ރުއްގަހަށް ދިމާވާ ފަނިފަކުސާގެ މައްސަލައަށް ހައްލު ހޯދުމަށް ޗައިނާއިން އެހީ ވަނީ
ރާއްޖޭގައި ރުއްގަހަށް ދިމާވަމުން އަންނަ ފަނިފަކުސާގެ މައްސަލަތަކަށް ހައްލު ހޯދުމަށް ދަނޑުވެރިކަމާއި ދިރޭތަކެއްޗާއި ބެހޭ ވުޒާރާ އާއި ޗައިނާ ސަރުކާރާ ދެމެދު އެއްބަސްވުމެއްގައި ސޮއިކޮށްފި އެވެ.
ދެ ޤައުމުގެ ދެމެދުގައި މި އެއްބަސްވުމުގައި ސޮއިކޮށްފައިވަނީ މިމަހުގެ 14 ވަނަ ދުވަހު އެކަމަށްޓަކައި ދަނޑުވެރިކަމާ ބެހޭ ވުޒާރާގައެވެ. ޗައިނާގެ އެހީގައި ރުއް ގަހަށް ދިމާވާ ފަނިފަކުސާގެ މައްސަލައަށް ހައްލުގެނައުމަށް، އިމްޕްލިމެންޓޭޝަން އެއްބަސްވުމުގައި ޗައިނާ ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ، އެޤައުމުން ރާއްޖެއަށް ކަނޑައަޅުއްވާފައިވާ ހުންނަވާ ސަފީރު ކޮންގް ޝިއަންހުއާ އެވެ. ރާއްޖޭގެ ފަރާތުން ސޮއިކުރެއްވީ ވަނީ މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރ ޑރ. މަރިޔަމް މާރިޔާއެވެ.
މި އެއްބަސްވުމަކީ ދަނޑުވެރިކަމުގެ ދާއިރާއިން ރާއްޖެ އާއި ޗައިނާ ގުޅިގެން ހިންގާ ފުރަތަމަ މަޝްރޫޢުއެވެ. މި އެއްބަސްވުމުގެ ދަށުން ޗައިނާއިން ރާއްޖެ އަށް ކަމާގުޅުންހުރި ތަޖުރިބާކާރުން ފޮނުވައިގެން ތަމްރީނާއި އިރުޝާދު ފޯރުކޮށްދިނުމަށް ވަނީ ހަމަޖެހިފަ އެވެ. އަދި ރާއްޖޭގައި ގަސްގަހަށް ޖެހޭ ބަލިތައް ދެނެގަނެވޭނެ ފަދަ ލެބޯޓްރީއެއް ޤާއިމުވެފައި ނެތުމުގެ ސަބަބުން ރާއްޖޭގައި އެފަދަ ލެބޯޓްރީއެއް ޤާއިމްކުރުމަށް ވަނީ ނިންމާފައެވެ.
ދަނޑުވެރިކަމާއި ދިރޭތަކެއްޗާއި ބެހޭ ވުޒާރާއިން ބުނެފައިވާ ގޮތުގައި މި މަޝްރޫއުގެ މައިގަނޑު މަގުސަދަކީ ފެހި އަދި ތިމާވެއްޓާ ރައްޓެހި ގޮތެއްގައި ރާއްޖޭގައި ރުއްގަހުގެ ބަލިތަކާއި، ފަނިފަކުސާތަކުން ރައްކާތެރިވުމާއި ކޮންޓްރޯލް ކުރުމުގެ ފެންވަރު މަތިކުރުމުގެ އިތުރުން ރާއްޖޭގައި ގަސް ހައްދާ މީހުންގެ އާމްދަނީ އިތުރުކުރުމެވެ.
ޑރ. މާރިޔާ ވަނީ ރާއްޖޭގައި ދަނޑުވެރިކަމާއި އެހެނިހެން ދާއިރާތައް ކުރިއެރުވުމަށް ޗައިނާއިން ދެމުންދާ އެއްބާރުލުމަށް ޝުކުރު އަދާކުރައްވާފައެވެ. އަދި ދަނޑުވެރިކަމުގެ ސިނާއަތުގައި އެއްބަޔަކު އަނެއްބަޔަކަށް އެއްބާރުލުންދީ، ދަނޑުވެރިކަމުގެ ދާއިރާއިން ޗައިނާގެ ތަޖުރިބާކާރު ފަރާތްތަކާއެކު ތަމްރީނު ހޯދުމަށް ޗައިނާއާ ގުޅިގެން މަސައްކަތް ކުރަން ބޭނުންވާކަން އެކަމަނާ ވަނީ ވިދާޅުވެފައެވެ.
މި ބައްދަލުވުމުގައި ރުއްގަހަށް ދިމާވާ އެހެނިހެން ބޮޑެތި ބައެއް މައްސަލަތައްވެސް ތަޙްލީލު ކުރުމަށްވަނީ މަޝްވަރާކޮށްފައެވެ. އެއްބަސްވުމުގައި ސޮއިކުރިއިރު، ޗައިނާގެ ތަޖުރިބާކާރުންގެ ޓީމެއް ހަނިމާދޫ އެގްރިކަލްޗަރ ސެންޓަރަށް ޒިޔާރަތްކޮށް ބަލިތައް ދެނެގަތުމުގެ މަސައްކަތް ކޮށްފައިވާކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
