ހުޅުމާލޭގައި ބިނާކުރާ ވަޤުފް ޢިމާރާތް, ދާރުލް ސަލާމް އާއި މާލޭގައި ބިނާކުރާ ވަޤުފް ޢިމާރާތް, ދާރުލް އަރްޤަމް ޢިމާރާތް ކޮށްދޭނެ ބަޔަކު ހޯދަން އިސްލާމިކް މިނިސްޓްރީން އިއުލާނު ކޮށްފި އެވެ.

ދާރުލް އަރްޤަމް އިމާރާތް ކުރަނީ މާލޭ ސިޓީގެ ހެންވޭރު އަވަށުގެ 64 ނަންބަރު ކޮށީގައެވެ. ދާރުލް ސަލާމް އިމާރާތް އަޅަނީ ހުޅުމާލެ ފުރަތަމަ ފިޔަވަހީގައި (ލޮޓް ނަންބަރު: 11646) ގަ އެވެ.

އިސްލާމިކް މިނިސްޓްރީން ބުނީ އެ ދެ އިމާރާތް ކޮށްދޭނެ ބަޔަކު ހޯދާ ކަމަށެވެ. މި ބީލަން ހުޅުވާލެވިފައިވަނީ، ވިޔަފާރި ރަޖިސްޓްރީ ކުރުމުގެ ގާނޫނު ގެ ދަށުން ވިޔަފާރި ރަޖިސްޓްރީ ކޮށްފައިވާ ފަރާތްތަކުގެ ތެރެއިން "ޢިމާރާތްކުރުމުގެ ޢަމަލީ މަސައްކަތްކުރާ ފަރާތްތަކުގެ ޤަވާއިދު" ގައިވާ ގޮތުގެމަތީން ޢިމާރާތްކުރުމުގެ މަސައްކަތް ކުރުމަށް ރަޖިސްޓަރީ ވެފައިވާ ފަރާތްތަކަށް މިނިސްޓްރީން ބުންޏެވެ.

ބީލަމުގައި ބައިވެރިވާން އެދޭ ފަރާތްތަކުން ޖުލައި 31 ވާ ބުރާސްފަތި ދުވަހުގެ ކުރީން ރަޖިސްޓްރީ ކުރުމަށް ވަނީ އެދިފަ އެވެ. އަންދާސީ ހިސާބު ހުށަހެޅުން އޮންނާނީ އޮގަސްޓް 21 ވާ ބުރާސްފަތި ދުވަހުގެ 11:00 ގައެވެ.

ވަޤުފު އިމާރާތް އަޅަން ބޭނުންވާ ފަރާތްތަކަށް، ވަޤުފު ޤާއިމުކުރުމުގެ ފުރުޞަތު ވެސް ސަރުކާރުން ވަނީ ހުޅުވާލާފަ އެވެ.