ރާއްޖޭގެ ދަރަނީގެ ބޮޑު އިންސައްތައެއް ހިއްސާކުރަނީ ވެލާނާ އިންޓަނޭޝަނަލް އެއަރޕޯޓު ކަމަށާ، އެކަން އެގޮތަށް ދިމާވީ، ކުރީގެ ރައީސް މުޙައްމަދު ނަޝީދުގެ ވެރިކަމުގައި، އެ އެއާޕޯޓް ހިންގުން އިންޑިޔާގެ ޖީއެމްއާރު ކުންފުންޏާ ހަވާލުކޮށްފައިވަނިކޮށް، އެ އެއްބަސްވުން ކުރީގެ ރައީސް އަބްދުالله ޔާމީން އަބްދުލްޤައްޔޫމްގެ ވެރިކަމުގައި ބާޠިލް ކުރުމުން ކަމަށް އެމްޑީޕީގެ ޗެއާޕާސަން ފައްޔާޟު އިސްމާޢީލް ވިދާޅުވެއްޖެއެވެ. 

ފައްޔާޟު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ވީއައިއޭ ތަރައްގީކުރުމަށާއި، ހިންގުމަށް (ދައުލަތުން ޚަރަދެއް ކުރަންނުޖެހޭ ގޮތަށް) ޖީއެމްއާރުއާ ހަވާލުކޮށްފައި އޮއްވައި، ޔާމީންގެ ވެރިކަމުގައި، ދައުލަތަށް ގެއްލުންވާ ގޮތަށް އެ އެއްބަސްވުން ބާތިލުކޮށް، ދަރަނި މައްޗަށް ދަރަނި ނަގައިގެން އެއަރޕޯޓު ހެދުމަށް ނިންމި ކަމަށެވެ. އަދި ނިންމުމަކީ ސިޔާސީ ބޭނުމެއްގައި ކުރި ދެކޮޅުނުޖެހޭ ކަމެއް ކަމަށްވެސް އޭނާ ސިފަކުރެއްވިއެވެ.

”މިއަދު ރާއްޖެ މިދެކޭ ދަރަނީގެ ބޮޑު އިންސައްތައެއް ހިއްސާކުރަނީ އެއަރޕޯޓުގެ ނަމުގައި ނެގި ދަރަނިން. މިއީ މިހާތަނަށް ދިވެހިރާއްޖޭގެ ވެރިޔަކު ނިންމި އެންމެ ދޯހަޅި ނިންމުން.“ ފައްޔާޟު ވިދާޅުވިއެެވެ. 

ފައްޔާޟު ވިދާޅުވި ގޮތުގައި، ވީއައިއޭގެ ދަރަނީގެ ސަބަބުން ރާއްޖޭގެ ރައްޔިތުންނަށް ބޭނުންވާ އެހެން ޒަރޫރަތުތައް ފުއްދުމަށް ފައިސާ ހޯދުމަށް އޮތް ފުރުސަތުވެސް ބަންދުވެފައިވާ ކަމަށެވެ.

2014 ވަނަ އަހަރު، އެ ގޮތަށް އަމަލު ނުކުރިނަމަ، އަދި އެ ނެގި ދަރަނިތައް ނުނެގި ނަމަ މިއަދު ރާއްޖެ އަންނަ ފަތުރުވެރިންގެ އަދަދު ހުންނާނީ 4 މިލިއަނުން މަތީގައި ކަމަށާ، ރާއްޖޭގެ ޖީޑީޕީވެސް ހުންނާނީ ދެގުނަ މަތީގައި ކަމަށް އޭނާ ވިދާޅުވިއެވެ.

‏މިއާއެކު ފައްޔާޟު ވަނީ، އިގްތިސާދަށާއި މުޅި ދައުލަތަށް ލިބުނު އެތައް ސަތޭކަ ބިލިއަން ޑޮލަރުގެ މި ބޮޑު ގެއްލުމަކީ ކާމިޔާބީއެއްގެ ގޮތުގައި ހަމަ ފާހަގަކުރުމާމެދު ސުވާލު އުފައްދަވާފައެވެ.

އަދި އެއާޕޯޓު އެކުގައި ނުނިންމައި އެއެއާޕޯޓު ހުޅުވުމުގެ ނަމުގައި އެތައް މިލިއަން ޑޮލަރެއް ޚަރަދުކޮށްލާއިރު އެ ”ބޭކާރު“ ޚަރަދަށްވުރެ އެ އެއަރޕޯޓު ހަގީގަތުގައިވެސް އެކުގައި ނިންމުން މާ މުހިއްމު ކަމަށް އޭނާ ވިދާޅުވިއެވެ.