ވަރަށް ތަފްސީލީ ޖަވާބެއް ދެއްވާފައެވެ. 

ޖަމިއްޔަތުލް ބުންޔާންގެ ފޭސްބުކު ޕޭޖުގައި ޝެއިޚްގެ ޖަވާބު ހިއްސާ ކޮށްފައިވާއިރު، އޭގައި ޝެއިޚް ވިދާޅުވީ، އެ ބެޓަށް ޖުވާގެ ތަޢުރީފް ފެތޭތޯ އާއި، އޭގައި ޖުވާ އެކުލެވޭތޯ ބލަައި ތަހުލީލު ކުރާއިރު ތިން ސުވާލަކަށް ޖަވާބުދޭންޖެހޭ ކަމަށެވެ. 

އެއީ،

1) އެ ބެޓުގައި ވުމާއި ނުވުމުގެ އިހްތިމާލު އޮވޭތޯ؟

އެ ބެޓު ކުރި ގޮތަށް ހިޖާމާގެ އެއް ސެޝަނުން މީހާ ހިކުމާއި ނުހިކުމުގެ އިހްތިމާލު އޮންނާތީ މިއީ ވުމާއި ނުވުމުގެ އިހްތިމާލު އޮތް މައްސަލައެއްކަން ޝެއިޚް ފާހަގަކުރެއްވިއެވެ. 

2) ބަލިވާ މީހަކާއި މޮޅުވާ މީހަކު އޮވޭތޯ؟

މި ބެޓުގައި ބައިވެރި ވަނީ ހިޖާމާ ޖަހަން އަންނަ މީހާއާއި ހިޖާމާ ޖަހައިދޭ މީހާކަން ފާހަގަކުރައްވައި ޝެއިޚް ވިދާޅުވީ، ބެޓުކުރި ގޮތަށް ދިމާވި މީހަކީ މޮޅުވި މީހާއަށްވާއިރު، ދިމާނުވި މީހާއަކީ ދަށްވި މީހާ ކަމަށެވެ.

”ހިޖާމާ ޖަހަން އަންނަ މީހާ 500 ރުފިޔާ ދައްކަނީ މަދުވެގެން އެއް ކިލޯ ލުއި ކުރަން. އެ ބެޓުގެ ތެރެއަށް ވަދެގެން. ހިޖާމާ ޖަހައިދޭ މީހާ 1000 ރުފިޔާ ބައިވެރި އެބަ ކުރޭ. ކޮށްފައި މި ބުނަނީ، ތިމަންނަ ހިޖާމާ ޖަހައިދިނީމާ މަދުވެގެން އެއް ކިލޯ ލުއި ނުވެއްޖެއްޔާ، 1000 ރުފިޔާ ދޭނަމޭ. ފާޑެއްގެ ވާދަކުރުމެއް/ބެޓު ކުރުމެއް މި އަންނަނީ. މޮޅުވާ މީހަކާ ބަކިވާ މީހަކު އެބަ އޮވޭ“ ޝެއިޚް ވިދާޅުވިއެވެ. 

3) ބަލިވާ މީހާ މޮޅުވާ މީހާއަށް މުދަލެއް ދޭން ޖެހޭތޯ؟

ޝެއިޚް ވިދާޅުވީ، އާއްމު އުސޫލުން ހިޖާމާ ޖެހުމަށް 500 ރުފިޔާ ނެގުމާއި، އެ ހާލަތުގައި 500 ރުފިޔާ ނެގުމާއި ތަފާތު ކަމަށެވެ. ސަބަބެއް ކަމުގައި ޝެއިޚް ވިދާޅުވީ، އެ ހާލަތުގައި ލުއިވާނެ ކަމަށްބުނެ ބުނެ ބެޓް ކުރެވޭތީ ކަމަށެވެ. 

”އެހެންވީމާ ހިޖާމާ ޖަހަންދާ މީހާ އެ ދައްކާ 500 ރުފިޔާ އަކީ ހަމައެކަނި މަސައްކަތަށް ދިން 500 ރުފިޔާއެކޭ މި ހާލަތުގައި ބުނެވޭކަށް ނެތް. އެ 500 ރުފިޔާ މި ދިނީ ކިލޯއެއް ލުއި ކުރުމަށް ކޮށްފައިވާ ބެޓުގެ ތެރެއަށް ވަންނަން. އެހެންވީމާ ކޮންމެ ފަރާތަކުންވެސް، އޭނާ ބަލިވިއްޔާ މޮޅުވި މީހާއަށް މުދަލެއް ދޭން އެބަ އެއްބަސްވޭ. ވަޢުދުވޭ. ޝަރުތުކޮށްގެން މި ވަންނަނީ“ ޝެއިޚް ވިދާޅުވިއެވެ.

ކަންމިހެން ހުރުމުން، ”އެއްކިލޯ ލުއިވާނެ ކަމަށްބުނެ، ފައިސާ ބަހައްޓައިގެން، ބެޓު ކޮށްގެން ހިޖާމާ ޖެހުން ވާނީ ޖުވާ ކުޅުމަށް“ ކަމަށާ، އެއީ ”ހުއްދަ ކަމެއް ނޫން“ ކަމަށް ޝެއިޚް ވިދާޅުވިއެވެ.