މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގައި މަސައްކަތްކުރާ އަޑުއިވުމުގެ ނުކުޅެދުންތެރިކަން ހުންނަ ފަރާތްތަކަށް ވެލާނާ އިންޓަރނޭޝަނަލް އެއަރޕޯޓްގެ އައު ޓަރމިނަލާއި ގުޅޭ މައުލޫމާތު ދޭން ހާއްސަ ސެޝަނެއް ކުރިއަށް ގެންގޮސްފި އެވެ.

މިކަމާއި ގުޅިގެން އެމްއޭސީއެލް އިން ބުނެފައިވަނީ މި ސެޝަންގައި އެމްއޭސީއެލްގައި މަސައްކަތްކުރާ އަޑުއިވުމުގެ ނުކުޅެދުންތެރިކަން ހުންނަ 16 މުވައްޒަފަކު ބައިވެރިވެފައިވާ ކަމަށެވެ. އެ މުވައްޒަފުންނަށް އައު ޓަރމިނަލުން މަރުހަބާ ވިދާޅުވެފައިވަނީ އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފު މުހައްމަދު އެވެ.

ފާހަގަކޮށްލަންޖެހޭ ގޮތުގައި މި ސެޝަންގައި އެ މުވައްޒަފުން ކުރަން ބޭނުންވާ ސުވާލުތަކަށް ޖަވާބު ދީފައިވެ އެވެ. އެ ސުވާލުތަކަށް ޖަވާބު ދެއްވުމަށް ޑެފް އެސޯސިއޭޝަން އޮފް މޯލްޑިވްސްގެ ޑިރެކްޓަރު އޮފް ފައިނޭންސް އަދި އިންޓަޕްރެޓާ ސަޢީދު އަތުހަރު ވަނީ ބައިވެރިވެ ވަޑައިގެންފަ އެވެ.

މި ސެޝަންގައި ބައިވެރިވި އެމްއޭސީއެލްގެ ހައުސްކީޕަރު ކަމަށްވާ ސުޒްނާ މުޙައްމަދު ސަޢީދު ބުނީ ކުޑަ ޓަރމިނަލަކުން ބޮޑު ޓަރމިނަލަކަށް ބަދަލުވާތީ ވަރަށް އުފާވާ ކަމަށާއި އެކަމަށް ޝުކުރުވެރިވާ ކަމަށެވެ. އަދި އައު ޓަރމިނަލް ވަރަށް ރީތި ކަމަށާއި އެކި ޤައުމުތަކުން އައު ޓަރމިނަލަށް އަންނާނެ ކަމަށް އުއްމީދު ކުރާ ކަމަށްވެސް އޭނާ ބުންޏެވެ.

ޑޮލީ ސާވިސަސް އެންޑް މެއިންޓަނެންސްގެ ޓެކްނިކަލް ސަޕޯޓް އަޙުމަދު އަޝްފާގު ބުނީ, އައު ޓަރމިނަލަށް ފުރަތަމަ ފަހަރަށް ވަނުމުން ވަރަށް ގިނަ ކަންކަން އެނގިގެން ސާފުވެގެން ހިނގައްޖެ ކަމަށާއި، ނުކުޅެދުންތެރިކަން ހުންނަ ފަރާތްތަކަށް އެހީވާނެ މީހުން ތިބޭނަމަ އިތުރަށް އައު ޓަރމިނަލަށް އިތުރު ފުރިހަމަކަމެއް ލިބިގެންދާނެ ކަމަށް އޭނާ ބުންޏެވެ.

ހާއްސަ އެހީއަށް ބޭނުންވާ ފަރާތްތަކަށް ވަޒީފާގެ ފުރުސަތުތަށް ފަހިކޮށްދީ އެހީތެރިކަން ފޯރުކޮށްދިނުމަކީ އެމްއޭސީއެލް އިން އަބަދުވެސް ވަރަށް ބޮޑު އިސްކަމެއްދީގެން ކުރަމުން އަންނަ ކަމެކެވެ. އެގޮތުން ހާއްސަ އެހީއަށް ބޭނުންވާ ފަރާތްތަކަށް ހާއްސަކޮށްގެން އެމްއޭސީއެލް އިން ތަފާތު އިންޓަރންޝިޕް ޕްރޮގްރާމްތައް ވެސް ކުރިއަށް ގެންދަމުން އަންނަކަން ފާހަގަކޮށްލަންޖެހެ އެވެ.