އަބްދުއްރަހްމާންގެ ހަށިގަނޑު މާލެ ގެނެސްފި
އއ. މާޅޮހުގައި އަނިޔާވެރި ހަމަލާތަކެއްދީގެން މަރުވި އަބްދުއްރަހްމާން އާދަމްގެ ހަށިގަނޑު ގެނެސްފިއެވެ.
މާޅޮހު އޯކިޑްމާގޭ އުމުރުން 65 އަހަރުގެ އަބްދުއްރަހްމާނުގެ ހަށިގަނޑު، ހަވީރުގެ ވަގުތެއްގައި މާލެ ގެނެސްފައިވާއިރު، އޭނާގެ ހަށިގަނޑު މާލެ ގެނެސްފައިވަނީ އޮޓޮޕްސީ ހެދުމަށް އިންޑިއާއަށް ގެންދިއުމަށެވެ. އަބްދުއްރަހްމާނުގެ ހަށިގަނޑު ގެނައި ލޯންޗުން އާއިލާގެ ބައެއް މެމްބަރުންވެސް ވަނީ މާލެ އައިސްފައެވެ.
އަބްދުއްރަހްމާން މަރުވެފައިވަނީ ބޮލަށް ލިބުނު ބޮޑެތި ޒަހަމްތަކަކާ ގުޅިގެން ރޭ ފަތިހުގެ ވަގުތެއްގައެވެ. އޭނާއަށް އަނިޔާތަކެއް ދިންކަން އެނގުނީ މެންދަމުގެ ދޭއް ޖަހާ އެހާކަންހާއިރު އޭނާގެ އަންހެނުންނަށެވެ. ޢަބްދުއްރަހްމާނަށް ހަމަލާދިން ރޭ އޭނާ ނިދަން އޮތީ އެހެން ކޮޓަރިއެއްގައިކަމަށް އެރަށުގެ ބައެއް މީހުން ބުނެއެވެ. އޭނާއަށް ހަމަލާދިންއިރު އަންހެނުން ނާޒިމާ އިބްރާހިމް އޮތީ ނިދާފައެވެ.
މިހާތަނަށް މައުލޫމާތު ލިބިފައިވާ ގޮތުގައި އެ ރޭ ދެމަފިރިން ނިދީ ވަކިންނެވެ. އަނބި މީހާއަށް ހޭލުވުނީ މީހަކު ދުވެ ފިލާ އަޑަށް ކަމަށާއި ފިރިމީހާ ނިދާފައިއޮތް ކޮޓަރި ބެލުމުން އޭނާއަށް ބޮޑެތި ޒަހަމްތަކެއްދީފައިވާއިރު، އެހިސާބުން ފުލުހުންނަށް ރިޕޯޓްކުރިކަމަށް މާޅޮހުން ވޮއިސްއަށް މައުލޫމާތުދި މީހާ ބުންޏެވެ.
ފުލުހުން ވަނީ އެގެއަށް އާއްމުނަށް ނުވަދެވޭނޭހެން ބަންދުކޮށްފައެވެ. މާޅޮހަށް އަރައި ފައިބާ މީހުންގެ މައުލޫމާތު ސާފްކުރަމުންދާއިރު، ފުލުހުން ދަނީ މި މައްސަލަ ތަހްގީގުކުރަމުންނެވެ.
Advertisement
This content is created and paid for by advertisers and does not involve Voice Journalists
