ގަދަވަޔާއެކު މާލެއާއި ހުޅުމާލޭގެ ބިޔަ ގަސްތައް ވެއްޓި ބޮޑެތި ގެއްލުންތަކެއް
ރާއްޖެއަށް މިހާރު ކުރަމުންދާ ވިއްސާރައިގައި މާލެއާއި ހުޅުމާލޭގެ މަގުތަކާއި އެކި ސަރަހައްދު ތަކުގައި ހުރި ބިޔަ ގަސްތައް ވެއްޓި ބޮޑެތި ގެއްލުންތަކެއް ވެއްޖެއެވެ.
ކުރިއަށް އޮތް ތިން ދުވަހުވެސް ރާއްޖެ ސަރަހައްދަށް ހުޅަނގު މޫސުމުގެ ބާރުގަދާވާނެ ކަމަށް މެޓް އޮފީހުން ވަނީ ލަފާކޮށްފައެވެ.
މި ދުވަސްތަކުގައި ވައި ބާރުވެ ކަނޑުތައް ގަދަވެ އަދި ބޮޑު ބަޔަކަށް ވިއްސާރާނެ ކުރާނެ ކަމަށް ވެސް ލަފާކޮށްފައިވާއިރު ރެއިން ފެށިގެން މުޅިރާއްޖޭގެ މޫސުން ގޯސްވެ ވައިވެސް ވަނީ ވަރަށް ގަދަވެފައެވެ.
އެގޮތުން މިއަދުވެސް މާލެއާއި ހުޅުމާލެއަށް ގާތް ގަނޑަކަށް 52 މޭލަށް ވައިގަދަވެ، މަގުތަކާއި ޕާކުތަކުގައި ހުރި ގަސްތައް ވަނީ ބިމާ ހަމަވެފައެވެ. އަދި ބައެއް ގޭގޭގެ ފުރާޅުތައް ވިއްސައިގެން ގޮސް، ހިފާ ގެންގުޅޭ ތަކެތިވެސް ވަޔާ މަގުތަކާއި އެހެނިތަންތަނަށް ވިއްސައިގެން ގޮސްފައިވެއެވެ.
މީގެ އިތުރުން، ގަދަ ވަޔާއެކު މަގުތަކުގައި ޕާކުކޮށްފައިހުރި ސައިކަލުތައް ވެއްޓި އެއަށް ބޮޑެތި ގެއްލުންތައް ވެފައިވާއިރު، ބިޔަ ގަސްތައް، ސައިކަލުތަކާއި ކާރުތަކުގެ މައްޗަށް ވެއްޓުމުގެ ސަބަބުން އެތަކެއްޗަށް ބޮޑެތި ގެއްލުންތަކެއް ވަނީ ވެފައެވެ.
މިކަމާއި ގުޅިގެން ފުލުހުންނާއި ސިފައިން މަގުތަކަށް ނުކުމެ، ގަސްތަކާއި، ވިއްސައިގެން ގޮސްފައިވާ އެހެނިހެން ތަކެތި ނެގުމުގެ މަސައްކަތް ކުރަމުންދާ ކަމަށް އެ އިދާރާތަކުން ވަނީ ބުނެފައެވެ.
އަދި މޫސުން ގޯސްވެފައިވާ ވަަގުތު ތަކުގައި، ކަނޑުދަތުރުފަތުރު ނުކުރުމަށާއި، އެއއގަމު އުޅަނދު ދުއްވާ ފަރާތްތަކުންވެސް ވައިގަދަވެ ވިއްސާރަ ވުމުގެ ސަބަބުން ދިމާވެދާނެ ކަންކަމަށް ސަމާލުވުމަށް ފުލުހުން ވަނީ އިލްތިމާސް ކޮށްފައެވެ.
މޫސުމާ ބެހޭ ގައުމީ އިދާރާ މެޓް އޮފީހުން ވަނީ، މުޅި ރާއްޖެއަށްވެސް މޫސުން ގޯސްވެ އުދަ އަރާނެ ކަމަށް ލަފާކޮށް ހުދު ސަމާލު ނެރެފައެވެ.
Advertisement
This content is created and paid for by advertisers and does not involve Voice Journalists
