ގެދޮރުވެރިޔާ ސްކީމުގެ ދަށުން ހުޅުމާލޭގައި ތަރައްޤީކުރަމުންދާ 4،000 ފްލެޓަށް ހުށަހެޅި ފަރާތްތަކުގެ ތެރެއިން ފްލެޓްތައް ލިބުނު ފަރާތްތަކުގެ މައުލޫމާތު ފަހިދިރިއުޅުން ކޯޕަރޭޝަން (އެފްޑީސީ) އާ ހަވާލުކުރަން ފަށައިފިއެވެ.

މިކަމާގުޅޭގޮތުން ހައުސިން މިނިސްޓްރީން މިއަދު ނެރުނު ބަޔާނެއްގައި ބުނެފައިވަނީ، ގެދޮރުވެރިޔާ ސްކީމުގެ ދަށުން ފްލެޓްތައް ލިބުނު ފަރާތްތަކާ އެތަންތަން ހަވާލުކުރުމަށް ކުރަމުންގެންދާ މަސައްކަތުގެ ތެރެއިން، ފްލެޓްތައް ލިބުނު ފަރާތްތަކުގެ މައުލޫމާތު އެފްޑީސީއާ ހިއްސާކުރަން ފަށާފައިވާކަމަށެވެ. މިނިސްޓްރީން ބުނީ، ފްލެޓްތަކުގެ އެއްބަސްވުމުގައި ސޮއިކުރުމުގެ ކަންކަން ކުރިއަށްގެންދާނީ ފަހިދިރިއުޅުން ކޯޕަރޭޝަނުން ކަމަށާއި، ސޮއިކުރުން ކުރިއަށްގެންދާނީ ފްލެޓްތަކުގެ މަސައްކަތް ނިމޭ ތަރުތީބުންކަމަށެވެ.

ހައުސިން މިނިސްޓްރީން ބުނީ ފަހިދިރިއުޅުން ކޯޕަރޭޝަނަށް ފޮނުވާ ފަރާތްތައް "ގެދޮރުވެރިޔާ ޕޯޓަލް" މެދުވެރިކޮށް އެންގޭނޭކަމަށެވެ. އެގޮތުން އެފަރާތްތަކަށް ފްލެޓާ ގުޅޭ ކަންކަމުގައި އެފްޑީސީ އަދި މިނިސްޓްރީން ގުޅައި އެސްއެމްއެސްކޮށް ނުހަދާނޭކަމަށް ހައުސިން މިނިސްޓްރީން ވަނީ ބުނެފައެވެ.

 ގެދޮރުވެރިޔާ ސްކީމުން ދޫކުރުމަށް ނިންމާފައިވާ 4،000 ފްލެޓްގައި ހިމެނޭ އެޕާޓްމަންޓްތައް ލިބުނު ފަރާތްތަކާއެކު މިފެށޭ ހަފްތާގެ ތެރޭގައި ސޮއިކުރަން ފަށާނޭކަމަށް އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވަނީ މިދިޔަ ހަފްތާގައި ވިދާޅުވެފައެވެ.

ސަރުކާރުގެ މަސައްކަތްތަކާ ގުޅޭ ފަހުގެ މަޢުލޫމާތު ހާމަކުރުމަށް ވަޒީރުންނާއިއެކު ކުރިއަށްގެންދާ އަހާ ޕްރޮގްރާމުގައި ރައްޔިތަކު ކުރި ސުވާލެއްގެ ޖަވާބުގައި މިނިސްޓަރު މުއްތަލިބް ވިދާޅުވީ ފްލެޓްތަކުގެ އެއްބަސްވުންތަކުގައި ސޮއިކުރުމަށް ވާންޖެހޭ ތައްޔާރީތައް މިހާރު ވަމުން އަންނަ ކަމަށެވެ. މިނިސްޓަރު ވިދާޅުވީ މިކަމަކީ ބުރަ މަސައްކަތެއްކަމަށާއި، މިހާރު އެކަމަށް ތަނެއް ހަމަޖެހި ޓެންޓްތައް ޖެހުމުގެ މަސައްކަތާއި އިދާރީ މުއައްޒަފުންނާއި، ކުރަންޖެހޭ އެހެނިހެން މަސައްކަތްތައް ކުރިއަށްދާކަމަށެވެ.

ގެދޮރުވެރިޔާ ސްކީމުގެ ދަށުން ހުޅުމާލޭގައި އިމާރާތް ކުރަމުންދާ ފްލެޓްތަކުގެ މަސައްކަތް ނިމެމުންދާ ވަރަކަށް އެ ތަންތަން ހަވާލު ކުރަމަށް ނިންމާފައިވާއިރު، ޖުލައިމަހުގެ ތެރޭގައި ބައެއް ފްލެޓްތަކަށް ވަދެވޭނެ ކަމަށް މިނިސްޓަރު މުއްތަލިބު ވަނީ މީގެ ކުރިން ވިދާޅުވެފައެވެ.

ފްލެޓްތަކުގެ މަސައްކަތް ކުރިއަށްދާގޮތް ބައްލަވާލެއްވުމަށް މިދިޔަ ޖޫންމަހުގެ 19 ވަނަ ދުވަހު ފްލެޓްތަކަށް ކުރެއްވި ޒިޔާރަތަށްފަހު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ އަމާޒަކީ ވީހާވެސް އަވަހަށް ފްލެޓްތަކަށް މީހުން ވެއްދުންކަމަށެވެ.