އުއްތަމަ ފަނޑިޔާރު އަލްއުސްތާޛު އަހުމަދު މުތަސިމް އަދުނާން ފަނޑިޔާރުކަމުގެ މަގާމުން ޝަރަފްވެރިކަމާއެކު ރިޓަޔާ ކުރައްވައިފިއެވެ.

މުއުތަސިމް ރިޓަޔާ ކުރައްވަން ހުށަހަޅުއްވާފައި ވަނީ މިދިޔަ މެއި މަހުއެވެ. އަދި މިއަދު އެމަނިކުފާނު ރިޓަޔާ ކުރައްވާފައިވާއިރު، އެކަމާއި ގުޅިގެން ސުޕްރީމް ކޯޓުން ކުރި ޕޯސްޓުގައި ވަނީ ދިވެހިރާއްޖޭގެ އުއްތަމަ ފަނޑިޔާރުކަމުގައި ރާއްޖޭގެ ޝަރުޢީ ދާއިރާއަށް ކޮށްދެއްވާފައިވާ އަގުހުރި ޚިދުމަތްތަކަށް ޝުކުރު އަދާކޮށްފައެވެ.

އެންމެ ފުރަތަމަ ސުޕްރީމް ކޯޓުގެ ފަނޑިޔާރެއްގެ ގޮތުގައި މުއުތަސިމް ހިދުމަތް ކުރެއްވީ އޮގަސްޓު 10، 2010 އިން 2014 ވަނަ އަހަރުގެ ނިޔަލަށެވެ. އެފަހުން ދެވަނަ ފަހަރަށް ސުޕްރީމް ކޯޓުގެ ފަނޑިޔާރަކަށް ވެވަޑައިގެން އުއްތަމަ ފަނޑިޔާރުގެ ހުވާ މުއުތަސިމް ކުރެއްވީ ޑިސެމްބަރު 8، 2019 ގަ އެވެ.

އުއްތަމަ ފަނޑިޔާރު މުއުތަސިމްއަކީ ރާއްޖޭގައި ޝަރަފްވެރިކަމާއެކު މަގާމުން ރިޓަޔަރ ކުރައްވާ ފުރަތަމަ އުއްތަމަ ފަނޑިޔާރަށެވެ. މީގެ ކުރިން އައްޔަންކުރެއްވި ހުރިހާ އުއްތަމަ ފަނޑިޔާރުންނަކީ މަގާމުން ދުރުކުރެއްވި ބޭފުޅުންނެވެ.

އުއްތަމަ ފަނޑިޔާރުކަމުގެ މަގާމަށް މުއުތަސިމް ރިޓަޔާ ކުރެއްވުމާއި ގުޅިގެން ސުޕްރީމް ކޯޓު ވަގުތީ ގޮތުން ހިންގުމުގެ ޒިންމާ ފަނޑިޔާރު އަބްދުالله ހަމީދުއާ ހަވާލުކޮށްފައިވާ ކަމަށް ސްޕްރީމް ކޯޓުން ވަނީ ބުނެފައެވެ. 

އައު އުއްތަމަ ފަނޑިޔާރަކު އައްޔަންކުރެވެންދެން އުއްތަމަ ފަނޑިޔާރެއްގެ އެންމެހައި ޒިންމާތައް ވަގުތީގޮތުން އަދާކުރައްވާނީ ފަނޑިޔާރު ހަމީދެވެ.