ކިޔުބާގައި ސަލާން ޖަހާ މީހުން ނެތް ކަމަށާ، އަދި ކުނިގޮނޑުތަކުން ކާބޯތަކެތި ހޯދާ މީހުންނަކީ ފަސޭހައިން ފައިސާ ހޯދަން މަސައްކަތްކުރާ ބައެއް ކަމަށް ވިދާޅުވުމާ ގުޅިގެން، އެގައުމުގެ މަސައްކަތްތެރިކަމާ އަދި އިޖުތިމާޢީ ސަލާމަތާ ބެހޭ ވަޒީރު، މާޓާ އެލީނާ ފެއިޓޯ-ކަބްރޭރާ، އިސްތިއުފާ ދޭން އަންގައިފިއެވެ.
މިދިޔަ ހަފްތާގެ ކުރީކޮޅު، ކިޔުބާގެ ގާނޫނު ހަދާ މަޖިލީހުގެ ޖަލްސާއެއްގައި ވާހަކަ ދައްކަވަމުން ވަޒީރު ފެއިޓޯ-ކަބްރޭރާ ވިދާޅުވީ، ކޮމިއުނިސްޓް ވެރިކަމެއް ހިނގާ ކިޔުބާގައި "ސަލާން ޖަހާ މީހުންނެއް ނުތިބޭ" ކަމަށެވެ.
އަދި އެއީ "ފަސޭހައިން ފައިސާ ހޯދުމަށް ސަލާން ޖަހާކަމަށް ހަދައިގެން އުޅޭ ބައެއް" ކަމަށްވެސް އޭނާ ސިފަ ކުރެއްވިއެވެ. މީގެ އިތުރުން، ކުނިގޮނޑުތައް ބަލައި ހޯދާ މީހުންނަކީ "ރީސައިކްލިންގ ސާވިސްގެ ޣައިރުޤާނޫނީ ބައިވެރިން" ކަމަށްވެސް އޭނާ ތުހުމަތު ކުރެއްވިއެވެ.
ވަޒީރުގެ މި ވާހަކަތަކާއި ގުޅިގެން ކިޔުބާގެ ގިނަ ބައެއްގެ ފާޑުކިޔުންތައް އޭނާއަށް އަމާޒުވިއެވެ.
އެގޮތުން، ކިޔުބާގެ ހައްގުތަކަށް ވަކާލާތުކުރާ ފަރާތްތަކުން ވަނީ ވަޒީރު އިސްތިއުފާ ދިނުމަށް ގޮވާލާ ސިޓީއެއްވެސް ފޮނުވާފައެވެ. އެ ސިޓީގައި ވަޒީރުގެ އެވާހަކަތަކަކީ "ކިޔުބާގެ ރައްޔިތުންނަށް ދެވުނު ބޮޑު ނިކަމެތިކަމެއް" ކަމަށް ބުނެފައިވެއެވެ.
އެކަމާއި ގުޅިގެން، ކިޔުބާގެ ރައީސް މިގޭލް ޑިއާޒް-ކަނެލް، ވަޒީރަށް ފާޑުވިދާޅުވެފައިވާއިރު، ވަޒީރު މިހާރު އިސްތިއުފާ ދެއްވާފައިވާ ކަމަށް ކިޔުބާ ސަރުކާރުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
