ކޭ-ޕާކް ރެސިޑެންސް ގެ ނަމުގައި އަމިއްލަ ކުންފުންޏަކުން ހުޅުމާލޭގައި ފަށައިފައިވާ ހައުސިންގ މަޝްރޫޢުއާ ގުޅިގެން ދިމާވެފައިވާ މައްސަލަތައް ހައްލުނުވެ ދިގުލައިގެން ދާތީ، އެކަމުގެ ކަންބޮޑުވުން ފާޅުކޮށް މަޖިލީހަށް ޤަރާރެއް ހުށަހަޅައިފިއެވެ. 

ރައްޔިތުންގެ މަޖިލީހަށް މި ގަރާރު ހުށަހެޅުއްވީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) އެވެ.

މެންބަރު ހުށަހެޅުއްވި މައްސަލާގައި ވިދާޅުވީ، އަމިއްލަ ކުންފުންޏަކުން ފެށި ކޭ-ޕާކް ރެސިޑެންސް މަޝްރޫޢުން ފްލެޓް ގަތުމަށް ޓަކައި އެއްބަސްވުމުގައި ސޮއިކޮށް، ގިނަ އަދަދެއްގެ ބަޔަކު ޑައުން-ޕޭމަންޓް ދައްކައި، އަދި ބައެއް މީހުން ފްލެޓްގެ ޖުމްލަ އަގުވެސް ދައްކައިފައިވީ ނަމަވެސް އެ މަޝްރޫޢުގެ މަސައްކަތް ނުނިމި، އެތަކެއް އަހަރުތަކެއް ފާއިތުވެގެން ގޮސްފައިވާ ކަމަށެވެ. 

އަދި އެ މަޝްރޫޢުގެ ފްލެޓްތަކުގެ ތެރެއިން 1 ފްލެޓް 1 ފަރާތަށްވުރެ ގިނަ ފަރާތްތަކަށް ވިއްކުމަށް އެއްބަސްވެފައިވާކަމާއި، ފްލެޓް ވިއްކުމުގެ ނަމުގައި ވަރަށް ގިނަ ފަރާތްތަކެއް އަތުން ފައިސާ ނަގައިފައިވާކަން އެނގެން އޮތް އިރު، އެ ފަރާތްތަކުގެ ތެރެއިން ފްލެޓް ދޭނެ ފަރާތެއް ކަނޑަނޭޅި ލަސްވަމުން ދިއުމުގެ ސަބަބުން އެފަރާތްތަކުގެ ޙައްޤުތައް ރައްކާތެރިކުރެވޭނެކަމުގެ ޔަގީންކަން ކުޑަވަމުންދާ ކަމަށް ގަރާރުގައި ބުނެފައިވެއެވެ. 

ހަމަ އެހެންމެ، ފައިސާ ދެއްކުމަށްފަހު ފްލެޓް ނުލިބި ލަސްވަމުން ދިއުމުގެ ސަބަބުން މާލީ ގޮތުން ގެއްލުންވެ، އެ ފައިސާ އެ މަޝްރޫޢުގައި ހިފެހެއްޓިފައި ހުރުމުގެ ސަބަބުން އެހެން މަޝްރޫޢަކުން ފްލެޓެއް ގަތުމުގެ ފުރުސަތު ބަންދުވެފައިވާ ކަންވެސް ގަރާރުގައި ވަނީ ފާހަގަކޮށްފައެވެ. 

މީގެ އިތުރުން، ފްލެޓެއް ގަތުމަށް އެއްބަސްވުމެއްގައި ސޮއިކޮށްފައި އޮތުމަކީ، އެހެން ފްލެޓެއް ނުލިބޭނެ ސަބަބެއް ކަމަށް އަސާސީ ބޯހިޔާވަހިކަން ފޯރުކޮށްދިނުމަށް ސަރުކާރުން ހިންގާ ސޯޝަލް ހައުސިންގ މަޝްރޫޢުތަކުގެ ޝަރުތެއްގެ ގޮތުގައި ކަނޑައަޅައިފައި އޮންނާތީ، ކޭޕާކު މަޝްރޫޢުން ފްލެޓް ގަތުމަށް އެއްބަސްވުމުގައި ސޮއިކޮށްފައިވާތޫލީ ސަރުކާރުން ހިންގާ ސޯޝަލް ހައުސިންގ މަޝްރޫޢުތަކަށް ފޯމު ހުށަހެޅުމަށްވެސް ހުރަސްއެޅިފައިވާ ކަމަށް ގަރާރުގައި ބުނެފައިވެއެވެ. 

މެންބަރުގެ ގަރާރުގައި ބުނެފައިވާގޮތުން، މި މައްސަލަތައް ހައްލުކޮށްދޭތޯ ދައުލަތުގެ އެކި މުވައްސަސާތަކަށް ސިޓީ ހުށަހަޅައި މަސައްކަތް ކިރެވިފައިވާ ކަމަށާ ނަމަވެސް އަދިވެސް ހައްލު ނުވާތީ، މިކަމާމެދު 20 ވަނަ ރައްޔިތުންގެ މަޖިލީހުގެ މެންބަރުން ދެކެވަޑައިގަންނަވާ ގޮތެއް ދެނެގަތުމަށްޓަކައި، ޤަރާރު ހުށަހެޅުއްވީ ކަމަށެވެ.