ސުޕްރީމް ކޯޓް ވަގުތީ ގޮތުން ހިންގުމަށް އެ ކޯޓުގެ ފަނޑިޔާރު އަބްދުﷲ ހަމީދާ ހަވާލު ކުރުމަށް ޖުޑީޝަލް ސަރވިސް ކޮމިޝަން (ޖޭއެސްސީ) އިން ނިންމައިފިއެވެ.

ޖޭއެސްސީން އެގޮތަށް ނިންމާފައިވަނީ އުއްތަމަ ފަނޑިޔާރު މުއުތަސިމް އަދުނާނު ރިޓަޔާ ކުރައްވަން ނިންމެވުމާއި ގުޅިގެންނެވެ. ޖޭއެސްސީން ވަނީ ފަނޑިޔާރު މުއުތަސިމް ރިޓަޔާކުރެވުމަށް ހުށަހެޅުއްވި ހުށަހެޅުއްވުމާމެދު ވަނީ މަޝްވަރާ ކޮށްފަ އެވެ. އެ ގޮތުން މި ހަފްތާގެ ހޯމަ ދުވަހު, ފަނޑިޔާރު މުއުތަސިމް ޝަރަފުވެރިކަމާއެކު މަގާމުން ވަކިވެވަޑައިގަތުމުގެ ފުރުސަތު ދެއްވުމަށް ޖޭއެސްސީން ވަނީ ނިންމާފަ އެވެ.

ޖޭއެސްސީން ނެރެފައިވާ ނޫސް ބަޔާނެއްގައި ބުނެފައިވަނީ، ގަވާއިދު ނަންބަރު R-61/2023 (ފަނޑިޔާރުންގެ ރިޓަޔަރމަންޓް ގަވާއިދު) ގެ 2 ވަނަ މާއްދާގެ (ށ) ގެ ދަށުން ދިވެހިރާއްޖޭގެ އުއްތަމަފަނޑިޔާރު އޮނަރަބަލް އަޙްމަދު މުޢުތަޞިމް ޢަދުނާން، 21 ޖުލައި 2025 ވަނަ ދުވަހުން ފެށިގެން ފަނޑިޔާރުކަމުން ޝަރަފުވެރިކަމާއެކު ރިޓަޔަރކޮށްދިނުމަށް އެކޮމިޝަނުން ނިންމާފައިވާކަމަށެވެ.

އުއްތަމަ ފަނޑިޔާރު މުއުތަސިމް އަދުނާނު ރިޓަޔާ ކުރައްވަން ނިންމެވުމާއި ގުޅިގެން މާދަމާއިން ފެށިގެން އެ މަޤާމަށް ބޭފުޅަކު ހަމަޖެހެންދެން ސުޕްރީމް ކޯޓުގެ ހިންގުން ފަނޑިޔާރު ހަމީދުއާ ވަގުތީ ގޮތުން ހަވާލުކުރަން ޖޭއެސްސީން ވަނީ ނިންމާފައެވެ.

އުއްތަމަފަނޑިޔާރު އޮނަރަބަލް އަޙްމަދު މުޢުތަޞިމް ޢަދުނާން ވަނީ ދިވެހިރާއްޖޭގެ ޝަރުޢީ ދާއިރާއަށް ވަރަށް ދިގު މުއްދަތަކަށް ޚިދުމަތްކޮށްދެއްވާފަ އެވެ. އުއްތަމަފަނޑިޔާރުގެ ހައިސިއްޔަތުންނާއި އަދި ދިވެހިރާއްޖޭގެ ސުޕްރީމްކޯޓުގެ ފަނޑިޔާރެއްގެ ހައިސިއްޔަތުން 09 އަހަރާއި 07 މަހާއި 12 ދުވަހު ޝަރުޢީ ދާއިރާއަށް މުއުތަސިމް ވަނީ ޚިދުމަތް ކުރައްވާފަ އެވެ.