ދިވެހިރާއްޖެއާއި އިގިރޭސިވިލާތާ ދެމެދު ވިޔަފާރީގެ ގުޅުން ބަދަހިކޮށް، އިންވެސްޓްމަންޓްތައް އިތުރުކުރުމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑާއި ވެސްޓް ލަންޑަން ޗެމްބަރ އޮފް ކޮމާސް (ޑަބްލިއުއެލްސީސީ) އާ ދެމެދު އެމްއޯޔޫއެއްގައި ސޮއިކޮށްފިއެވެ.

މި އެމް.އޯ.ޔޫގެ ދަށުން ދެޤައުމުގެ ވިޔަފާރީގެ ގުޅުންތައް އިތުރަށް ބަދަހިކޮށް، އިންވެސްޓްމަންޓްގެ ފުރުސަތުތަކާއި ވިޔަފާރި ތަރައްޤީކުރުމުގެ ފުރުސަތު އިތުރުވެގެންދާނެ ކަމަށް މިނިސްޓްރީން ބުނެއެވެ.  

މި އެމް.އޯ.ޔޫގެ ދަށުން ހިންގުމަށް ހަމަޖެހިފައިވާ މުހިއްމު މަސައްކަތްތަކުގެ ތެރޭގައި ދެޤައުމުގެ ވިޔަފާރި ދަތުރުތަކަށް ފަސޭހަކޮށްދިނުމާއި އިންވެސްޓްމަންޓް އިތުރުކުރުމުގެ ހަރަކާތްތައް ހިންގުން ހިމެނެއެވެ.

މީގެ އިތުރުން މާކެޓް ހޯދުމުގެ ފުރުސަތުތައް ދެނެގަނެ، ވިޔަފާރީގެ ފުރުސަތުތައް އިތުރުކުރުމަށް މަސައްކަތް ކުރުމާއި، ބައިނަލްއަޤްވާމީ މައުރަޒުތަކާއި ޓްރޭޑް ފެއަރތަކުގައި ގުޅިގެން ބައިވެރިވުންވެސް ހިމެނެއެވެ.

އަދި މި އެމް.އޯ.ޔޫގެ ދަށުން ވިޔަފާރިވެރިން ގުޅުވައިދިނުމުގެ މަސައްކަތްތަކާއި އިންވެސްޓްމަންޓް އިތުރުކުރުމުގެ ހަރަކާތްތައް ކުރިއަށް ގެންދިއުމަށްޓަކައި، ޖޮއިންޓް ބިޒްނަސް ކައުންސިލްގެ ދަށުން ނިޒާމެއް ޤާއިމުކުރުމަށްވެސް ވަނީ ހަމަޖެހިފައެވެ.

އިއްޔެ ސޮއިކުރެވުނު މި އެއްބަސްވުމުގެ މުއްދަތަކީ ތިން އަހަރު ދުވަހެވެ. އަދި ދެ ފަރާތުން އެއްބަސްވާނަމަ މި މުއްދަތު އިތުރުކުރެވޭނެއެވެ. މީގެ އިތުރުން، އެއްބަސްވުމުގެ ދަށުން ހިންގޭ ކަންކަން ހަރުދަނާކޮށް، އިތުރަށް ރަނގަޅުކުރުމަށްޓަކައި މުރާޖަޢާކުރުމުގެ ނިޒާމެއްވެސް ހިމެނިފައިވެއެވެ.