ދެށުން ފެންނަ ސިޔާސަތެއްގެ ދަށުން ރާއްޖޭގެ ޓޫރިޒަމަށް ފަސޭހަކަމާއެކު މާލީ އެހީތެރިކަން ފޯރުކޮށް ދިނުމަށް މަގުފަހިކޮށްދީ އެފަދައިން ލިބޭ އެހީ އަމާނާތްތެރިކަމާއެކު ބެލެހެއްޓުމުގެ ޒިންމާ އޮތް ޓޫރިޒަމް ޓްރަސްޓް ފަންޑްގެ ގަވާއިދު އެކުލަވާލައި މިއަދު އާންމުކޮށްފި އެވެ.

މި ގަވާއިދުގައި ބުނާ ގޮތުން ޓޫރިޒަމް ޓްރަސްޓް ފަންޑު ހިންގުމަށްޓަކައި ކޮމެޓީއަށް އެކުލަވާލަން ޖެހެ އެވެ. ކޮމެޓީގައި ހިމެނެނީ އެކި ދާއިރާތަކުން ހަތް މެމްބަރުންނެވެ. އެއީ ރައީސުލްޖުމްހޫރިއްޔާގެ އޮފީސް އާއި ފަތުރުވެރިކަމުގެ މަސްއޫލިއްޔަތު އަދާކުރާ ވުޒާރާ އާއި މާލީ ކަންކަމުގެ މަސްއޫލިއްޔަތު އަދާކުރާ ވުޒާރާ އާއި އިގްތިސާދީ ތަރައްގީއާ ވިޔަފާރީގެ ކަންކަމުގެ މަސްއޫލިއްޔަތު އަދާކުރާ ވުޒާރާ އާއި ބަންޑާރަ ނާއިބުގެ އޮފީހާއި އިމާރާތްކުރުމާއި ބިނާރާބެހޭ ކަންކަމުގެ މަސްއޫލިއްޔަތު އަދާކުރާ ވުޒާރާ އާއި މޯލްޑިވްސް އިންލަންޑް ރެވެނިއު އޮތޯރިޓީ އެވެ.

ކޮމެޓީގެ ޗެއަރޕާސަންގެ މަސްއޫލިއްޔަތު އަދާކުރާނީ ފަތުރުވެރިކަމާ އެ އިރެއްގައި ހަވާލުވެ ހުންނަ މިނިސްޓަރު ކަމަށް ގަވާއިދުގައިވެ އެވެ. އަދި ކޮމެޓީއަށް މެންބަރުން އައްޔަނު ކުރާނީ ފަސް އަހަރަށް ކަމަށް ވެސް ވަނީ ބުނެފަ އެވެ.

މި ގަވާއިދުގެ ބޭނުމަކީ ދެށުން ފެންނަ ސިޔާސަތެއްގެ ދަށުން ރާއްޖޭގެ ޓޫރިޒަމަށް ފަސޭހަކަމާއެކު މާލީ އެހީތެރިކަން ފޯރުކޮށް ދިނުމަށް މަގުފަހިކޮށްދީ އެފަދައިން ލިބޭ އެހީ އަމާނާތްތެރިކަމާއެކު ބެލެހެއްޓުމާއި ޓޫރިޒަމާއި ޓޫރިޒަމްގެ ވަސީލަތްތައް ކުރިއެރުވުމަށާއި ޓޫރިޒަމްގެ ދާއިރާގައި ހަރަކާތްތެރިވާ ފަރާތްތަކުގެ ޤާބިލުކަން އިތުރުކުރުމަށްޓަކައި މާލީ އެހީތެރިކަން ފޯރުކޮށް ދިނުމާއި ޓޫރިޒަމްގެ ވަސީލަތްތައް ތަަރައްޤީ ކުރުމަށް އިންވެސްޓް ކުރުމާއި ފަންޑަށް ޖަމާކުރާ ފައިސާ އިން ޤާނޫނު ހުއްދަކުރާ ގޮތުގެ މަތީން އިންވެސްޓް ކުރުން ކަމަށް ވަނީ ބުނެފަ އެވެ.

އަދި އެކަންކަން ވަނީ ތަފްސީލުކޮށް ބަޔާން ކޮށްފަ އެވެ.