މިދިޔަ އޭޕްރީލް 18 ވަނަ ދުވަހު ހެންވޭރު ގެއަކުން ގުދަނެއްގެ ފުރާޅު މައްޗަށް ވެއްޓިފައި އޮއްވާ ފެނުނު ހައްވާ ޔުމްނު ރަޝީދުގެ ބަޔާން އަދިވެސް ނުނެގޭ ކަމަށް ފުލުހުން ބުނެފި އެވެ.
ޔުމްނު ވެއްޓުނު މައްސަލާގައި ފުލުހުންނަށްވެސް ޔުމްނުގެ އާއިލާގެ ފަރާތުން އެއްބާރުލުން ނުލިބޭ ކަމަށް އެ އިދާރާއިން މީގެ ކުރިން ވަނީ ބުނެފައެވެ. އެގޮތުން އޭނާގެ ބަޔާން ނަގަން ފުލުހުން މަސައްކަތްކޮށް އެކަން ކާމިޔާބު ނުވުމުން، މެލޭޝިޔާގެ ފުލުހުންނާއި ގުޅިގެން ބަޔާން ނަގަން މަސައްކަތް ކުރާ ކަމަށް ފުލުހުން ބުނެފައިވެއެވެ.
އެ މަސައްކަތާ ގުޅޭގޮތުން ސުވާލުކުރުމުން ފުލުހުން މިއަދު ބުނީ ޔުމްނުގެ ބަޔާން އަދިވެސް ނުނެގޭ ކަމަށެވެ. ނަމަވެސް އިތުރު ތަފްސީލެއް ނުދެ އެވެ.
ޔުމްނު ވެއްޓުނު މައްސަލަ ބަލައި، އެ މައްސަލައާ ގުޅިގެން މިނިވަން، މުސްތަގިއްލު އަދި އިތުބާރު ހިފޭ ތަހުގީގެއްކުރުމަށް ކުރުމަށް ރައީސުލްޖުމްހޫރިއްޔާ ވަނީ އޭޕްރިލްމަހުގެ 27 ވަނަ ދުވަހު ރިޔާސީ ކޮމިޝަނެއް އުފައްދަވާފަ އެވެ.
އެ ކޮމިޝަނަށް ވެސް ޔުމްނު ބަޔާނެއް ނުދިނެވެ. އެހެން ކަމުން ކޮމިޝަންގެ މަސައްކަތް ނިންމާ ރިޕޯޓް އާންމުކުރީ ޔުމްނުގެ ބަޔާން ނުހިމަނަ އެވެ.
ކޮމިޝަންގެ މަސައްކަތް ނިމުމުން ރައީސް މިހާރު ވަނީ ކޮމިޝަން އުވާލަައްވާފަ އެވެ.
Advertisement
This content is created and paid for by advertisers and does not involve Voice Journalists
