އަނބިމީހާ ނުވަތަ ފިރިމީހާއަށް ބިންވެރިޔާ ސްކީމްގެ ދަށުން ގޯތި ލިބިފައި އޮތް ނަމަވެސް، ގެދޮރުވެރިޔާ ސްކީމްގެ ދަށުން ފްލެޓްވެސް ލިބޭނެ ކަމަށް ހައުސިން މިނިސްޓްރީން ބުނެފިއެވެ.

ހައުސިން މިނިސްޓްރީން ރޭ ކުރި އިއުލާނެއްގައި ބުނެފައިވަނީ، ބިންވެރިޔާ ސްކީމުން އެމީހެއްގެ އަނބިމީހާ/ފިރިމީހާއަށް ގޯތި ލިބިފައިވާ ފަރާތްތަކުގެ ތެރެއިން ގެދޮރުވެރިޔާ ސްކީމުން ފްލެޓު ލިބޭނީ، ބިންވެރިޔާ ސްކީމުން އެމީހެއްގެ އަނބިމީހާ/ފިރިމީހާއަށް ލިބިފައިވާ ގޯތި ދޫކޮށްލުމުން ކަމަށް ކުރިން އޮތް ނަމަވެސް، އެ މާއްދާއަށް އަމަލުނުކުރުމަށް ނިންމާފައިވާކަމަށެވެ. 

މިނިސްޓްރީން ބުނީ މިކަން މިގޮތަށް ނިންމި މައިގަނޑު އެއް ސަބަބަކީ މިކަމުގައި ރައްޔިތުންގެ ބޮޑު ކަންބޮޑުވުމެއް ހުރުމުންކަމަށެވެ.

މީގެ އިތުރުން ބިންވެރިޔާ ސްކީމުގެ ދަށުން މާލެ ސަރަޙައްދުން ބިން ދޫކުރުމަށް ހަމަޖެހިފައިވާ ހުޅުމާލެ ފޭސް 3 އަދި ގިރާވަރުފަޅު ހިއްކުމުގު މަސައްކަތް ކުރިއަށްދާތީއާ، ހިއްކާފައިވާ ބައެއް ބިންތަކުގައި އިމާރާތްކޮށް ދިރިއުޅެން ފެށުމަށް ވަގުތުނެގުމަކީވެސް އެ މާއްދާއަށް އަމަލުނުކުރަން ނިންމި އެއް ސަބަބުކަމަށް ހައުސިން މިނިސްޓްރީން ބުންޏެވެ.

މިކަމާ ގުޅިގެން ހައުސިން މިނިސްޓްރީން ބުނީ، ފުލެޓު ނަންބަރު ގުރުއަތު ނަގައި ލިބޭ ފްލެޓު ކަނޑައެޅިފައިވާ ފަރާތްތަކުގެ ތެރެއިން ބިންވެރިޔާ ސްކީމުން އަނބިމީހާ/ފިރިމީހާއަށް ގޯތި ލިބިފައިވާ އެއްވެސް ފަރާތަކަށް ޝަރުތު ހަމަނުވާކަމުގެ ލިޔުން މިހާތަނަށް ފޮނުވާފައި ނުވާނޭކަމަށެވެ.

ހައުސިން މިނިސްޓްރީން މިއަދު ބުނެފައިވަނީ ހުޅުމާލޭގައި ތަރައްޤީކުރަމުންދާ 4،000 ފްލެޓަށް ހުށަހެޅި ފަރާތްތަކުގެ ތެރެއިން ފްލެޓްތައް ލިބުނު ފަރާތްތަކުގެ މައުލޫމާތު ފަހިދިރިއުޅުން ކޯޕަރޭޝަން (އެފްޑީސީ) އާ ހަވާލުކުރަން ފަށާފައިވާކަމަށެވެ. ފްލެޓްތަކުގެ އެއްބަސްވުމުގައި ސޮއިކުރުމުގެ ކަންކަން ފަހިދިރިއުޅުން ކޯޕަރޭޝަނުން ކުރިއަށްގެންދާއިރު، ސޮއިކުރުން ކުރިއަށްގެންދާނީ ފްލެޓްތަކުގެ މަސައްކަތް ނިމޭ ތަރުތީބުންކަމަށްވެސް ހައުސިން މިނިސްޓްރީން ވަނީ ބުނެފައެވެ. 

ފަހިދިރިއުޅުން ކޯޕަރޭޝަނަށް ފޮނުވާ ފަރާތްތައް "ގެދޮރުވެރިޔާ ޕޯޓަލް" މެދުވެރިކޮށް އަންގަމުންދާއިރު، އެފަރާތްތަކަށް ފްލެޓާ ގުޅޭ ކަންކަމުގައި އެފްޑީސީ އަދި މިނިސްޓްރީން ގުޅައި އެސްއެމްއެސްކޮށް ނުހަދާނޭކަމަށްވެސް ހައުސިން މިނިސްޓްރީން ވަނީ ބުނެފައެވެ.