ވެލާނާ އިންޓަރނޭޝަނަލް އެއރަޕޯޓްގެ އައު ޓަރމިނަލް ހުޅުވުމުގެ ރަސްމިއްޔާތަށް ތައްޔާރުވުމުގެ ގޮތުން ހުޅުލޭގައި ހަދާފައިވާ ޕާކިން ޒޯންތަކުގައި ޕާކްކުރުން ވަގުތީ ގޮތުން މަނާކުރުމަށް ނިންމައިފިއެވެ.
ވީއައިއޭ ހިންގާ އެމް.އޭ.ސީ.އެލް އިން ބުނީ މި މަހުގެ 17 ވަނަ ދުވަހުން ފެށިގެން ހުޅުލޭ އިރުމަތީ ފަރާތު ޕާކިން ޒޯންގައި ހަތަރު ފުރޮޅުލީ އުޅަދުތައް ޕާކު ކުރުމަކީ މަނާ ކަމެއް ކަމަށެވެ. އެމްއޭސީއެލުން ވަނީ އެދުވަހުގެ ކުރިން އިރުމަތީ ފަރާތު ޕާކިން ޒޯންގައި ޕާކުކޮށްފައިވާ ހަތަރުފުރޮޅުލީ އުޅަނދުތައް ނެގުމަށް އެދިފައެވެ.
އޭގެ އިތުރުން 17 ވަނަ ދުވަހުގެ އިރުއޮއްސި ހައެއްގެ ފަހުން ހުޅަނގު ފަރާތު ޕަރކިންގ ޒޯނުގައި އެއްގަމު އެއްވެސް ބާވަތެއްގެ އުޅަނދެއް ޕާކުކުރުމަކީ މަނާ ކަމެއް ކަމަށާއި އެދުވަހުގެ ކުރިން އެތަނުގައި ހުރި އުޅަނދުތައްވެސް ވެރިފަރާތުން ނުވަތަ އެ އުޅަނދަކާ ހަވާލުވެހުރި ފަރާތަކުން އުޅަނދު ނެގުމަށް ވަނީ އެދިފައެވެ.
އެމްއޭސީއެލުން ބުނީ މިމަހުގެ 17ގައި ދީފައިވާ ގަޑީގެފަހުން ޕާކިންޒޯނުގައި އުޅަނދެއް ޕާކްކޮށްފައި އޮތްނަމަ، މޯލްޑިވްސް ޕޮލިސް ސަރވިސް އާއި ގުޅިގެން ހުޅުލޭ ޕާކިން ޒޯންތަކުން އުޅަނދުތައް ހުސްކުރާނެކަމަށެވެ. އަދި ޕާކިން ޒޯނުތަކުގައި އަލުން ޕާކު ކުރެވޭނެ ތާރީހެއް ފަހުން އިއުލާން ކުރާނެ ކަމަށްވެސް އެމްއޭސީއެލުން ބުންޏެވެ.
ވީއައިއޭގެ އައު ޓަރމިނަލް ހުޅުވަން ހަމަޖެހިފައިވަނީ މި މަހުގެ 26 ވަނަ ދުވަހު އެވެ. އެމްއޭސީއެލުން ދަނީ އެއާޕޯޓްގެ އައު ޓާމިނަލް ހުޅުވުމަށް އެންމެ ފަހުގެ ތައްޔާރީތައް ވަމުންނެވެ.
Advertisement
This content is created and paid for by advertisers and does not involve Voice Journalists
