އޮފީސްތަކުގެ ޑްރާމާ މުބާރާތް 1446 ގައި އާއިލީ ތަރައްޤީއާ ބެހޭ ވުޒާރާއިން ބައިވެރިކުރުވި ޑްރާމާއަށް 11 އެވޯޑެއް ލިބިއްޖެއެވެ.

ނެޝަނަލް ސެންޓަރ ފޮރ ދި އަރޓްސްއިން ބޭއްވި "އޮފީސްތަކުގެ ޑްރާމާ މުބާރާތް 1446" ގައި މި ވުޒާރާގެ ފަރާތުން ބައިވެރިކުރި ޑްރާމާ "ޢާއިލާ" އަށް ބޮޑު ކާމިޔާބީއެއް ލިބުނުއިރު، މިއީ އެންސީއޭއިން އިންތިޒާމުކުރި މި މުބާރާތުގައި ޑްރާމާއަކަށް މިހާބޮޑު ކާމިޔާބެއް ލިބުނު ފުރަތަމަ ފަހަރުކަން ފާހަގަކޮށްލެވއެވެ. މި މުބާރާތުގައި އާއިލީ ތަރައްޤީއާ ބެހޭ ވުުޒާރާއިން ބައިވެރިކުރި "އާއިލާ" ޑްރާމާއަށް ވަނީ ޖުމްލަ 11 އެވޯޑް ލިބިފައެވެ.

މި ޑްރާމާއަށް އެންމެ މޮޅު ފިރިހެން އަދި އަންހެން އެކްޓަރ، އެންމެ މޮޅު ޑައިރެކްޓަރ، އެންމެ މޮޅު ސްކްރީންޕްލޭ، އެންމެ މޮޅު އަންހެން ނިއުކަމަރ އަދި އެންމެ މޮޅު ލަވައިގެ އެވޯޑް ވަނީ ލިބިފައެވެ. މީގެ އިތުރުން، ބެލުންތެރިންގެ އެންމެ ގިނަ ވޯޓާއިއެކު އެންމެ މަޤްބޫލް ޑްރާމާ، އެންމެ މަޤްބޫލް ފިރިހެން އަދި އަންހެން އެކްޓަރުގެ އެވޯޑު ވެސް ހާސިލުކޮށްފައިވަނީ"ޢާއިލާ' އެވެ. އަދި އާދަޔާހިލާފު މޮޅު ހުށަހެޅުމަށް ދޭ ޖަޖުންގެ ޚާއްސަ އެވޯޑް ވެސް ލިބިފައިވަނީ ވެސް މި ޑްރާމާއަށެވެ. އާއިލާ ޑްރާމާގެ ޑައިރެކްޓަރަކީ. މަޝްހޫރު ފިލްމު ކުޅުންތެރިޔާ އަދި ފިލްމު ޑައިރެކްޓަރ މުޙައްމަދު ފައިސަލްއެވެ

އެވޯޑް ހަފްލާގެ ތެރެއިން.. ފޮޓޯ: އާއިލާއާ ބެހޭ ވުޒާރާ

ޑްރާމާގެ މައިގަނޑު މަޤްސަދަކީ، ދައުލަތުގެ ބެލުމުގެ ދަށުގައި ތިބޭ ކުދިންނަށް ޢާއިލީ ވެއްޓެއް ހޯދައިދިނުމަށް މި ވުޒާރާއިން ކުރިއަށް ގެންދާ 'ކޮންމެ ކުއްޖަކަށް ޢާއިލާއެއް' ޕްރޮގްރާމާއި ގުޅޭގޮތުން އާންމުންގެ މެދުގައި ހޭލުންތެރިކަން އިތުރުކުރުމާއެކު، އެ ކުދިންނާމެދު މުޖުތަމަޢު ދެކޭގޮތް ބަދަލުކުރުންކަމަށް އާއިލީ ތަރައްޤީއާ ބެހޭ ވުޒާރާއިން ބުނެއެވެ. މީގެއިތުރުން، އެކުދިންނަކީ މުޖުތަމަޢު ބަލައިގަންނަ ގަދަރުވެރި ކުދިންނަށް ހެދުމުގައި މުޖުތަމަޢުގެ އެއްބާރުލުން ހޯދައި، ތަސައްވުރު ބިނާކުރުމަށް މި ޑްރާމާ މެދުވެރިކޮށް ތަފާތު މެސެޖުތައް ވަނީ ރައްދުކޮށްދީފައެވެ.

މި ޑްރާމާއަށް ބެލުންތެރިންގެވެސް ބޮޑު މަޤްބޫލުކަމެއް ވަނީ ލިބިގެންގޮސްފައެވެ. އެގޮތުން، ޑްރާމާއިން ދައުލަތުގެ ބެލުމުގެ ދަށުގައިވާ ކޮންމެ ކުއްޖަކަށްވެސް ލޯބިވާ އަދި އެހީތެރިވެދޭ ޢާއިލީ މާޙައުލެއް ފޯރުކޮށްދިނުމުގެ މުހިންމުކަން ފެނިގެން ގޮސްފައިވެއެވެ. މިއީ އޮފީސްތަކުގެ ޓެލެޑްރާމާ މުބާރާތުގައި މި ވުޒާރާއިން ހުށަހަޅައިދީފައިވާ ފުރަތަމަ ޑްރާމާ ކަމަށް އެ ވުޒާރާއިން ބުނެއެވެ.

"އާއިލާ" ޑްރާމާގެ ޒަރިއްޔާއިން ކޮންމެ ކުއްޖަކަށް ޢާއިލީ ވެއްޓެއްގެ ލޯތްބާއި ހިމާޔަތާއި ރައްކާތެރިކަން ހޯދުމަށް ކުރެވޭ މަސައްކަތްތަކުގެ މުހިންމުކަން އާންމުންނަށް ވަޒަންކުރެވި، މި މަސައްކަތުގައި މިހާރަށް ވުރެ ބޮޑަށް މުޖުތަމަޢުގެ އެއްބާރުލުން ލިބުމަށް މަގުފަހިވެގެން ދިއުމަކީ  އާއިލީ ތަރައްޤީއާ ބެހޭ ވުުޒާރާއިން ކުރާ އުއްމީދުކަމަށްވެސް އެ ވުޒާރާއިން ވަނީ ބުނެފައެވެ.