ރަޝިޔާގެ އިރުމަތީގައި، ސޯވިއެޓް ޒަމާނުގެ އޭ.އެން-24 (An-24) މަރުކާގެ މަތިންދާ ބޯޓެއް ވެއްޓި، އެ ބޯޓުގައި ދަތުރުކުރި އެންމެން މަރުވެއްޖެއެވެ.

ރަޝިޔަން އެމެޖެންސީ ސާވިސަސް އިން ބުނީ، މި ހާދިސާ ހިނގާފައިވަނީ އަމޫރު އޮބްލާސްޓްގެ ޓިންޑާ ސިޓީއާ ގާތްގަނޑަކަށް 15 ކިލޯމީޓަރު ދުރުގައި ކަމަށެވެ. 

އަންގާރާ އެއަރލައިންސްގެ މި ބޯޓުގައި 43 ފަސަންޖަރުންނާއި 6 ފަޅުވެރިން ހިމެނޭގޮތަށް ޖުމްލަ 49 މީހުން ދަތުރުކުރިއެވެ. މި ފަސަންޖަރުންގެ ތެރޭގައި ފަސް ކުޑަކުދިން ވެސް ހިމެނެއެވެ.

ބޯޓު ދަތުރުކުރަމުން ދިޔައީ ޚަބަރޮވްސްކްއިން ބްލަގޮވެޝްޗެންސްކް މެދުވެރިކޮށް ޓިންޑާއަށް ކަމަށާއި، ބޯޓު ފުރަތަމަ ފަހަރު ޖެއްސުމަށް މަސައްކަތްކޮށް ނާކާމިޔާބުވުމުން ދެވަނަ ފަހަރަށް ޖެއްސުމަށް މަސައްކަތްކުރަމުން ދަނިކޮށް ރާޑަރުން ގެއްލުނީ ކަމަށް ރަޝިޔާގެ މީޑިއާއިން ރިޕޯޓްކުރެއެވެ.

އެއް މަސްދަރަކުން އިންޓަރފެކްސް އަށް މައުލޫމާތު ދެމުން ބުނެފައިވަނީ "ބޯޓު ޖައްސާ ހިސާބާ ކައިރިވެފައި ވަނިކޮށް ބޯޓާ ގުޅުން ކެނޑުނު“ ކަމަށެވެ.

މި ހާދިސާއާ ގުޅިގެން ރަޝިޔާގެ އޭވިއޭޝަން އެޖެންސީ، ރޮސާވިއޭޝިޔާއިން ވަނީ ގެއްލުނު ބޯޓު ހޯދުމަށް ކުއްލި ޙާލަތުގެ ޓީމުތައް ފޮނުވާފައެވެ. ބާޒާ އައުޓްލެޓްގެ ރިޕޯޓްގައިވާ ގޮތުން ފުރަތަމަ ހޯދުމުގެ މަސައްކަތުގައި އެމް.އައި-8 (Mi-8) ހެލިކޮޕްޓަރަކާއި 12 މީހުންގެ ޓީމެއް ބޭނުންކުރިއެވެ. ނަމަވެސް ބޯޓުގެ އެއްވެސް ނިޝާނެއް ނުފެނުމުން ކުއްލި ޙާލަތާ ބެހޭ މިނިސްޓްރީ (އެމަރކޮމް) އިން އިތުރު ވައިގެ ވަސީލަތްތައް ބޭނުންކުރިއެވެ. އެ ކުރި މަސައްކަތުން ބޯޓު ވަނީ ފެނިފައެވެ. 

ޓީ.އޭ.އެސް.އެސް (TASS) އިން ރިޕޯޓްކޮށްފައިވާ ގޮތުން މި ބޯޓަށް ގާތްގަނޑަކަށް 50 އަހަރު ވެފައިވީ ނަމަވެސް 2036 ވަނަ އަހަރާ ހަމައަށް ބޯޓަށް ދަތުރުކުރެވޭނެ ކަމުގެ ސެޓްފިކެޓް އޮތެވެ.