ދިވެހި ދައުލަތަށް ވަރަށް ގިނަ އަހަރުތަކެއް ވަންދެން ހިދުމަތްކުރެއްވި ނިޝާން ޢިއްޒުއްދީނުގެ ޢިއްޒަތުގެ ވެރިޔާ ޙަސަން ޞާބިރު ރަސްމީ އިއްޒަތުގައި ފަސްދާނުލައިފި އެވެ.

މިއަދުގެ އަސްރު ނަމާދަށް ފަހު ޞާބިރުގެ ޖަނާޒާ ބާއްވާފައި ވަނީ ގަލޮޅު ސަހަރާގަ އެވެ. ކަށުނަމާދު ކުުރުމާއި މޫނު ދެއްކުން އޮތީ އިސްލާމީ މަރުކަޒުގަ އެވެ.

ސޯބިރުގެ ޖަނާޒާގައި ރައީސް މުއިއްޒުއާ ދައުލަތުގެ އިސްވެރީން ބައިވެރިވެވަޑައިގެންފައިވެ އެވެ.

ހަސަން ސާބިރު އަވަހާރަވީ ޓްރީޓޮޕް ހޮސްޕިޓަލުގައި މިއަދު ހެނދުނުގެ ވަގުތެއްގައެވެ. އަވަހާރަވީ ކެންސަރަށް ފަރުވާ ހޯއްދަވަމުން ގެންދަވަނިކޮށެވެ. ހަސަން ސާބިރު އަވަހާރަވިއިރު މިނިވަންދުވަހުގެ ޖަލްސާގައި އެމަނިކްފާނަށްވަނީ ރައީސުލްޖުމްހޫރިއްޔާ ދެއްވާ ނިޝާން ޢިއްޒުއްދީނުގެ ޢިއްޒަތުގެ ވެރިޔާގެ ލަގަބުވެސް އަރުވާފަެވެ.

ޚާއްޞަ ގޮތެއްގައި ޙަސަން ޞާބިރު ފާހަގަވެގެން ގޮސްފައިވަނީ ދިވެހި ޤައުމުގެ އިޤްތިޞާދާ ބެހޭ ހުރިހާ ދާއިރާއެއްގައި ދިގު މުއްދަތެއް ވަންދެން ޚިދުމަތް ކުރެއްވި ބޭފުޅެއްގެ ގޮތުގައެވެ. އެ ދާއިރާތަކުގެ ތެރޭގައި ފަތުރުވެރިކަމާއި މަސްވެރިކަމާއި ދަނޑުވެރިކަން ހިމެނެއެވެ. އަދި ރާއްޖޭގެ ތަރައްޤީގެ މަޝްރޫޢުތައް ރޭވެވުމާއި ހިންގެވުމުގައިވެސް އެމަނިކުފާނަކީ ފާހަގަކޮށްލެވޭ ބޭފުޅެކެވެ.

ހަސަން ސޯބިރުގެ މޭސްތިރިކަމުގެ ދަށުން ގއ ކޫއްޑޫގައި މަސްވެރިކަމުގެ އިންވެސްޓްމަންޓްތައް ފެށިގެންދިޔައިރު، ބޯހިމެނުން ފެށުމުގައި އެމަނިކްފާނު އަދާކުރައްވާފައިވާ ދައުރު ފާހަގަކޮށްލެވެއެވެ.