މައްސަލަ ހައްލުކޮށް އައްޑޫގެ ބޮޑު ބަޔަކަށް ކަރަންޓު ދީފީ
އައްޑޫ ސިޓީއަށް ދިމާވި ކަރަންޓުގެ މައްސަލަ ހައްލުކޮށް، އައްޑޫގެ ބޮޑު ބަޔަކަށް ކަރަންޓް ދީފި އެވެ.
އައްޑޫ ސިޓީން ކަރަންޓު ކެނޑިފައިވަނީ މިއަދު މެންދުރު 12:30 ހާއިރު އެވެ. އައްޑޫގެ ޖަނަރޭޓަރަކަށް ދިމާވި މައްސަލައަކާއި ގުޅިގެން މުޅީ އައްޑޫ ސިޓީން ވަނީ ކަރަންޓް ކެނޑިފަ އެވެ. އެހެންނަމަވެސް ގާތްގަނޑަކަށް ދޮޅުގަޑިއިރެއްހާއިރު ފަހުން އައްޑޫގެ 6 ސަރަޙައްދެއް ފިޔަވާ ބޮޑު ބަޔަކަށް މިހާރު ވަނީ ކަރަންޓު ދީފަ އެވެ.
މިވަގުތު ކަރަންޓު ނުދެވި ހުރި ސަރަޙައްދުތަކަށް ކަރަންޓު ދިނުމުގެ މަސައްކަތް ފެނަކައިން އަންނަނީ ކުރަމުންނެވެ.
ޒަމާނުންސުރެ އައްޑޫ ސިޓީއަށް ދިމާވެފައިވާ ކަރަންޓްގެ މައްސަލަ ހައްލުނުވެ ގިނަ ދުވަސްތަކެއްވެފައިވާތީ އައްޑޫ ސިޓީގެ ރައްޔިތުން ދަނީ ކަންބޮޑުވުން ފާޅުކުރަމުންނެވެ. ފާހަގަކޮށްލަންޖެހޭ ގޮތުގައި މިދިޔަ ހަފްތާގެ ހޮނިހިރު ދުވަހު ވެސް މުޅި އައްޑޫ ސިޓީން ވަނީ ކަރަންޓު ކެނޑިފަ އެވެ.
އައްޑޫ ސިޓީއަށް ދިމާވެފައިވާ ކަރަންޓުގެ މައްސަލައަށް ދާއިމީ ހައްލެއް ގެނައުމަށްޓަކައި ނިމިދިޔަ 2024 ވަނަ އަހަރުގެ އޭޕްރީލް މަހު ފެނަކައިން ވަނީ ޗައިނާގެ ކުންފުންޏެއް ކަމަށްވާ ޑޮންފެން އިލެކްޓްރިކް (ޑީއީސީ)އާ ހަވާލުކޮށްފަ އެވެ.
Advertisement
This content is created and paid for by advertisers and does not involve Voice Journalists
