މިއަދުވެސް ރާއްޖޭގެ އެކި ސަރަހައްދުތަކަށް މޫސުން ގޯސްވާނޭކަމަށް މޯލްޑިވްސް މީޓިއޮލޮޖިކަލް ސެންޓަރުން ލަފާކޮށްފިއެވެ.
މެޓް އޮފީހުން ވަނީ ކުރިއަށް އޮތް 24 ގަޑިއިރު ރާއްޖޭގެ އެކި ސަރަހައްދުތަކަށް މޫސުން ގޯސްވާނޭކަމަށް ލަފާކޮށް ވައިޓް އެލާޓްވެސް ނެރެފައެވެ. ހއ އަތޮޅުން ފެށިގެން ވ އަތޮޅަށް މިއަދު މެންދުރު 12 ޖެހުމާ ހަމަޔަށް ވައިޓް އެލާޓް ނެރެފައިވާއިރު، މެޓް އޮފީހުން ބުނެފައިވަނީ އެގަޑިތަކުގައި 19 މޭލާއި 24 މޭލަށް އަދި ވިލާގަނޑުގައި 45 މޭލަށް ވައިގަދަވާނޭކަމަށް ލަފާކުރެވޭ ކަމަށެވެ.
ރާއްޖެއަށް ހުޅަނގު މޫސުމުގެ ބާރު ގަދަވަމުންދާއިރު، ވިއްސާރަ އަލިކުރާނޭކަމަށް ބެލެވެނީ އަންނަ ބުދަ ދުވަހުގެ ފަހުންކަމަށް މެޓް އޮފީހުން ވަނީ ލަފާކޮށްފައެވެ.
މިދުވަސްވަރަކީ މޫސުން ގޯސް ދުވަސްވަރަކަށްވާތީވެ، މޫސުމާ ބެހޭ މައުލޫމާތު ހޯދައިގެން ނޫނީ ކަނޑުމައްޗަށް ނޭރުމަށް މޫސުމާ ބެހޭ ޤައުމީ އިދާރާ، އަދި ކޯސްޓްގާޑުން ވަނީ އިލްތިމާސްކޮށްފައެވެ. މޫސުން ގޯސްވުމުގެ ސަބަބުން ހުކުރު ދުވަހުގެ ރޭ ހއ. އަތޮޅު މަނަފަރު ރިޒޯޓުން ކުނި ބަރުކޮށްގެން ކ.ތިލަފުށްޓަށް ދަތުުރުކުރަމުންދިއަ ދޯންޏެއް ފަރަކަށް އަރައި އަޑިއަށްދިޔައިރު، އޭގައި ތިބި މީހުން ސަލާމަތްކޮށްފައިވަނީ ކޯސްޓްގާޑުންކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
