ޕާކިސްތާނުގެ ޕަންޖާބަށް ކުރަމުންދާ ވިއްސާރާގައި 48 ގަޑިއިރުގެ ތެރޭގައި އެ ސްޓޭޓުން 70 މީހުން މަރުވެއްޖެކަމަށް އެޤައުމުގެ ޕްރޮވިންސިއަލް ޑިޒާސްޓަރ މެނޭޖްމެންޓް އޮތޯރިޓީ (ޕީޑީއެމްއޭ) އިން ހާމަކޮށްފި އެވެ.

ޕާކިސްތާނުގެ ޕްރޮވިންސިއަލް ޑިޒާސްޓަރ މެނޭޖްމެންޓް އޮތޯރިޓީ (ޕީޑީއެމްއޭ) އިން ބުނީ ޕާކިސްތާނަށް މިހާރު ކުރަމުން އަންނަ ވިއްސާރައިގެ ސަބަބުން ގޭގޭގެ ފުރާޅު ވެއްޓުމާއި، ބިންގަނޑު ކަނޑައިގެން ދިއުމުގެ ސަބަބުން ބޮޑެތި ގެއްލުންތަކެއް ލިބިފައިވާކަމަށެވެ.

މިދިޔަ ޖޫން މަހުގެ 25 ވަނަ ދުވަހު ވިއްސާރަ މޫސުން ފެށުނު ފަހުން ވެސް 462 މީހުންނަށް ބޮޑެތި އަނިޔާތަކެއް ލިބިފައިވާ ކަމަށާއި، އެގޮތުން ބިން ތިރި ސަރަހައްދުތަކުގައި ދިރިއުޅޭ މީހުންނަށް މިކަމުގެ ސަބަބުން ނުރައްކާވުމުގެ ފުރުސަތު ބޮޑުކަމަށް ޕީޑީއެމްއޭ އިން ވަނީ ބުނެފައެވެ. ސަބަބަކީ ބިން ތިރި ހިސާބުތަކުގައި ފެން ބޮޑުވުމުގެ ފުރުސަތު ބިން އުސް ސަރަހައްދުތަކަށްވުރެ ބޮޑުވީމަ އެވެ. 

ޕީޑީއެމްއޭ އިން ބުނި ގޮތުގައި ފެން ބޮޑުވުމުގެ ހާދިސާތަކުގައި ޕާކިސްތާނުން އެންމެ ގިނަ މީހުން މަރުވެފައިވަނީ ހުކުރު ދުވަހު އެވެ. 

ޗަކްވާލް ސިޓީއަކީ ވިއްސާރާގައި އެންމެ ބޮޑު ގެއްލުމެއް ލިބިފައިވާ ސިޓީ އެވެ. ޗަކްވާލްއަށް ކުރި ވިއްސާރައިގެ ސަބަބުން ކޯރުތައް ބަންޑުންވުމުގެ ސަބަބުން ފެންބޮޑުވެ، ބިންގަނޑު ކަނޑައިގެން ގޮސް، އެތައް ބަޔަކު ވަނީ އެމީހުންގެ ގެދޮރު ދޫކޮށް ދާން މަޖުބޫރުވެފަ އެވެ.

ޕީޑީއެމްއޭއިން ވަނީ މި މަހުގެ 20 ވަނަ ދުވަހުން ފެށިގެން، ޕާކިސްތާނަށް އައު ވިއްސާރައެއް ފެށުމުގެ ފުރުސަތު ބޮޑުކަމަށް ބުނެ ހައި އެލަރޓް ވެސް ނެރެފަ އެވެ. އެހެންކަމުން ކުއްލި ހާލަތުގެ ޕްލޭންތައް ތަންފީޒު ކުރުމަށް ކަމާ ގުޅުންހުރި އިދާރާތަކަށް ޕީޑީއެމްއޭ އިން ވަނީ އިލްތިމާސްކޮށްފަ އެވެ. އަދި އެޤައުމުގެ ރައްޔިތުން މޫސުމަށް މިހާރަށް ވުރެ ބޮޑަށް ސަމާލުވުމަށް ޕީޑީއެމްއޭ އިން ވަނީ އަންގާފަ އެވެ.