މިހާރު ކުރިއަށްދާ 34 ވަނަ ޤައުމީ ކެރަމް މުބާރާތުގެ ފުރަތަމަ ޑިވިޝަނުގެ އަންހެން ސިންގަލްސް އިވެންޓްގެ ޗެންޕިއަންކަން ހަތްވަނަ ފަހަރަށް ކާމިޔާބުކޮށް، އާމިނަތު ވިދާދް ތާރީޚީ ރެކޯޑެއް ޤާއިމުކޮށްފިއެވެ.
ޤައުމީ ކެރަމް މުބާރާތުގެ ފިރިހެން ސިންގަލްސް ޗެންޕިއަންކަން ހުސައިން ނީޝަމް އާއި ހަސަން ނާޒިމް އަދި އަންހެން ސިންގަލްސް ޗެންޕިއަންކަ ވިދާދްގެ އިތުރުން ޝަޒްނާ މިއިން ކޮންމެ ކުޅުންތެރިޔަކު ވަނީ ޤައުމީ ކެރަމް މުބާރާތުގެ ސިންގަލްސް ޗެންޕިއަންކަން ހަ ފަހަރު ކާމިޔާބުކޮށްފައެވެ.
މީގެ ކުރިން ވިދާދް ވަނީ ޤައުމީ ސިންގަލްސް ޗެންޕިއަންކަން، 2017، 2018، 2019، 2021، 2022 އަދި 2024 ވަނަ އަހަރު ހޯދާފައެވެ. އަދި ފާއިތުވެދިޔަ ނުވަ އަހަރުތެރޭގައި ޤައުމީ ކެރަމް މުބާރާތުގެ އަންހެން ސިންގަލްސް ފައިނަލުގައި އަށް ފަހަރު ވާދަކޮށްފައިވާއިރު، އޭގެ ތެރެއިން ވިދާދް ބަލިވީ 2023 ވަނަ އަހަރުގެ ފައިނަލުގައި އެކަންޏެވެ. އެފަހަރު ވިދާދް ބަލިކޮށް ޗެންޕިއަންކަން ހޯދީ އާމިނަތު ވިޝާމާ އެވެ.
ހުޅުމާލޭ ސްޕޯޓްސް ކޮމްޕްލެކްސްގައި ހުންނަ ކެރަމް އެރީނާގައި މިއަދު ހަވީރު ކުޅުނު އަންހެން ސިންގަލްސް ފައިނަލް މެޗު ވިދާދް ކާމިޔާބުކުރީ ފަހަތުންއަރައި، 2-1 ގެ ނަތީޖާއަކުން އައިޝަތު ނަހުފާ ބަލިކުރުމަށްފަހު އެވެ.
ދެކުޅުންތެރިންގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަމަ ސެޓުގައި 24-17 ގެ ނަތީޖާއަކުން ކާމިޔާބުކުރީ ނަހުފާ އެވެ. ނަމަވެސް ޖެހިގެން އައި ދެވަނަ ސެޓް 21-11 ގެ ނަތީޖާއަކުން ކާމިޔާބުކޮށް ވިދާދް ވަނީ މެޗުގެ ނަތީޖާ އެއްވަރުކޮށްފައެވެ. އަދި މެޗުގެ ނަތީޖާ ނެރުމަށް ކުޅުނު ތިންވަނަ ސެޓް ފަސޭހަކަމާއެކު 8-25 ގެ ނަތީޖާއަކުން ކާމިޔާބުކޮށް 2-1 ގެ ނަތީޖާއަކުން މޮޅުވެ ވިދާދް ވަނީ ޗެންޕިއަންކަން ދިފާއުކޮށްފައެވެ.
މީގެ އިތުރުން ވިދާދު އަދި ނަހުފާ ވަނީ މިމުބާރާތުގެ އަންހެން ޓީމު އިވެންޓުގެ ޗެންޕިއަންކަން ކުޑަ ހެންވޭރު ޔުނައިޓެޑަށް ހޯދައިދީފައެވެ. ނަމަވެސް މިދެ ކުޅުންތެރިންގެ ޕެއާ ވަނީ އަންހެން ޑަބަލްސް ފައިނަލުގައި ބަލިވެފައެވެ.
Advertisement
This content is created and paid for by advertisers and does not involve Voice Journalists
