ވެލާނާ އިންޓަނޭޝަނަލް އެއަރޕޯޓް (ވީއައިއޭ)ގެ އައު މާސްޓަރ ޕްލޭން އަންނަ ސެޕްޓެމްބަރު މަހުގެ ފަހުން ތަންފީޒުކުރަން ފަށާނެކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ މެނޭޖިންގ ޑިރެކްޓަރ އިބްރާހިމް ޝަރީފު މުޙައްމަދު ވިދާޅުވެއްޖެ އެވެ.

ޓީވީއެމް އިން ގެނެސްދޭ "ހޭޔަންބޯ" ޕްރޮގްރާމްގައި ވާހަކަ ދައްކަވަމުން ޝަރީފް ވިދާޅުވެފައިވަނީ ވީއައިއޭގެ އައު މާސްޓަރ ޕްލޭން ލިބުމާ އެކު އޭގެ އަމަލީ މަސައްކަތްތައް ވީހާވެސް އަވަހަށް ފަށާނެ ކަމަށާއި ފްރީ ޒޯން ފަދަ ކަންކަމަށް އައު މާސްޓަރ ޕްލޭންގައި ރިޢާޔަތް ކޮށްފައިވާނެ ކަމަށެވެ. ޝަރީފް ވިދާޅުވީ އައު މާސްޓަރޕްލޭން ލިބުމާއެކު އޭގައި ބަޔާންކޮށްފައިވާގޮތަށް އިތުރު ކަންކަންކުރަން ފެށިގެންދާނޭކަމަށެވެ. މިގޮތުން ޑޮމަސްޓިކް ޓާމިނަލް ތަރައްޤީކުރުމުގެ މަސައްކަތް ފައްޓަވާނޭކަމަށް ޝަރީފް ވިދާޅުވިއެވެ.

ވީއައިއޭގެ އައު ޓާމިނަލާއި އަދި  މާސްޓަރ ޕްލޭންގައި ކުރުމަށް ހިމަނާފައިވާ ކަންކަން ފުރިހަމަވެގެން ދިއުމުން ފަތުރުވެރިންނަށް އެތަކެއް ގޮތަކުން ފަސޭހަތަކެއް ލިބިގެން ދާނެކަމަށް އެމްއޭސީއެލް އިން މީގެ ކުރިން ވަނީ ބުނެފަ އެވެ. ވީއައިއޭ އިން ޚިދުމަތް ހޯދާ ފަރާތްތަކުގެ %95 އަކީ ފަތުރުވެރިންނެވެ. 

ވެލާނާ އިންޓަރނޭޝަނަލް އެއަރޕޯޓްގައި ތަރައްޤީކުރާ އައު ޓަރމިނަލްގެ ސަބަބުން މި އަހަރު ރާއްޖޭގެ އިގުތިޞާދު 5.2 އިންސައްތަ އިތުރުވާނެ ކަމަށް ވޯލްޑް ބޭންކުން ވެސް ލަފާކޮށްފައިވެ އެވެ.

ރާއްޖޭގެ މިނިވަންކަމަށް 60 އަހަރު ފުރޭ މުނާސަބަތާ ގުޅުވައިގެން މި މަހުގެ 26 ވަނަ ދުވަހު ވެލާނާ އިންޓަރނޭޝަނަލް އެއަރޕޯޓްގެ އައު ޓާމިނަލް ހުޅުވުމަށް ތައްޔާރުވަމުން އަންނައިރު، އެމްއޭސީއެލުން އަންނަނީ، އައު ޓާމިނަލް ހުޅުވުމަށް ވާން ޖެހޭ އެންމެފަހުގެ ތައްޔާރީތައް ވަމުންނެވެ.

ވީއައިއޭގެ މާސްޓާޕްލޭނެއް ވަނީ 2023 ވަނަ އަހަރުގެ ތެރޭގައި އިފްތިތާހްކޮށްފައެވެ. އައު މާސްޓާޕްލޭން ތައްޔާރުކޮށްފައިވަނީ އަހަރަކު 6 ބިލިއަން ޑޮލަރުގެ އާމްދަނީ ލިބޭނޭކަމަށް ބަލައިގެންނެވެ. ވީއައިއޭގެ އައު މާސްޓަރޕްލޭން ތައްޔާރުކޮށްފައިވަނީ، އޭޝިއަން ޑިވަލޮޕްމަންޓް ބޭންކް (އޭޑީބީ)ގެ ޓޫރިޒަމް ދާއިރާގެ ފަރާތްތަކުގެ ހިޔާލާއި މަޝްވަރާގެ މަތިންނެވެ.