މިއަހަރުގެ ޖޫންމަހުގެ ނިޔަލަށް ބޭންކްތަކަށް 364 މިލިއަން ގިނަ ޑޮލަރު ބޭންކްތަކަށް މާރުކޮށްފައިވާކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ.
ބޭންކިން ނިޒާމުގެ ތެރެއަށް ބޭރުފައިސާ ލިބުން ދަތިވުމުގެ މައްސަލައަށް ހައްލެއް ގެނައުމުގެ ގޮތުން އެމްއެމްއޭއިން ވަނީ މިއަހަރުގެ ޖެނުއަރީމަހުގެ އެއްވަނަ ދުވަހުން ފެށިގެން ޓޫރިޒަމް ވިޔަފާރިތަކަށް ޑޮލަރުން ލިބޭ އާމްދަނީގެ ވަކި އިންސައްތައެއް ބޭންކްތަކަށް މާރުކުރުމަށް ލާޒިމްކޮށްފައެވެ. އެމްއެމްއޭއިން ބުނީ ޖެނުއަރީމަހުން ފެށިގެން ޖޫންމަހުގެ ނިޔަލަށް ބޭންކްތަކަށް މާރުކުރި ޑޮލަރުގެ އަދަދު 364 މިލިއަން ޑޮލަރަށް އަރާއިރު، އެ ބޭންކުގެ އަމާޒަކީ ކުދި އަދި މެދުފަންތީގެ ވިޔަފާރިތަކަށް ވިއްކާ ޑޮލަރުގެ އަދަދު 50 ޕަސެންޓަށް އިތުރުކުރުން ކަމަށެވެ.
މަރުކަޒީ ބޭންކުން އާއްމުކުރި މައުލޫމާތަށް ބަލާއިރު މީގެ ކުރިން ބޭރުފައިސާގެ އާމްދަނީގެ ގޮތުގައި ރާއްޖޭގެ ބޭންކުތަކަށް ވަންނަ ޑޮލަރުގެ އަދަދު ފާއިތުވި ހަތަރު އަހަރުގައި ހުރީ 10 އިންސައްތައިގައެވެ. ނަމަވެސް، ބޭރުފައިސާގެ ގާނޫނަށް ގެނައި ބަދަލުތަކާއެކު މި އަދަދު 21 އިންސައްތަ އިތުރުވެފައިވާކަމަށް އެމްއެމްއޭއިން ބުންޏެވެ.
ބޭރުފައިސާއިން ލިބޭ އާމްދަނީގެ ތެރެއިން އެމްއެމްއޭ އަށް 90 އިންސައްތަ ގެނެވޭއިރު، ސަރުކާރުގެ އެކި ބޭނުންތަކަށާއި ރިޒާވް އިތުރުކުރުމަށް ޓަކައި އޭގެ 60 އިންސައްތަ ބޭނުންކުރާކަމަށް އެމްއެމްއޭއިން ބުންޏެވެ. މި ގޮތުން މި އަހަރުގެ މިހާތަނަށް ރާއްޖެއިން ބޭރުގެ އެކި ފަރާތްތަކަށް ދަރަނި އަދާކުރުމަށް 174 މިލިއަން ޑޮލަރު ވަނީ ހޭދަކޮށްފައިވާކަމަށް އެމްއެމްއޭއިން ވަނީ ބުނެފައެވެ. މިއީ ފާއިތުވި އަހަރުގެ މި މުއްދަތުގައި ދަރަންޏަށް ދައްކާފައިވާ އަދަދަށްވުރެ 51 އިންސައްތަ އިތުރު އަދަދެކެވެ.
އެމްއެމްއޭއިން ވަނީ މިދިޔަ ޖޫންމަހުގެ އެއްވަނަ ދުވަހުން ފެށިގެން ކޮންމެ ހަފްތާއަކު ބޭންކުތަކުން އޮތޯރިޓީއަށް ވިއްކަންޖެހޭ ބޭރު ފައިސާގެ މިންވަރު %60 އިން %90 އަށް އިތުރުކުރުމަށް ނިންމާފައެވެ. މި ބަދަލު ގެންނަން ޖެހުނު މައިގަނޑު ސަބަބަކީ، އެމްއެމްއޭއިން ބޭންކުތަކަށް ކޮންމެ ހަފްތާއަކު ވިއްކާ ބޭރު ފައިސާ މެދުވެރިކޮށް، މިހާރަށްވުރެ ހަރުދަނާ ގޮތެއްގައި، ވިޔަފާރިތަކަށް ބޭނުންވާ ބޭރު ފައިސާ ބޭންކުތަކުން ހަމަޖައްސައިދިނުމަށް މަގުފަހިކުރުމަށްކަމަށް އެ އޮތޯރިޓީން ބުންޏެވެ.
އެމްއެމްއޭއިން ބޭރުފައިސާ މާރުކުރުމުގެ ޤަވާއިދަށް ގެނައި އިސްލާހާ ގުޅިގެން ޓޫރިޒަމް ވިޔަފާރިކުރާ ކުންފުނިތަކުން މިހާރު، މަހެއްގެ މައްޗަށް އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރު، ނުވަތަ އާމްދަނީގެ 20 އިންސައްތަ ޑޮލަރު މާކުރަން ޖެހެއެވެ. ގެސްޓްހައުސްތަކުން މާރުކުރަންޖެހެނީ ބޮލަކަށް 25 ޑޮލަރު، ނުވަތަ އެފަރާތަކަށް މަހެއްގެ މައްޗަށް ލިބޭ އާމްދަނީގެ 20 އިންސައްތަ ޑޮލަރެވެ.
Advertisement
This content is created and paid for by advertisers and does not involve Voice Journalists
