އިންޑިޔާގެ ޤައުމީ ފިރިހެން ފުޓްބޯޅަ ޓީމުގެ ކޯޗުކަމުގެ މަޤާމަށް ކުރިމަތިލުމުގެ ފުރުސަތު ހުޅުވާލުމުން، އެމަގާމަށް ކުރިމަތިލީ ކޯޗުންގެ  ތެރޭގައި ބާސެލޯނާގެ ކުރީގެ ކޯޗު ޒަވީ ހަނާންޑޭޒް ހިމެނުނު ނަމަވެސް ޝޯޓް ލިސްކުރި ތިން ކޯޗުންގެ ތެރޭގައި ޒަވީއެއް ނުހިމެނެއެވެ.

އުމުރުން 45 އަހަރުގެ ޒަވީ ބާސެލޯނާގެ ކޯޗުކަމުން ވަކިކުރީ މިދިޔަ އަހަރުގެ މެއި މަހު އެވެ. އަދި ބާސެލޯނާގެ ކޯޗުކަމުން ވަކިވި ފަހުން އެއްވެސް ޓީމަކާ ހަވާލުނުވެ ހުރި ޒަވީ، އަށް، މިވީ މުއްދަތުގެ ތެރޭގައި އެކި ޓީމުތަކުގެ އޮފާތައް ލިބުނު ނަމަަވެސް އޭނާ އެއްވެސް ޓީމެއްގެ ހުށަހެޅުން ގަބޫލުކޮށްފައެއްނުވެ އެވެ.

އިންޑިއާގެ ކޯޗުކަމުން މަނޯލޯ މާކުއޭޒް އިސްތިއުފާދިނުމުން، އެމަގާމަށް ކުރިމަތިލީ 170 ކޯޗުންގެ ތެރެއިން ތިން ކޯޗެއްގެ ނަން މިހާރު ވަނީ ޝޯޓް ލިސްޓުކޮށްފަ އެވެ. އޭގެ ތެރޭގައި ހިމެނެނީ، ދެ ފަހަރެއްގެ މަތިން އިންޑިއާ އަށް ކޯޗުކޮށްދިން އަދި ދާދި ފަހުން ޕާކިސްތާން ޓީމުން ވަކިވި، ސްޓެފަން ކޮންސްޓަންޓިންގެ އިތުރުން، ހާލިދު ޖާމިލް އަދި ސްޓެފަން ޓާކޮވިޗް އެވެ.

މީޑިޔާ ރިޕޯޓްތައް ބުނާގޮތުގައި ޒަވީ ހެނާންޑޭޒް އަށް އިންޑިއާގެ ގައުމީ ފުޓްބޯޅަ ޓީމުގެ ކޯޗުކަން ނުދިނީ އޭނާ އަށް ދޭނެ މުސާރަ އޯލްއިންޑިއާފުޓްބޯލް ފެޑެރޭޝަން (އޭއައިއެފްއެފް) އަށް ހަމަޖައްސައި ދެވެން ނެތުމުންނެވެ.

ރިޕޯޓްތައް ބުނާގޮތުގައި އިންޑިއާގެ ކޯޗުކަމުގެ މަޤާމަށް ކުރިމަތިލީ ކޯޗުންގެ ތެރޭގައި ޒާވީގެ އިތުރުން އަފްގާނިސްތާނާއި ރާއްޖެ އަދި ތަޖިކިސްތާނަށް ކުރިން ކޯޗުކޮށްދިން ޕީޓަ ސެގާޓް އާއި ލިވަޕޫލްގެ ކުރީގެ ދެ ކުޅުންތެރިން ކަމަށްވާ ރޮބީ ފައުލާ އަދި ހެރީ ކިއުލް ވެސް ހިމެނެ އެވެ.

ފުރަތަމަ މީޑިއާގައި އާންމުވި ލިސްޓުގައި، ބާސެލޯނާގެ ކުރީގެ ކޯޗު ޒަވީގެ ނަން ނުހިމެނެއެވެ. ނަމަވެސް, ޒަވީ ވެސް އެޕްލިކޭޝަން ހުށަހެޅިކަން، އިންޑިއާގެ ގައުމީ ޓީމުގެ ކޮމިޓީގެ މެމްބަރަކު ވަނީ މީޑިއާއަށް ޔަގީންކޮށްދީފަ އެވެ.

އޭއައިއެފްއެފްގެ އޮފިޝަލަކާ ހަވާލާދީ މީޑިއާގައި ރިޕޯޓްކޮށްފަައިވަނީ، ޒަވީއާ އިންޑިއާ ޓީމު ހަވާލުކުރަން ނިންމި ނަމަވެސް، އެންމެ ބޮޑު ގޮންޖެހުމަކަށްވާނީ، އޭނާ އަށް އަހަރެއްގެ މައްޗަށް ދޭން ޖެހޭ މުސާރައިގެ ބަޖެޓް ފެޑެރޭޝަން ތެރެއިން ހަމަޖެހެން ނެތުމެވެ. ގަތަރުގެ އަލް ސާދަށް ވެސް ކޯޗުކޮށްދިން ޒަވީގެ މުސާރަ އުޅެނީ އަހަރަކަށް 10-20 މިލިއަން ޑޮލަރުގަ އެވެ.