އުއްތަމަ ފަނޑިޔާރު, މުއުތަސިމް އަދުނާނު, ޝަރަފުވެރިކަމާއެކު ވަަކިވެވަޑައިގަތުމުގެ ފުރުސަތު ދެއްވުމަށް ޖުޑީޝަލް ސާވިސް ކޮމިޝަނުން ނިންމައިފި އެވެ.
އެ ކޮމިޝަނުން މިއަދު ވަނީ މުއުތަސިމްގެ ހުށައެޅުއްވުމާ މެދު ގޮތް ނިންމަވާފަ އެވެ. އެ ގޮތުން އަންނަ ހޯމަ ދުވަހު, ޝަރަފުވެރިކަމާއެކު މަގާމުން ވަކިވެވަޑައިގަތުމުގެ ފުރުސަތު ދެއްވުމަށް ވަނީ ނިންމަވާފަ އެވެ. އެ ނިންމުމާ އެކު ރަސްމީ ހައިސިއްޔަތުން މުއުތަސިމް, ކޯޓަށް ދެން ވަޑައިގަންނަވާނީ އަންނަ އާދިއްތަ ދުވަހުގެ ނިޔަލަށެވެ.
ފަނޑިޔާރުގެ މަގާމުން ޝަރަފުވެރިކަމާއެކު ވަކިވެވަޑައިގެންނެވޭނީ އެ ފުރުސަތު ދިނުމަށް ޖޭއެސްސީން ނިންމައިފި ނަމަ އެވެ. މީގެ ކުރީން ބައެއް ފަނޑިޔާރުންނަށް އެ ފުރުސަތު ދީފައެއް ނުވެ އެވެ.
އުއްތަމަ ފަނޑިޔާރު, މުއުތަސިމް އަދުނާނު މަގާމުން ވަކިވެވަޑައިގަންނަވާނެ ކަމުގެ އިޝާރާތެއް ފެބްރުއަރީ 17 ވަނަ ދުވަހު ވަނީ ދެއްވާފަ އެެވެ. ވަކީލުން ހުވާކުރުމަށް އެ ދުވަހު އޮތް ރަސްމިއްޔާތެއްގައި މުއުތަސިމް ވިދާޅުވީ މިހާރު "ދުވަސް" ވެއްޖެ ކަމަށެވެ.
އަދި މަގާމުގައި ދެން މާގިނަ ދުވަހު ދެމި ނުހުންނަވާނެ ކަމަށް އިޝާރާތަކަށް ފުދޭ ފަދަ މޭރުމަކުން ވިދާޅުވީ އެފަދަ ރަސްމިއްޔާތަކުން މިހާރު ހުންނެވި ހައިސިއްޔަތުން ދެން ފެނިވަޑައިނުގެންފާނެ ކަމަށެވެ.
މުއުތަސިމަކީ, މިހާރު އަމަލު ކުރަމުންދާ ގާނޫނު އަސާސީގެ ދަށުން އެ މަގާމުން ޝަރަފުވެރިކަމާ އެކު ވަކިވެވަޑައިގަންނަވާ ފުރަތަމަ އުއްތަމަ ފަނޑިޔާާރެވެ. އޭގެ ކުރީން އެ މަގާމު އަދާކުރެއްވި ހުރިހާ ބޭފުޅުން މަގާމުން ވަކި ކުރެއްވީ އެވެ. ބައެއް ބޭފުޅުން މަގާމުން ވަކި ކުރެއްވީ ބޮޑެތި ތުހުމަތުތައް ވެސް ކުރެއްވުމަށް ފަހު އެވެ.
ސުޕްރީމް ކޯޓަށް އަނެއްކާ ބަދަލުވަނީ
ސުޕްރީމް ކޯޓްގެ ފަނޑިޔާރުންނަށް އަވަސް ބަދަލުތަކެއް އަންނަތާ އަހަރުތަކެއް ވެއްޖެ އެވެ. ކުރީގެ ރައީސް އަބްދުﷲ ޔާމީންގެ ވެރިކަމުގައި ސުޕްރީމް ކޯޓްގެ ގިނަ ފަނޑިޔާރުންތަކެއް މަގާމުން ވަކިކުރެއްވި އެވެ. ބައެެއް ފަނޑިޔާރުންނަށް ބޮޑެތި ތުހުމަތުތައް ކުރެވި ޖަލުގައި ބަންދު ކުރެއްވި އެވެ.
ރައީސް އިބްރާހިމް މުހައްމަދު ސޯލިހް ވެރިކަމަށް ވަޑައިގެން މުޅި ސުޕްރީމް ކޯޓް އެއްކޮށް ބަދަލު ކުރެއްވި އެވެ.
މިހާރު ހިނގަމުންދާ ރައީސް މުއިއްޒުގެ ވެރިކަމުގައި ވެސް ސުޕްރީމް ކޯޓް ބަދަލުވުމުގެ މަރުހަލާ އެބަ ހިނގަ އެވެ. މިހާރުވެސް އެ ކޯޓްގެ އެއް ފަނޑިޔާރަކު އިސްތިއުފާ ދެއްވި އެވެ. ފަނޑިޔާރު ހުސްނުއް ސުއޫދު އިސްތިއުފާ ދެއްވީ އޭނާއާ ގުޅޭ މައްސަލައެއް ބަލަން ފެށުމުންނެވެ.
ސުޕްރީމް ކޯޓްގެ ދެ ފަނޑިޔާރުން ކަަަމަށްވާ ޑރ. އަޒްމިރަލްދާ ޒާހިރު އާއި މަހާޒް އަލީ ޒާހިރު މަގާމުން ވަނީ ވަކި ކުރައްވާ އާ ފަނޑިޔާރުން ލައްވާފަ އެވެ.
އުއްތަމަ ފަނޑިޔާރު މުއުތަސިމް މަގާމުން ވަކިވެވަޑައިގަތުމުން ދެން ތިއްބަވާނީ ކުރީގެ ދެ ފަނޑިޔާރުންނެވެ.
Advertisement
This content is created and paid for by advertisers and does not involve Voice Journalists
