އިންޑިއާގެ އެންމެ ބޮޑު ބޭސް ކުންފުނި ކަމަށްވާ ސަން ފާމާ އިން އިސްތަށި ފޭބުމުގެ މައްސަލަ ހައްލު ކުރުމަށް ހާއްސަކޮށް އުފައްދާފައިވާ ބޭސް 'ލެއްސެލްވީ' އެމެރިކާގެ ބާޒާރަށް ތަޢާރަފުކޮށް ވިއްކަންފަށައިފިއެވެ.

މި ބޭސް ތަޢާރަފުކޮށްފައިވަނީ ހޯމަ ދުވަހުއެވެ.

ސަން ފާމާ އިން ބުނި ގޮތުގައި، އިސްތަށި ފޭބުމުގެ މައްސަލަ ކުރިމަތިވާ ބައްޔެއް ކަމަށްވާ 'އެލޮޕީޝިއާ އޭރިއާޓާ' އަށް ހާއްސަ 8 މިލިގްރާމްގެ 'ލެއްސެލްވީ' ގުޅަބޭސް މިހާރު އެމެރިކާއިން ލިބެން ހުންނާނެއެވެ.

މި ބޭސް އެމެރިކާއަށް ތަޢާރަފް ކުރުން ލަސްވީ ބޭހާއި ގުޅޭ ގޮތުން ޝައްކުތަކެއް ހުރި ކަމަށްބުނެ އެމެރިކާގެ ކޯޓެއްގައި ކުރިއަށް ގެންދިޔަ މައްސަލައެއްގެ ސަބަބުން ކަމަށް އެ ކުންފުނިން ބުނެފައިވެއެވެ.

ނުވާމާ އިންސްޓިޓިއުޝަނަލް އިކުއިޓީޒްގެ އެނަލިސްޓް ޝްރީކާންތު އަކޯލްކަރު ބުނެފައިވާ ގޮތުން، 2030 ވަނަ އަހަރުގެ ނިޔަލަށް މި ބޭހުން 400 މިލިއަން ޑޮލަރުގެ އާމްދަނީއެއް ލިބުމުގެ ފުރުސަތު އެބައޮތް ކަމަށެވެ. އަދި އެންމެ ގިނަ އާމްދަނީ ލިބޭނެ ދުވަސްވަރު 900 މިލިއަން ޑޮލަރާ ހަމައަށްވެސް އަރާނެ ކަމަށް ބުނެފައިވެއެވެ.

"މި ބޭހުގެ ކްލިނިކަލް ޑޭޓާތައް ވަރަށް ރަނގަޅު، އަދި މި ބޭސް ތަޢާރަފުވުމާއެކު ސަން ފާމާގެ ކޮމާޝަލް ޕޯޓްފޯލިއޯ އިތުރަށް ފުޅާވެގެންދާނެ،" ޝްރީކާންތު އަކޯލްކަރު ބުންޏެވެ. 

ސަން ފާމާ އިން ބުނި ގޮތުގައި، އެ ކުންފުނީގެ ޑާމަޓޮލޮޖީ (ހަމުގެ ބަލިތަކަށް ހާއްސަ) ޕޯޓްފޯލިއޯއަށް މި ބޭސް އިތުރުވުމަކީ ވަރަށް މުހިންމު މަރުހަލާއެކެވެ.

އެ ކުންފުނިން މިހާރު ހާއްސަ ސަމާލުކަމެއް ދެމުން އަންނަނީ އާ ތެރަޕީ އޭރިއާތަކަށެވެ.

'އެލޮޕީޝިއާ އޭރިއާޓާ' އަކީ އޮޓޯއިމިއުން ބައްޔެކެވެ. މި ބަލީގެ ސަބަބުން ބޮލާއި ހަށިގަނޑުގެ އެހެން ތަންތަނުންވެސް އިސްތަށި ފޭބުން ކުރިމަތިވެއެވެ. މި ބޭސް ތަޢާރަފުވުމާއެކު، އިސްތަށި ފޭބުމުގެ މައްސަލަ ދިމާވެފައިވާ އެމެރިކާގެ ގިނަ ބަޔަކަށް ފަރުވާއެއް ލިބިގެންދާނެކަމަށް އެކުންފުނިން ފާހަގަކުރެއެވެ.