އަލްސަންގެ ކުއްލި ވަކިވުން: ބޮޑުބޭބެގެ ތަފާތު ޝުއޫރެއް، ކެތްތެރިވުމުގެ ނަމޫނާއެއް
މިރޭ ހިނގި ނުރައްކާތެެރި އެކްސިޑެންޓެއްގައި ހ. ވަވޮއި، އުމުރުން 17 އަހަރުގެ ޔޫސުފް އަލްސަން މުހައްމަދު (އަލް) ނިޔާވިއިރު އޭނާގެ ލޯބިވާ ބޮޑުބޭބެ މޫސާ ޝިފާއު (އާއުބެ) ހުރީ ދައުވަތާއި ގުޅުންހުރި ފޯރަމަކަށް މެލޭޝިޔާގަ އެވެ.
އަލްސަންގެ ކުއްލި ވަކިވުމާއެކު ހިތަށް ލިބިފައިވާ ހިތާމަ ބަޔާންކޮށް ޝިފާއު ވަނީ ޕޯސްޓެއް ކޮށްފަ އެވެ. އަލްސަންގެ ޖަނާޒާއާ ގުޅޭގޮތުން ވޮއިސް އިން ގެނެސްދިން ހަބަރެއް ޝެއާކޮށް ޝިފާއު ކުރި ޕޯސްޓްގައި ބުނީ ދުނިޔޭގެ ކޮންމެ މީހަކަށް ވެސް ލިޔުއްވާފައިވާ މަރު ލޮބުވެތި އަލްސަން ކޮއްކޮއާ ބައްދަލުކުރި ކަމުގެ ހަބަރު ލިބުމުން ސިހުންވެ ހުއްޓުނު ކަމަށެވެ.
“… އެކަމަކު ހިތަށް އެރި، ދެން ދުނިޔޭގެ މުސީބާތެއް ހިތްދަތި ކަމެއް ތަކުލީފެއް ހިތްދަތި ކަމެެއް އިތުރަކަށް ނެތް. މި ދުނިޔެ އަކީ މި ބުނި ކަންކަމުން ފުރިގެންވާ ތަނެއް. އެކަމުގެ ފިތުނަތަކުން ނިމުން އައިސް މާތްﷲއާ ބައްދަލު ކުރުމުގެ ޖެހުނީ…،” ހިތާމައިގެ މިވަގުތު ކެތްތެރިކަން އިސްކޮށް އަލްސަންގެ ބޮޑުބޭބެ ލިޔެފައިވެ އެވެ.
ޝިފާއު ވަނީ އޭނާގެ ލޯބިވާ ދަރިއެއްފަދަ ކޮއްކޮގެ ފުރާނައަށް ހެޔޮ ރަހްމަތް ލައްވާ އޯގާތެރި ބެއްލެވުމަކުން ބައްލަވާ ސުވަރުގެ ވެއްދެވުން އެދި ދުއާ ކޮށްފަ އެވެ. އަދި ކެތްތެރިކަން ދެއްވުން އެދިވެސް ދުއާކޮށްފައިވެ އެވެ.
ދައުވަތުގެ މައިދާނުގައި މިއަދު ފާހަގަކޮށްލެވޭ ޝިފާއު އަކީ އަލްސަންގެ މަންމަ، އަޝްފާގެ އެއްބަނޑު އެއްބަފާ ކޮއްކޮ އެވެ.
އަލްސަން ނިޔާވީ އޭނާ އިން ސައިކަލުން މަގު ހުރަސްކުރި މީހެއްގެ ގައިގައި ޖެހި ހިނގި ނުރައްކާތެރި އެކްސިޑެންޓެއްގަ އެވެ. މާލޭގެ ބޮޑުތަކުރުފާނު، މާފަންނު ބަސް ޓާމިނަލް ކައިރީ ހިނގި އެކްސިޑެންޓްގައި އަލްސަން ނިޔާވެ އިތުރު ދެ މީހަކަށް ވަރަށް އަނިޔާވި އެވެ.
ބާރު ސްޕީޑްގައި އައި ސައިކަލު ޖެހުނީ އެ ވަގުތު ކަހިފި ހުރަހަކުން މަގު ހުރަސް ކުރި އުމުރުން 40 އަހަރުގެ މީހެއްގެ ގައިގަ އެވެ. އޭނާ އަކީ މަގުމަތީ ކަސްރަތަށް ދުވަން އުޅުނު މީހެކެވެ.
ސައިކަލުން ޖެހުނީ ބާރު ސްޕީޑްގައި ދުއްވާފައި އައި ސައިކަލުން ނެއްޓެން އެ މީހާ ބާރަށް ކުރިއަށް ދުއްވައިގަތުމުންނެވެ.
އަލްސަން އަކީ މަޝްހޫރު ލަވަކިޔުންތެރިން ކަމުގައިވާ މުހައްމަދު އަބްދުލްޣަނީ (ތޭރަ) އާއި މަރިޔަމް އަޝްފާގެ ދަރިފުޅެވެ. އަލްސަން ގެ އާއިލާ އިން ވަނީ އޭނާގެ ޖަނާޒާ މާދަމާ އަސުރު ނަމާދަށް ފަހު ބޭއްވުމަށް ނިންމާފަ އެވެ. ޖަނާޒާ އޮންނާނީ މާފަންނު އާސަހަރާގަ އެވެ.
Advertisement
This content is created and paid for by advertisers and does not involve Voice Journalists
