ޑެލްޓާ އެއާލައިންގެ މަތިންދާބޯޓެއްގެ އިންޖީނުގައި އަލިފާންރޯވެއްޖެ
ޑެލްޓާ އެއާލައިންގެ މަތިންދާބޯޓެއް ނައްޓާލިތާ އިރުކޮޅެއްތެރޭ އިންޖީނުގައި އަލިފާން ރޯވެއްޖެއެވެ.
މި މަތިންދާބޯޓު ދަތުރުކުރީ ކެލިފޯނިޔާ ސިޓީގެ ލޮސް އޭންޖެލަސް އިން އެޓްލަންޓާއަށެވެ. އަލިފާން ރޯވެފައިވަނީ މި ބޯޓު އެޓްލަންޓާއަށް ދިޔުމަށް ނައްޓާލިތާ ހިނދުކޮޅެއް ތެރޭގައެވެ. ރޯވެފައިވަނީ ވާތްފަރާތު އިންޖީނުގައެވެ. އަލިފާންރޯވެފައި ވަނީ މި އެއާލައިންގެ 466 މަތިންދާބޯޓުގަ އެވެ.
އަލިފާން ރޯވި ވީޑިއޯއެއް ޖޯޝް ނަމަކަށް ކިޔާ މީހަކު ވަނީ ބީބީސީ ނިއުސް ޗެނަލް އާއި ހިއްސާ ކޮއްފައެވެ. މި ހާދިސާގައި އެއްވެސް މީހަކަށް ގެއްލުމެއް ލިބިފައިވާ ކަމަކަށް މައުލޫމާތު ލިބިފައެއްނުވެއެވެ. މަތިންދާބޯޓު ޖެއްސިތަނާ އަލިފާން ނިއްވުމުގެ މަސައްކަތް ވަނީ ކުރިއަށް ގެންގޮސްފައެވެ. އަދި މި ބޯޓުގެ ހިދުމަތްވަނީ ވަގުތީގޮތުން މަރާމާތައް މެދުކަނޑާ ލާފައެވެ.
މީގެ ކުރިންވެސް ޑެލްޓާ އެއާލައިންސް ގެ މަތިންދާބޯޓެއްގެ އިންޖީނުގައި ވަނީ މިއަހަރު 21 އޭޕްރިލްގައި ފްލޮރިޑާގެ އޯލެންޑޯ އިންޓަނޭޝަނަލް އެއާޕޯޓުގައި އޮއްވައި އަލިފާން ރޯވެފައެވެ. މި ހާދިސާގައި ވެސް އެއްވެސް މިހަކަށް އަނިޔާއެއް ލިބިފައެއްނުވެއެވެ. ކުރިން އަލިފާން ރޯވެފައިވަނީ މި އެއާލައިންގެ 1213 ބޯޓުގައެވެ.
މިއީ ޑެލްޓާ އެއާލައިންސްގެ މި އަހަރު ހިނގި ތިންވަނަ ހާދިސާއެވެ. އޭގެ ތެރެއިން މިއީ ދެވަނަ އަލިފާނުގެ ހާދިސާއެވެ. 2023 ވަނަ އަހަރުވެސް މި އެއާލައިންގެ ބޯޓެއްގެ ފިޔަގަނޑުގައި ވަނީ އަލިފާނުގެ ހާދިސާއެއް ހިނގާފައެވެ.
Advertisement
This content is created and paid for by advertisers and does not involve Voice Journalists
