މާފަންނު ބަސް ޓާމިނަލް ކައިރީ ބޮޑުތަކުރުފާނުމަގުގައި ރޭ ހިނގި ނުރައްކާތެރި އެކްސިޑެންޓްގައި އަނިޔާވި 40 އަހަރުގެ މީހާއަށް އައިޖީއެމްއެޗްގައި ވެންޓިލޭޓަރަށް ލައިގެން ފަރުވާދޭން ފަށައިފިއެވެ.

މިކަން އައިޖީއެމްއެޗުން މީޑިއާއަށް ކަށަވަރުކޮށްދީފައިވާއިރު، އެމީހާއަށް ވަނީ ސީރިއަސްަ އަނިޔާތަކެއް ލިބިފައެވެ. އެގޮތުން އެމީހާގެ ސިކުނޑިއަށް ލޭ އެޅުމުގެ އިތުރުންވެސް ޒަހަމްތައް ވަނީ ލިބިފައެވެ. އޭނާ ސައިކަލްގައި ޖެހުނީ ކަސްރަތަށް ދުވަން ނިކުމެ، މަގުހުރަސްކުރަން އުޅުނު ގަޑީގައެވެ. އެކްސިޑެންޓްގައި ސައިކަލުގައި އިން ދެ ޒުވާނުންގެ ތެރެއިން އެކަކު ނިޔާވެފައިވާއިރު، އަނެއް ޒުވާނާއަށް ވޯޑުގައި ބާއްވައިގެން ދަނީ ފަރުވާދެމުންނެވެ. އެ ޒުވާނާގެ ހާލުވެސް ސީރިއަސްއެވެ.

ރޭ މި އެކްސިޑެންޓް ހިނގާފައިވަނީ ދުވަން ނިކުމެ އުޅުނު މީހަކު ކުއްލިއަކަށް މަގުހުރަސްކުރަން އުޅުމުގެ ތެރޭގައި ސައިކަލެއްގައި ޖެހިގެންނެވެ. ސައިކަލް ވެއްޓުމާއެކު ޖެހިގެންއޮތް ލޭނަށް ކަހާލައިގެން ދިޔަވަގުތު ވަނީ ޕިކަޕެއްގައިވެސް ޖެހިފައެވެ. ޕިކަޕް ވަގުތުން ކޮންޓްރޯލްކުރި ނަމަވެސް ސައިކަލް އޮތީ ޕިކަޕްގެ ދަށުގައެވެ. 

ރޭ 8:00 ހާއިރު ހިނގި އެ އެކްސިޑެންޓުގައި ނިޔާވީ ސައިކަލު ދުއްވަން އިން 17 އަހަރުގެ ޔޫސުފް އަލްސަން މުހައްމަދެވެ. އޭނާ އަކީ ލަވަކިޔުންތެރިޔާ މަރިޔަމް އަޝްފާ އާއި މުހައްމަދު އަބްދުލް ޣަނީ (ތޭރަވާ)ގެ ހަމަ އެކަނި ދަރިފުޅެވެ.

ފުލުހުން ދަނީ އެކްސިޑެންޓް ތަހްގީގްކުރަމުންނެވެ. ނިޔާވި ޔޫސުފް އަލްސަން މުހައްމަދު (އަލް) ގެ ޖަނާޒާ، އަސުރު ނަމާދަށް ފަހު ބޭއްވުމަށް ވަނީ ނިންމާފަ އެވެ.