ވެރިކަމާ ހަވާލުވެވަޑައިގެންނެވި އިރު އައު ޓާމިނަލްގެ އެތެރޭގެ މުހިންމު ބައެއް މަސައްކަތްތައް ކުރަން އެއްވެސް ފަރާތަކާ ހަވާލުވެސް ނުކޮށް ހުރި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް އޮފީހުން މިއަދު ގެނެސްދިން ”ރައްޔިތުންނާއެކު“ ޕޮޑްކާސްޓްގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ،
ރައީސް ޑރ. މުއިއްޒު ވިދާޅުވީ، އިންތިޤާލީ މަރުޙަލާގައި އެންމެ ފުރަތަމަވެސް ވަޑައިގެންނެވީ ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢު ހިނގަމުންދާ ގޮތް ބައްލަވައިލެއްވުމަށްކަމަށާ، އެދުވަހު ދެއްވި ބަސްދީގަތުމުގައިވެސް ވިދާޅުވި ފަދައިން، އައު ޓަރމިނަލްގެ މަޝްރޫޢު ނިންމައި، އޮޕަރޭޝަން ފެށުމަކީ މި ސަރުކާރުން އެންމެ އިސްކަންދޭ މަޝްރޫޢުކަމަށެވެ.
އަދި އެ މަޝްރޫޢު ނިންމުމަށް މީގެ ކުރިން މަސައްކަތް ކުރައްވަމުން ގެންދެވީ މިދިޔަ އަހަރުގެ އޮކްޓޫބަރު މަހަށް ކަމަށާ، ނަމަވެސް، އެކި ގޮންޖެހުންތަކާ ހެދި އެ ތާރީޚަށް ނުނިމުނު ކަމަށް ރައީސް ވިދާޅުވިއެވެ. އެހެންކަމުން، މިހާރު މި ޓާމިނަލް މިނިވަން ދުވަހަށް ނިންމުމަށް މަސައްކަތް ކުރަމުންދާ ކަމަށް އެމަނިކުފާނު ވިދާޅުވިއެވެ.
”އަޅުގަނޑަށް އެނގޭނީ (ޓްރާންސިޝަން މަރުހަލާގައި) އަޅުގަނޑު އެތަނަށް ދިޔައިރު އެތަން އޮތްގޮތް. އިމާރާތުގެ ސްޓްރަކްޗާ ބޭރުން ނިންމާފައި ހުރި.. އެކަމަކު އެތެރޭގެ ގިނަކަންކަން އަދި ހުރީ ކުރަންވެފައި. ޓާމިނަލް އޮޕަރޭޝަނަލް ވަންޏާ ކުރަންޖެހޭ ކިތަންމެ ކަމެއް އެބަހުރި. އެ ޕްރޮޖެކްޓްގެ ސްކޯޕްގެ ތެރެއިން އެއްވެސް ފަރާތަކާ ހަވާލު ނުކުރާ އެތައްކަމެއްވެސް ހުރި“
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު
މިގޮތުން ރައީސް ފާހަގަކުރެއްވީ، އެއަރޕޯޓް ޓާމިނަލް ބޭނުންހިފުމަށްޓަކައި އެންމެ މުހިންމު ”ހެޑް އޮފް ސްޓޭންޑް މަގު“ (މައިބަދަ) އެވެ. ރައީސް ވިދާޅުވީ ވެރިކަމާ ހަވާލުވިއިރު، އެ މަގު ހެދުމަށްޓަކައި ބަޔަކާ ހަވާލުކޮށްފައެއް ނެތް ކަމަށެވެ. އަދި މި މަގު ހެދުމަށް ހަވާލުކުރީވެސް މި ސަރުކާރުން ކަމަށް އެމަނިކުފާނު ވިދާޅުވިއެވެ.
މީގެ އިތުރުން ޓާމިނަލްގައި ޑިއުޓީ ފްރީއާއި ކޮމާޝަލް ސަރަހައްދުތައް ތަރައްޤީ ކުރުމަށް ވެސް އެއްވެސް ފަރާތަކާ ހަވާލުކޮށްފައި ނެތް ކަމަށް ރައީސް ވިދާޅުވިއެވެ.
”ހަމަ ސިމެންތި ފިނިޝިންއެއްގައި މަތިވެސް އަރިމަތިވެސް ބިންމަތިވެސް ހުރިހާ ތަނެއްވެސް ހަމަ ދޫކޮށްލާ ގޮތަށް އޮތީ އެއްވެސް ކަމެއް ނެތޭ އެތާ ހަވާލުކޮށްފަ،“
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު
ރައީސް ޑރ. މުއިއްޒު އިތުރަށް ވިދާޅުވީ، ކުރީގެ ރައީސް ޔާމީނާއި، އިބްރާހިމް މުޙައްމަދު ޞާލިހުގެ ވެރިކަމުގައިވެސް އައު ޓާމިނަލްގެ މަސައްކަތްތައް ކޮށްފައިވާ ކަމަށެވެ.
އެހެންނަމަވެސް، އެމަނިކުފާނާ ވެރިކަން ހަވާލުވިއިރު ޓާމިނަލް މަޝްރޫޢުގެ ނިމިފައި އޮތީ ގާތްގަނޑަކަށް 54% ނުވަތަ 57% މަސައްކަތް ކަމަށާ، އޭގެ ތެރޭގައިވެސް މަގު ހެދުމާއި ޑިއުޓީ ފްރީ ސަރަހައްދުތައް ނުހިމެނޭ ކަމަށް ވިދާޅުވިއެވެ.
ރައީސް ވިދާޅުވީ ޑިއުޓީ ފްރީ ސަރަހައްދު ހަވާލުކޮށްފައިވާ ފަރާތުން ޖުލައި މަހު ޓާމިނަލް ހުޅުވާއިރު ބޭނުންވާ މިންވަރަށް ނިންމާނެ ކަމަށާއި، އަދި ސެޕްޓެންބަރުގެ ނިޔަލަށް އެ މަސައްކަތް މުޅިން ނިމޭނެ ކަމަށެވެ.
Advertisement
This content is created and paid for by advertisers and does not involve Voice Journalists
