ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ އާ ޓާމިނަލްގެ މިލްކުވެރިކަމަށް ދަޢުވާ ކުރުމުގެ އެއްވެސް ހައިސިއްޔަތެެއް އިދިކޮޅު އެމްޑީޕީއަށް ނެތް ކަމަށް އެމްޑަބްލިއުއެސްސީގެ މެނޭޖިން ޑިރެކްޓަރު އަބްދުލް މަތީން މުހައްމަދު މިރޭ ވިދާޅުވެއްޖެ އެވެ.

މަތީން މިހެން ވިދާޅުވީ ސަރުކާރު ހިންގާ މައި ޕާޓީ -- ޕީއެންސީގެ ހަރުގެ ޖަލްސާގައި ވާހަކަފުޅު ދައްކަވަމުންނެވެ. މަތީން ވިދާޅުވީ އެއާޕޯޓްގެ އާ ޓާމިނަލްގެ މަޝްރޫއު އަކީ މިހާރު އޮތް ސަރުކާރުގެ ފިކުރު ގައި އުފެދުނު ފުރަތަމަ ސަރުކާރުގައި ފެށި މަޝްރޫއުއެއް ކަމަށެވެ. އާ ޓާމިނަލްގެ މަސައްކަތް ނިމި ހުޅުވަނީ އެ ފިކުރުގެ ދެވަނަ ސަރުކާރުގައި ކަމަށެވެ.

އެމްޑީޕީން ދިވެހީންގެ އެއާޕޯޓް ތަރައްގީކޮށް ހިންގުމަށް އެއްވެސް މަސައްކަތެއް ކޮށްފައި ނެތްކަން އެމްޑީޕީގެ ދެ ވެރިކަމުގައި އަމަލު ކުރި ގޮތުން އޮތީ ފެންނަން ކަމަށް ވެސް ވިދާޅުވި އެވެ. އެއް ވެރިކަމުގައި އެއާޕޯޓް ބޭރުގެ ބަޔަކަށް ކުއްޔަށް ދިނީ ކަމަށާ ދެވަަނަ ވެރިކަމުގައި އެއާޕޯޓް ތަރައްގީކުރަން ފެށި މަސައްކަތް ނިންމާ ނުލެވުނު ކަމަށެވެ.

މިރޭގެ ޖަލްސާގައި މަތީން ވާހަކަފުޅު ދައްކަވަނީ -- ފޮޓޯ: ވޮއިސް

މިއަދު އެއާޕޯޓްގެ އާ ޓާމިނަލް ހުޅުވޭއިރު ދެވަނަ ރަންވޭއެއް ހެދުމުގެ އެއްވެސް ވިސްނުމެއް އެމްޑީޕީގެ ވެރިކަމުގައި ގެންގުޅެފައި ނުވާ ކަމަށާ އެމްޑީޕީއަަކީ އިގްތިސާދު ފުޅާކުރުމުގެ އެއްވެސް ވިސްނުމެއް ނެތް އޮތް ބައެއް ނޫންކަން އެކަމުން ދޭހަވާ ކަމަށެވެ.

"އެެހެންވީމަ އެ ބޭފުޅުން (އެމްޑީޕީގެ ވެރީން) މެމޮރީ ރިފްރެސް ކޮށްލަން ޖެހޭ. ކުރަން ވަން އުޅުނު ކަމަކާ މިހާރު އެތަނުގައި (އާ ޓާމިނަލް) އަށް ވެފައި އޮތް ގޮތަކާ,"

މިރޭގެ ޖަލްސާ -- ފޮޓޯ: ވޮއިސް

އެމްޑީޕީގެ ހުރިހާވެސް ވިސްނުމަކީ އެއާޕޯޓް އަޅަން ވެސް އަދި ހިންގަން ވެސް ބޭރު މީހުން ގެނައުން ކަމަށް ވިދާޅުވި އެވެ. ނަމަވެސް ރައީސް މުއިއްޒުގެ ވިސްނުންފުޅަކީ އެއީ ނޫން ކަމަށް ވިދާޅުވި އެވެ.

"މިއީ ދިވެހީން ތަރައްގީ ކޮށްފައިވާ ދިވެހީންގެ އެއާޕޯޓެއް. މި އެއާޕޯޓް ހުޅުވިގެން މި ދަނީ އަޅުގަނޑުމެންގެ ވެރިކަމެއް,"ު މަތީން ވިދާޅުވި އެވެ.

މަތީން ތަކުރާރުކޮށް ވިދާޅުވީ އާ ޓާމިނަލްގެ މިލްކުވެރިކަމަށް ދައުވާ ކުރުމުގެ އެއްވެސް ހައިސިއްޔަތެެއް އެމްޑީޕީއަށް ނެތް ކަމަށެވެ.