ދުނިޔޭގެ އެންމެބޮޑު ސީޕްލޭން އޮޕަރޭޓްކުރާ ކުންފުނި، ޓްރާންސް މޯލްޑިވިއަންގެ ޕައިލެޓުންގެ މުސާރައިގެ އެއްބައި ދިވެހި ރުފިޔާއިން ދިނުމަށް ނިންމި ނިންމުމަށް އަމަލު ނުކުރަން ނިންމައިފި އެވެ.

އެ ނިންމުމަށް އަމަލު ނުކުރަން ނިންމީ މުސާރައިގެ އެއްބައި ދިވެހި ރުފިޔާއިންދޭ މައްސަލާގައި ބައެއް ޕައިލެޓުންގެ އިތުރުން އިންޖިނިއަރުންނާއި، ކެބިން ކްރޫއިން ހިމެނޭގޮތަށް ބޮޑު އިހްތިޖާޖަކަށް ދާން ނިންމުމުންނެވެ. ޓީއެމްއޭގެ މުއައްޒަފުން ވަނީ މުސާރައިގެ ބައެއް ރުފިޔާއިން ދޭން ނިންމުމުން ދެން އެކަމުގައި އަމަލުކުރާނެ ގޮތާމެދު މަޝްވަރާކޮށްފައެވެ.

އެ މަޝްވަރާތަަކުގައި ނިންމީ މުސާރަދިނުމަށް ނިންމާފައިވާ ނިންމުން ބަދަލު ނުކޮށްފިނަމަ ޖުލައި މަހުގެ 26 ވަނަ ދުވަހުން ފެށިގެން ދަތުރުތައް ހުއްޓާލުމަށެވެ.

ނަމަވެސް އެ ނިންމުމަށް އަމަލު ނުކުރަން ނިންމާ ޑޮލަރުން މުސާރަ ދޭން ނިންމާފައިވާކަން މިހާރު މުވައްޒިފުންނަށް ވަނީ އަންގާފަ އެވެ. 

ޓީއެމްއޭގައި 1500 އަށްވުރެ ގިނަ މުއައްޒަފުން މަސައްކަތްކުރަމުންދާއިރު، މީގެ ތެރޭގައި ޕައިލެޓުންގެ އަދަދު 200 އަށް އަރައެވެ.

ޓީއެމްއޭއިން މުސާރައިގެ އެއްބައި ރުފިޔާއިން ދޭގޮތަށް ނިންމީ، ޓޫރިޒަމް ވިޔަފާރި ކުންފުނިތަކަށް ޑޮލަރުން ލިބޭ އާމްދަނީގެ ވަކި އިންސައްތައެއް ބޭންކުތަކަށް މާރުކުރަން ލާޒިމްކުރުމާ ގުޅިގެންނެވެ. އެގޮތުން ޓީއެމްއޭއިން ނިންމާފައިވަނީ މުސާރައިގެން 80 އިންސައްތަ ޑޮލަރުން އަދި 20 އިންސައްތަ ދިވެހި ރުފިޔާއިން ދިނުމަށެވެ.