ސްވިޒަލޭންޑްގައި މިހާރު ކުރިއަށްދާ ޔުއެފާ ވިމެންސް ޔޫރޯ ފުޓްބޯޅަ މުބާރާތް 2025 ގެ ކުއާޓާ ފައިނަލުގެ ތިންވަނަ މެޗުގައި ރޭ ސްޕެއިން އާއި މުބާރާތް ބާއްވާ ޤައުމު ސްވިޒަލޭންޑް ވާދަކުރި މެޗު 2-0 ގެ ނަތީޖާއަކުން ކާމިޔާބުކޮށް ސްޕެއިނުން މަބާރާތުގެ ސެމީފައިނަލުން ޖާގަ ހޯދައިފިއެވެ.

ސްޕެއިން މުބާރާތުގެ ކުއާޓާ ފައިނަލުން ޖާގަހޯދީ ގުރޫޕް ސްޓޭޖުގައި ކުޅުނު ތިން ވެސް މޮޅުވެ ނުވަ ޕޮއިންޓާއެކު ގުރޫޕް ބީގެ އެއްވަނަ ޓީމުގެ ގޮތުގައެވެ. އަދި ސްވިޒަލޭންޑް ކުއާޓާ ފައިނަލުން ޖާގަހޯދީ ގުރޫޕް ސްޓޭޖުގައި ކުޅުނު ތިން މެޗުން ހޯދި ހަތަރު ޕޮއިންޓާއެކު، ގުރޫޕް އޭގެ ދެވަނަ ޓީމުގެ ގޮތުގައެވެ.

މުޅި މެޗުގައި ވެސް މޮޅަށް ކުޅެ ސްޕެއިން އިން މެޗު ޑޮމިނޭޓްކުރިއިރު، އެޓީމުން މެޗުގެ ލީޑުހޯދީ ދެވަނަ ހާފުގެ 66 ވަނަ މިނެޓްގައެވެ. މިލަނޑު އެޓީމަށް ކާމިޔާބުކޮށްދިނީ ދެވަނަ ހާފުގައި ބަދަލުކުޅުންތެރިއެއްގެ ގޮތުގައި ކުޅެން ނިކުތް އެތީނެެއާ ޑެލް ކަސްޓިއޯ އެވެ. އަދި އޭގެ ފަސް މިނެޓްފަހުން އެޓީމުގެ ލީޑު ފުޅާކޮށްދިނީ ކްލައުޑިއާ ޕިނާ އެވެ. މީގެ އިތުރުން ވެސް މިމެޗުގައި ނަތީޖާގެ ފަރަގު ބޮޑުކުރުމަށް ސްޕެއިން ޓީމަށް ވަނީ ދެ ޕެނަލްޓީ ލިބި ބޭނުންނުކުރެވިފައެވެ.

އެގޮތުން ފުރަތަމަ ހާފުގެ ނުވަވަނަ މިނެޓުގައި މަރިއޯނާ ކަލްޑެންޓީ ކުރިއަށް ފޮނުވާލި ޕެނަލްޓީ ގޯލާއި އަމާޒުނުވެ ބޭރަށްދިޔައިރު، މެޗުގެ ފުރިހަމަ ވަގުތު ހަމަވާން ދެ މިނެޓަށްވެފައި ވަނިކޮށް އެޓީށް ލިބުނު ދެވަނަ ޕެނަލްޓީ އެލެކްސިއާ ޕުޓެލާސް ކުރިއަށް ފޮނުވާލުމުން ސްވިޒަލޭންޑްގެ ކީޕަރު ވަނީ ދިފާއުކޮށްފައެވެ.

މީގެ އިތުރުން މެޗުގެ އިތުރު ވަގުތުގެ ތެރޭގައި ސްވުޒަލޭންޑްގެ ޑިފެންޑަރު ނޯއެލް މެރިޓްޒް ކުރި ފައުލަކާއި ގުޅިގެން މެޗުގެ ރެފްރީ ވަނީ އޭނާއަށް ސީދާ ރަތްކާއެއް ދައްކައި ދަނޑުން ފޮނުވާލާފައެވެ. މިއާއެކު މެޗުގެ ބާކީބައި އެޓީމުން ފުރިހަމަކުރީ އެއްކުޅުންތެރިޔަކު މަދުކޮށެވެ.

މުބާރާތުގެ ސެމީފައިނަލުގައި ސްޕެއިން ވާދަކުރަން ޖެހޭނީ މިރޭ ކުޅޭ ކުއާޓާ ފައިނަލުގެ ފަހު މެޗުގައި ޖަރުމަނާއި ފްރާންސް ވާދަކުރާ މެޗުން މޮޅުވާ ޓީމަކާއި ދެކޮޅަށެވެ.