އިދިކޮޅު އެންމެބޮޑު ޕާޓީ، އެމްޑީޕީގެ ހަރުގެއަށް ގެއްލުންދިން މީހާ 30 ދުވަހުގެ މުއްދަތަކަށް ބަންދުގައި ބެހެއްޓުމަށް ކްރިމިނަލް ކޯޓުން އަމުރުކޮށްފިއެވެ.
ޗާންދަނީ މަގުގައި ހުންނަ އެމްޑީޕީގެ ހަރުގެއަށް ގެއްލުންދިން ކަމުގެ ތުހުމަތުގައި ފުލުހުން ހައްޔަރުކޮށްފައިވަނީ، މ.ސްޓާ އުމުރުން 49 އަހަރުގެ މުހައްމަދު ރަޒީންނެވެ. އޭނާ އެމްޑީޕީ ހަރުގެއަށް ގެއްލުންދީގެން އެ މައްސަލަ ފުލުހުންނަށް ރިޕޯޓްކޮށްފައިވަނީ, މިދިޔަ ހޮނިހިރުދުވަހުގެ ރޭ ދަންވަރު 01:30 ހާއިރެވެ.
މި މައްސަލައާ ބެހޭގޮތުން ފުލުހުން ބުނީ ރަޒީންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ކޯޓުން އޭނާގެ ބަންދަށް 30 ދުވަސް އިތުރުކޮށްފައިވާކަމަށެވެ.
އެމްޑީޕީ ހަރުގެއަށް ދިން ގެއްލުންތަކަށް ބަލާއިރު، ހަރުގެ ގޭޓަށް ވަނީ ބޮޑެތި ގެއްލުންތަކެއް ދީފައެވެ. ރަޒީންއަކި މީގެ ކުރިންވެސް ތަފާތު އެކި މައްސަލަތަކުގައި ކުށުގެ ރެކޯޑް އޮންނަ މީހެއްކަމަށް ފުލުހުން ބުނެއެވެ. އެގޮތުން އޭނާ ވަނީ މީގެ ކުރިން ކެފޭއެއްގެ ކާތަކެތި ބަހައްޓާ ބިއްލޫރި ޝޯކޭސްއެއްގައި ފައިންޖަހައި އެ ތަޅާލި މައްސަލާގައި މިއަހަރުގެ އޭޕްރިލްމަހު ހައްޔަރުކޮށްފައެވެ.
Advertisement
This content is created and paid for by advertisers and does not involve Voice Journalists
